ଗଞ୍ଜାମ– ଗଞ୍ଜାମ ଜିଲ୍ଲା ବୁଗୁଡ଼ା ବନ ବିଭାଗ ପକ୍ଷରୁ ଆମ୍ବିଳିଝର ନିକଟରେ ଚଢ଼ଉ କରାଯାଇ ଏକ କାଠ ବୋଝେଇ ୪୦୭ ମିନି ଟ୍ରକ୍ ଓ ଏହାକୁ ସୁରକ୍ଷା ଦେଇ ଯାଉଥିବା ଏକ ବାଇକ୍ କୁ ଜବତ କରାଯିବା ସହ କାଠ ଚୋରାଚାଲାଣ ଅଭିଯୋଗରେ ଗାଡ଼ିର ଡ଼୍ରାଇଭର ସମେତ ୪ ଜଣଙ୍କୁ ଗିରଫ କରାଯାଇଛି ।
ସୂଚନା ଅନୁଯାୟୀ, ୪୦୭ ମିନି ଟ୍ରକ୍ ନଂ ଓଏଜି୬୧୭୭ ଯୋଗେ ଶାଗୁଆନ, ଶାଳ, ଜାମୁ, ହଳନ୍ଦ ପ୍ରଭୃତି ୨୨ ଖଣ୍ଡ ମୂଲ୍ୟବାନ୍ କାଠ ଗଣ୍ଡି ବୋଝେଇ ହୋଇ ଚୋରାଚାଲାଣ ହେଉଥିଲା । ଏ ସମ୍ପର୍କରେ ଖବର ପାଇ ଆଜି ଭୋରରୁ ଘୁମୁସର (ଦକ୍ଷିଣ) ବନଖଣ୍ଡ ଅଧିକାରୀ ସତ୍ୟନାରାୟଣ ବେହେରାଙ୍କ ନିର୍ଦ୍ଦେଶ କ୍ରମେ ବୁଗୁଡ଼ା ବନାଚଂଳ ଅଧିକାରୀ ଫକୀର ଚରଣ ବେହେରା, ବନପାଳ ସୁବ୍ରତ ତ୍ରିପାଠୀ, ବନରକ୍ଷୀ ଶିବରାମ ପାତ୍ର ଓ ଅଶ୍ୱିନୀ ପାତ୍ର, ପାରା ଫରେଷ୍ଟର ଷ୍ଟାଫ୍ ଏବଂ ବୁଗୁଡ଼ା ପୋଲିସ ବାହିନୀ ଆମ୍ବିଳିଝର ନିକଟରେ ଏହି କାଠ ବୋଝେଇ ଟ୍ରକ୍ କୁ ଜବତ କରିବା ସହ ଏହାକୁ ସୁରକ୍ଷା ଦେଇ ଯାଉଥିବା ବାଇକ୍ ନଂ ଓଡି୦୭ଏଲ ୨୨୪୩ କୁ ମଧ୍ୟ ଜବତ କରିଥିଲେ । ଘଟଣାରେ ଟ୍ରକ୍ ଡ଼୍ରାଇଭର ରାମଚନ୍ଦ୍ର ବେହେରାଙ୍କ ସମେତ କାର୍ତିକ ସାହୁ, ପ୍ରେମାନନ୍ଦ ସାହୁ, ବନମାଳି ପାତ୍ରଙ୍କୁ ଗିରଫ କରାଯାଇଛି । ଜବତ କାଠର ଆନୁମାନିକ ମୂଲ୍ୟ ଦେଢ଼ ଲକ୍ଷ ଟଙ୍କା ହେବ । ବନାଚଂଳ ଥାନା କେସ୍ ନଂ ୨୯୮/୨୦ ରେ ଏ ସଂକ୍ରାନ୍ତରେ ଏକ ମାମଲା ରୁଜ୍ଜୁ ହୋଇଛି । ବିଭାଗ ପକ୍ଷରୁ ଏନେଇ ଅଧିକ ତଦନ୍ତ ଜାରୀ ରହିଛି ।
