![](https://indokalingtimes.com/wp-content/uploads/2019/09/IKT-logo.jpg)
ନୂଆଦିଲ୍ଲୀ– ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ‘କୋଭିଡ-୧୯’ ସଂକ୍ରମଣ କାରଣରୁ ଉତ୍ପନ୍ନ ହୋଇଥିବା ଜଟିଳ ସମସ୍ୟା ଉପରେ ସୋମବାର ଦିନ ଭିଡିଓ କନଫରେନ୍ସ ମାଧ୍ୟମରେ ବୈଦ୍ୟୁତିକ ଗଣମାଧ୍ୟମ ଚ୍ୟାନେଲର ପ୍ରମୁଖ ଅଂଶୀଦାରମାନଙ୍କ ସହିତ ବିସ୍ତୃତ ଆଲୋଚନା କରିଛନ୍ତି ।
ପ୍ରଧାନମନ୍ତ୍ରୀ ପ୍ରଥମ ଦିନରୁ ଏହି ମହାମାରୀର ଗମ୍ଭୀର ବିପଦକୁ ବ୍ୟାପକ ଭାବେ ବୁଝିବା ଲାଗି ଗଣମାଧ୍ୟମକୁ ଧନ୍ୟବାଦ ଜଣାଇଥିଲେ । ଏ ଦିଗରେ ସଚେତନତା ସୃଷ୍ଟି କରିବାରେ ଚ୍ୟାନେଲଗୁଡ଼ିକ ଦ୍ୱାରା ନିର୍ବାହ କରାଯାଇଥିବା ଗୁରୁତ୍ୱପୂର୍ଣ୍ଣ ଭୂମିକାକୁ ଭୂରି ଭୂରି ପ୍ରଶଂସା କରିଥିଲେ । ସେ ସାମ୍ବାଦିକ, କ୍ୟାମେରାମ୍ୟାନ ଓ ଟେକ୍ନନିସିଆନମାନଙ୍କ ସମର୍ପଣ ଭାବନା ଏବଂ ପ୍ରତିବଦ୍ଧତାକୁ ପ୍ରଶଂସା କରିଥିଲେ ଯେଉଁମାନେ ଦେଶର ବିଭିନ୍ନ କ୍ଷେତ୍ରକୁ ଯାଇ ତଥା ନ୍ୟୁଜ ରୁମରେ ରହି କଠିନ ପରିଶ୍ରମ କରୁଛନ୍ତି । ସେମାନଙ୍କର ଏହି କଠିନ ପରିଶ୍ରମକୁ ପ୍ରଧାନମନ୍ତ୍ରୀ ରାଷ୍ଟ୍ର ସେବାର ଆଖ୍ୟା ଦେଇଥିଲେ । ସେ କେତେକ ଚ୍ୟାନେଲର ଅଭିନବ ଉପାୟ ଯେପରିକି ଘରେ ଥାଇ ସମ୍ବାଦ ପରିବେଷଣ କରିବାର ବ୍ୟବସ୍ଥା କରାଯିବାକୁ ମଧ୍ୟ ପ୍ରଶଂସା କରିଥିଲେ ।
ପ୍ରଧାନମନ୍ତ୍ରୀ ‘କୋଭିଡ-୧୯’କୁ ଏକ ଜୀବନକାଳୀନ ଆହ୍ୱାନ ଭାବେ ଆଖ୍ୟା ଦେଇ କହିଥିଲେ ଯେ ଅଭିନବ ଏବଂ ନୂଆ ଉପାୟରେ ଏହାର ମୁକାବିଲା କରିବାର ଆବଶ୍ୟକତା ରହିଛି । ଆମ ସମ୍ମୁଖରେ ଏକ ଦୀର୍ଘ ଲଢ଼େଇ ରହିଛି । ତେଣୁ ‘ସାମାଜିକ ଦୂରତା ବା ପରସ୍ପର ଠାରୁ ଦୂରରେ ରହିବା’ ବିଷୟରେ ଲୋକମାନଙ୍କ ମଧ୍ୟରେ ସଚେତନତା ବଢ଼ାଇବା ଅତ୍ୟନ୍ତ ଜରୁରି । ଏଥିପାଇଁ ଚ୍ୟାନେଲଗୁଡ଼ିକ ପାଇଁ ଏହା ଆବଶ୍ୟକ ଯେ ସେମାନେ ନୂଆ ଘଟଣାକ୍ରମ ଏବଂ ପ୍ରମୁଖ ସରକାରୀ ନିର୍ଣ୍ଣୟ ସମ୍ପର୍କରେ ସାଧାରଣ ଜନତାଙ୍କୁ ତୁରନ୍ତ ଏବଂ ଅତି ପେସାଦାର ଢଙ୍ଗରେ ସାଧାରଣ ଜନତାଙ୍କ ବୁଝିବା ଭଳି ଭାଷାରେ ବୁଝାଇବା ଜରୁରି ।
ଗୋଟିଏ ପଟେ ବେପରୁଆ ମନୋଭାବ ପୋଷଣ ନକରିବା ଓ ସତର୍କ ରହିବା ଲାଗି ଲୋକମାନଙ୍କୁ ପରାମର୍ଶ ଦେବା ଏବଂ ଅନ୍ୟପଟେ ସକାରାତ୍ମକ ସଂଚାର ବା ସମ୍ବାଦ ଜରିଆରେ ଲୋକମାନଙ୍କ ମଧ୍ୟରେ ରହିଥିବା ନିରାଶାବାଦ ଓ ଭୟ ଦୂର କରିବା ଚ୍ୟାନେଲଗୁଡ଼ିକର ଦାୟିତ୍ୱ ବୋଲି ସେ କହିଥିଲେ । ପ୍ରଧାନମନ୍ତ୍ରୀ କହିଥିଲେ ଯେ ଡାକ୍ତର ଓ ସ୍ୱାସ୍ଥ୍ୟ କର୍ମୀମାନଙ୍କୁ ସର୍ବଦା ଉତ୍ସାହିତ କରିବା ଅତ୍ୟନ୍ତ ଜରୁରି କାରଣ ସେମାନେ ହିଁ ଏହି ଲଢ଼େଇରେ ନେତୃତ୍ୱ ନେଉଛନ୍ତି ।
ଆବଶ୍ୟକ ସୂଚନା ଏବଂ ମତାମତ ସଂଗ୍ରହର ଏକ ଗୁରୁତ୍ୱପୂର୍ଣ୍ଣ ସାଧନ ହେଉଛନ୍ତି ସମାଚାର ଚ୍ୟାନେଲ । ସରକାର ଏସବୁ ମତାମତ ଉପରେ ନିରନ୍ତର କାର୍ଯ୍ୟ କରୁଛନ୍ତି । କ୍ଷେତ୍ରୀୟ ସ୍ତରରେ କାର୍ଯ୍ୟ କରୁଥିବା ସମ୍ବାଦଦାତା ଏବଂ ସାମ୍ବାଦିକମାନଙ୍କୁ ସ୍ୱତନ୍ତ୍ର ବୁମ ମାଇକ ପ୍ରଦାନ କରିବା ଏବଂ ସାକ୍ଷାତକାର ନେବା ସମୟରେ ଅତି କମରେ ୧ ମିଟର ଦୂରତା ବଜାୟ ରଖିବା ଭଳି ସତର୍କତା ଅବଲମ୍ବନ କରିବା ନିମନ୍ତେ ସେ ପରାମର୍ଶ ଦେଇଥିଲେ ।
ବିଜ୍ଞାନ ସମ୍ବନ୍ଧୀୟ ରିପୋର୍ଟ ବା ସୂଚନା ଅଧିକରୁ ଅଧିକ ଲୋକମାନଙ୍କ ନିକଟରେ ପହଁଚାଇବା ଏବଂ ସମ୍ପୂର୍ଣ୍ଣ ସଠିକ ସୂଚନା ରଖୁଥିବା ଲୋକମାନଙ୍କୁ ଆଲୋଚନାରେ ସାମିଲ କରିବା ଏବଂ ଭୁଲ ସୂଚନା ପ୍ରସାର ସମସ୍ୟାରୁ ବର୍ତିବା ଲାଗି ସେ ପରାମର୍ଶ ଦେଇଥିଲେ । ଭୂତାଣୁ ସଂକ୍ରମଣ ରୋକିବା ଦିଗରେ ନାଗରିକମାନଙ୍କ ମଧ୍ୟରେ ଶୃଙ୍ଖଳା ଓ ସାମାଜିକ ଦୂରତା ବଜାୟ ରଖିବା ଉପରେ ସେ ଆଲୋକପାତ କରିଥିଲେ ।
ଏହି ଗମ୍ଭୀର ଆହ୍ୱାନର ମୁକାବିଲା କରିବା ଲାଗି ଗଣମାଧ୍ୟମ ଜଗତର ପ୍ରତିନିଧିମାନେ ପ୍ରଧାନମନ୍ତ୍ରୀଙ୍କ ନେତୃତ୍ୱ ଓ କଠିନ ପରିଶ୍ରମ ପାଇଁ ଧନ୍ୟବାଦ ଜଣାଇଥିଲେ । ଏହି ମହାମାରୀର ମୁକାବିଲା ଦିଗରେ ମିଳିମିଶି କାର୍ଯ୍ୟ କରିବା ଲାଗି ସେ ପ୍ରଧାନମନ୍ତ୍ରୀଙ୍କୁ ଆଶ୍ୱାସନା ଦେଇଥିଲେ ।
ସାଧାରଣ ଜନତାଙ୍କ ସହିତ ପ୍ରଧାନମନ୍ତ୍ରୀଙ୍କ ଭାବଗତ ସମ୍ପର୍କ ବିଷୟରେ ଉଲ୍ଲେଖ କରି ଏହି ପ୍ରତିନିଧିମାନେ ତାଙ୍କୁ ରାଷ୍ଟ୍ରକୁ ଆହୁରି ଅଧିକ ଥର ସମ୍ବୋଧିତ କରିବା ଲାଗି ଅନୁରୋଧ କରିଥିଲେ । ସକାରାତ୍ମକ କାହାଣୀ, ବିଶେଷ କରି କୋଭିଡ-୧୯କୁ ପରାଜିତ କରିଥିବା ଲୋକମାନଙ୍କ ଅଭିଜ୍ଞତାକୁ ନିଜର ଉଦବୋଧନରେ ସାମିଲ କରିବା ଲାଗି ଅନୁରୋଧ କରିଥିଲେ । ଏହି ପ୍ରତିନିଧିମାନେ କହିଥିଲେ ଯେ ସମ୍ବାଦଦାତାଙ୍କ ଯାଂଚ କରିବା ଲାଗି ଏଭଳି ସ୍ୱତନ୍ତ୍ର ବିଭାଗ ପ୍ରତିଷ୍ଠା କରାଯାଇପାରିବ ଯେଉଁଥିରେ ଡାକ୍ତର ୨୪ ଘଂଟା ଉପଲବ୍ଧ ରହିଥିବେ । ଏହାଦ୍ୱାରା ମହାମାରୀ ସହ ଜଡ଼ିତ ଗୁଜବର ମୁକାବିଲା ଦିଗରେ ସହାୟତା ମିଳିପାରିବ । ଏହି ପରାମର୍ଶ ମଧ୍ୟ ଦିଆଯାଇଥିଲା ଯେ ପ୍ରସାର ଭାରତୀ ପ୍ରତିଦିନ ଏକ ପ୍ରାମାଣିକ ସୂଚନା ଦେବା ଆବଶ୍ୟକ ଯାହାର ଉପଯୋଗ ଅନ୍ୟାନ୍ୟ ଟିଭି ଚ୍ୟାନେଲ କରିପାରିବେ ।
ଏହି ଗୁରୁତ୍ୱପୂର୍ଣ୍ଣ ପରାମର୍ଶ ଏବଂ ବହୁମୂଲ୍ୟ ସୂଚନା ଦେବା ଲାଗି ପ୍ରଧାନମନ୍ତ୍ରୀ ସେମାନଙ୍କୁ ଧନ୍ୟବାଦ ଜ୍ଞାପନ କରିଥିଲେ । ସେ ଚ୍ୟାନେଲଗୁଡ଼ିକୁ ଅନୁରୋଧ କରିଥିଲେ ଯେ ସେମାନେ ଡିଜିଟାଲ ପଇଠ କରିବା ଲାଗି ଲୋକମାନଙ୍କ ମଧ୍ୟରେ ସଚେତନତା ବୃଦ୍ଧି କରନ୍ତୁ, ଯାହାଦ୍ୱାରା ନଗଦ ଟଙ୍କା ମାଧ୍ୟମରେ ଭୂତାଣୁ ସଂକ୍ରମଣରୁ ରକ୍ଷା ପାଇହେବ । ସେ ଚ୍ୟାନେଲଗୁଡ଼ିକୁ ବିଜ୍ଞାନ ସମ୍ବନ୍ଧୀୟ ରିପୋର୍ଟ କିମ୍ବା ସୂଚନାର ବ୍ୟାପକ ଉପଯୋଗ କରି ଅନ୍ଧବିଶ୍ୱାସର ପ୍ରସାର ସମସ୍ୟା ମୁକାବିଲା ପାଇଁ ପରାମର୍ଶ ଦେଇଥିଲେ ।
ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ମନ୍ତ୍ରଣାଳୟ ସଚିବ ଆବଶ୍ୟକ ସୂଚନାକୁ ସକ୍ରିୟତାପୂର୍ବକ ପ୍ରସାର ଲାଗି ସ୍ୱାସ୍ଥ୍ୟ ମନ୍ତ୍ରଣାଳୟ ଠାରୁ ସୂଚନା ସଂଗ୍ରହ କରୁଥିବା ଖବରଦାତାମାନଙ୍କୁ ଧନ୍ୟବାଦ ଜଣାଇଥିଲେ । ସେ କୋଭିଡ-୧୯ ମୁକାବିଲା ଲାଗି ସରକାରଙ୍କ ଶ୍ରେଣୀବଦ୍ଧ ଉପାୟ ପ୍ରଣାଳୀ (ଗ୍ରେଡେଡ ରେସପନ୍ସ ସିଷ୍ଟମ) ଏବଂ ଆହ୍ୱାନର ମୁକାବିଲା ଲାଗି କ୍ଷମତା ନିର୍ମାଣ ନିମନ୍ତେ ହେଉଥିବା ନିରନ୍ତର ପ୍ରୟାସ ଉପରେ ଆଲୋକପାତ କରିଥିଲେ ।
ଭାରତୀୟ ଚିକିତ୍ସା ଗବେଷଣା ପରିଷଦର (ଆଇସିଏମଆର) ମହାନିର୍ଦ୍ଦେଶକ କହିଥିଲେ ଯେ ପରୀକ୍ଷଣ ରଣନୀତି ଅନ୍ତର୍ଗତ ଶ୍ରେଣୀବଦ୍ଧ କିମ୍ବା କ୍ରମିକ ପ୍ରୟାସକୁ କାର୍ଯ୍ୟକାରୀ କରାଯାଉଛି । ଏହା ସହିତ ପରୀକ୍ଷଣ କିଟ ଲାଗି ଅନୁମୋଦନ ମଧ୍ୟ ତ୍ୱରାନ୍ୱିତ ହୋଇଛି ।
କେନ୍ଦ୍ର ସୂଚନା ଏବଂ ପ୍ରସାରଣ ମନ୍ତ୍ରୀ, ସୂଚନା ଏବଂ ପ୍ରସାରଣ ମନ୍ତ୍ରଣାଳୟର ସଚିବ, ପ୍ରମୁଖ ବୈଦ୍ୟୁତିକ ଗଣମାଧ୍ୟମ ସଂସ୍ଥାର ବରିଷ୍ଠ ପ୍ରତିନିଧି, ସମ୍ପାଦକମାନେ ଏହି ଗୁରୁତ୍ୱପୂର୍ଣ୍ଣ ଆଲୋଚନାରେ ଭାଗ ନେଇଥିଲେ ।