ବାରିପଦା – ମୟୂରଭଞ୍ଜ ଜିଲ୍ଲା ବେତନଟୀ ବ୍ଲକ୍ ଅଁଳା ପଚାଂୟତ ଅନ୍ତର୍ଗତ ଡ଼ମ୍ବରୁଡହର ପ୍ରାଇମେରୀ ସ୍କୁଲ କ୍ୱାରେଂଟାଇନ ସେଂଟର ନିକଟ ମହୁଲ ଗଛରେ ଜଣେ ଅନ୍ତେବାସୀ ରଶି ଲଗାଇ ଆତ୍ମହତ୍ୟା କରିଥିବା ଜଣାପଡିଛି । ଆଜି ସକାଳେ ତାଙ୍କର ମୃତଦେହ ଗଛରେ ଝୁଲନ୍ତା ଅବସ୍ଥାରେ ରହିଥିବା ଦେଖିବାକୁ ମିଳିଥିଲା । ଗତକାଲି ବିଳମ୍ବିତ ରାତିରେ ସେ ଆତ୍ମହତ୍ୟା କରିଥିବା ଅନୁମାନ କରାଯାଉଛି । ମୃତକଙ୍କ ନାମ ସୁରେନ୍ଦ୍ର ବେହେରା (୩୫) । ଘର ଜିଲ୍ଲାର ବୈଶିଙ୍ଗା ଥାନା କମାରଡ଼ିହା ଗ୍ରାମରେ ବୋଲି ଜଣାପଡିଛି ।
ସୁରେନ୍ଦ୍ର କିଛି ଦିନ ତଳେ ତାମିଲନାଡ଼ୁର ଚେନ୍ନାଇରୁ ଫେରିଥିଲେ । ସେହିପରି ତାଙ୍କ ପତ୍ନୀ ଆନ୍ଧ୍ରର ପ୍ରଶାନ୍ତିରୁ ଫେରିଥିଲେ । ଏହି ଦମ୍ପତି ଆସିବା ପରେ ତାଙ୍କୁ ପ୍ରଶାସନ ପକ୍ଷରୁ ସରକାରୀ କ୍ୱାରେଂଟାଇନରେ ରଖାଯାଇଥିଲା । ତେବେ କେଉଁ କାରଣରୁ ସେ ଆତ୍ମହତ୍ୟା କରିଛନ୍ତି ତାହା ସ୍ପଷ୍ଟ ହୋଇନାହିଁ । ଅନ୍ୟପକ୍ଷରେ ଦିନ ସାଢ଼େ ୧୧ଟା ପର୍ଯ୍ୟନ୍ତ ଘଟଣାସ୍ଥଳରେ କୌଣସି ପ୍ରଶାସନିକ ଅଧିକାରୀ ପହଂଚି ନଥିବା ସୂଚନା ମିଳିଛି ।
