କୋରାପୁଟ– କୋରାପୁଟ ଜିଲ୍ଲା ମାଛକୁଣ୍ଡ ଥାନା ଅନ୍ତର୍ଗତ କଂଚଣା ଗ୍ରାମରେ ଏକ ଅଚଳ କାର୍ ଭିତରୁ ୬ ବର୍ଷିୟା ଶିଶୁକନ୍ୟାର ଗଳାକଟା ମୃତଦେହ ଉଦ୍ଧାର କରାଯାଇଛି । ମୃତ ଶିଶୁକନ୍ୟାର ପରିବାର ଲୋକେ ଏନେଇ ଥାନାରେ ଏତଲା କରିଥିବା ବେଳେ ପୋଲିସ ଘଟଣାର ତଦନ୍ତ ଚଳାଇଛି । ଅନ୍ୟପକ୍ଷରେ ଘଟଣାକୁ ନେଇ ଗ୍ରାମରେ ଉତେଜନା ପ୍ରକାଶ ପାଇଛି । ନାବାଳିକାଙ୍କୁ ହତ୍ୟା କରାଯାଇଥିବା ସନ୍ଦେହ କରାଯାଉଛି ।
ଗତକାଲି ରାତିରେ ଶିଶୁଟି ତାଙ୍କ ପରିବାର ଲୋକଙ୍କ ସହ ପଡ଼ୋଶୀ ଘରେ ଟିଭି ଦେଖୁଥିଲା । ହେଲେ କିଛି ସମୟ ପରେ ସେଠାରୁ ନିଖୋଜ ହୋଇଯାଇଥିଲା । ପରିବାର ଲୋକେ ଚାରିଆଡେ ଖୋଜାଖୋଜି କରି ଗାଁରେ ଥିବା ଏକ ଅଚଳ କାର୍ ମଧ୍ୟରୁ ଆଜି ସକାଳେ ତାର ମୃତଦେହ ଠାବ କରିଥିଲେ । କାର୍ ଟି ପ୍ରାୟ ଦେଢ଼ ବର୍ଷ ହେବ ଗ୍ରାମ ମଧ୍ୟରେ ଅଚଳ ହୋଇ ପଡିରହିଛି । ଏ ସଂକ୍ରାନ୍ତରେ ମାଛକୁଣ୍ଡ ଥାନା ପୋଲିସ ଏକ ହତ୍ୟା ମାମଲା ରୁଜ୍ଜୁ କରି ବିଭିନ୍ନ ଦିଗକୁ ନେଇ ତଦନ୍ତ ଜାରୀ ରଖିଛି । ଘଟଣାକୁ ନେଇ ଗ୍ରାମରେ ଉତେଜନା ପ୍ରକାଶ ପାଇଛି । ମୃତ ନାବାଳିକାଙ୍କ ପରିବାର ଲୋକେ ଓ ଗ୍ରାମବାସୀ ମାମଲାର ଉପଯୁକ୍ତ ତଦନ୍ତ ସହ ହତ୍ୟାକାରୀଙ୍କୁ ତୁରନ୍ତ ଗିରଫ ପାଇଁ ଦାବି କରିଛନ୍ତି ।
