ଚଣ୍ଡିଗଡ– ଅମୃତସର ସ୍ଥିତ ସ୍ୱର୍ଣ୍ଣ ମନ୍ଦିର ଦରବାର ସାହିବର ହଜୁରୀ ରାଗୀ ପଦ୍ମଶ୍ରୀ ଜ୍ଞାନୀ ନିର୍ମଳ ସିଂହଙ୍କ କରୋନାରେ ମୃତ୍ୟୁ ଘଟିଛି । ଗୁରୁବାର ସକାଳ ପାଂଚଟାରେ ସେ ଶେଷ ନିଃଶ୍ୱାସ ତ୍ୟାଗ କରିଛନ୍ତି । ଏହା ସହିତ ପଞ୍ଜାବରେ କରୋନା ଜନିତ ମୃତ୍ୟୁ ସଂଖ୍ୟା ୫ଟାରେ ପହଁଚିଛି ।
ପଞ୍ଜାବରେ କରୋନା କାରଣରୁ ଅମୃତସର, ମୋହାଲି, ଲୁଧିଆନା ଓ ହୋସିଆପୁର ଜିଲ୍ଲାରେ ରୋଗୀଙ୍କ ମୃତ୍ୟୁ ଘଟି ସାରିଛି । ସୂଚନା ଅନୁସାରେ ପଦ୍ମଶ୍ରୀ ହଜୁରୀ ରାଗୀ ଜ୍ଞାନି ନିର୍ମଳ ସିଂହ ମାର୍ଚ୍ଚ ୧୭ରେ ଇଂଲଣ୍ଡରୁ ଫେରିଥିଲେ । ଏହା ପରେ ବି ସେ ହୋମ୍ ଆଇସୋଲେସନର ପାଳନ କରିନଥିଲେ । କୁହାଯାଉଛି ଯେ, ଏହି ସମୟରେ ସେ ଚଣ୍ଡିଗଡ ଓ ଦିଲ୍ଲୀରେ କାର୍ଯ୍ୟକ୍ରମରେ ମଧ୍ୟ ସାମିଲ ହୋଇଥିଲେ ।
ଦୁଇ ଦିନ ପୂର୍ବେ ଜ୍ଞାନୀ ନିର୍ମଳ ସିଂହଙ୍କ ସ୍ୱାସ୍ଥ୍ୟବସ୍ଥା ବିଗିଡିବାରୁ ତାଙ୍କୁ ଅମୃତସର ସ୍ଥିତ ଗୁରୁନାନକ ଦେବ ହସ୍ପିଟାଲରେ ଭର୍ତି କରାଯାଇଥିଲା । ବୁଧବାର ତାଙ୍କ ସ୍ୱାସ୍ଥ୍ୟରେ ଅଧିକ ଅବନତି ଘଟିଥିଲା । ଗୁରୁବାର ସକାଳ ୫ଟାରେ ତାଙ୍କର ମୃତ୍ୟୁ ଘଟିଥିଲା । ପଞ୍ଜାବର ମୁଖ୍ୟମନ୍ତ୍ରୀ କ୍ୟାପଟେନ୍ ଅମରିନ୍ଦର ସିଂହ ଶୋକ ବ୍ୟକ୍ତ କରିଛନ୍ତି । ଏମଜିସିପି ପ୍ରଧାନ ଭାଇ ଗୋବିନ୍ଦ ସିଂହ ଲୋଙ୍ଗଭାଲ, ଅକାଳି ଦଳ ସୁପ୍ରିମୋ ପ୍ରକାଶ ସିଂହ ବାଦଲ ହଜୁରୀ ବାଗଙ୍କ ନିଧନରେ ଶୋକ ବ୍ୟକ୍ତ କରିଛନ୍ତି ।
