ରବିବାର ଦିନ ଜନତା କର୍ଫ୍ୟୁ ପାଳନ କରି କରୋନା କବଳରୁ ଦେଶକୁ ସୁରକ୍ଷିତ ରଖିବା : ବିଜେପି

 – ଆତଙ୍କିତ ନହୋଇ  କୋଭିଡ-୧୯ ମୁକାବିଲା ଲାଗି ସମସ୍ତେ ଏକତ୍ରିତ ହୋଇ କାର୍ଯ୍ୟ କରିବା

ଭୁବନେଶ୍ୱର –  ସାରା ବିଶ୍ୱରେ କରୋନା ଆତଙ୍କ ସୃଷ୍ଟି କରିଛି । ଏହି ମହାମାରୀର ମୁକାବିଲା କରିବା ଲାଗି କେନ୍ଦ୍ରସରକାର ଏବଂ ରାଜ୍ୟସରକାର ବିଭିନ୍ନ ପଦକ୍ଷେପ ଗ୍ରହଣ କରିଛନ୍ତି । ଏହା ସହ ଆମେ ଏହି ମହାମାରୀକୁ ନିରାକରଣ କରିବାକୁ ହେଲେ ଆମକୁ ସଂଯମ ଓ ସଂକଳ୍ପର ଆବଶ୍ୟକତା ରହିଛି ।ଅନ୍ୟପକ୍ଷରେ ରବିବାର ଦିନ ଜନତା କଫ୍ୟୁ ପାଳନ ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଇଥିବା ଆହ୍ୱାନକୁ  ଗ୍ରହଣ କରିବାକୁ ରାଜ୍ୟ ସଭାପତି ଶ୍ରୀ ସମୀର ମହାନ୍ତି ଜନସାଧାରଣଙ୍କୁ ନିବେଦନ କରିଛନ୍ତି ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଆହ୍ୱାନ କ୍ରମେ ଆସନ୍ତା ୨୨ ମାର୍ଚ୍ଚ ରବିବାର ଦିନ ସକାଳ ୭ଟା ଠାରୁ ରାତି ୯ଟା ପର୍ଯ୍ୟନ୍ତ ‘ଜନତା କର୍ଫ୍ୟୁ’ ପାଳନ କରାଯିବ । ଏହି ଦିନ ପ୍ରତି ନାଗରିକ ନିଜ ଘର ଭିତରେ ରହିବା ପାଇଁ ପ୍ରଧାନମନ୍ତ୍ରୀ ଅନୁରୋଧ କରିଛନ୍ତି । ଆସନ୍ତା ରବିବାର ଦିନ ‘ଜନତା କର୍ଫ୍ୟୁ’ ପାଳନ କରି କରୋନା କବଳରୁ ଦେଶକୁ ଏବଂ ରାଜ୍ୟକୁ ସୁରକ୍ଷିତ ରଖିବା । ରବିବାର ଦିନ ଆମେ ସମସ୍ତେ ଘରେ ରହି ଜରୁରୀ ସେବାରେ ନିୟୋଜିତ ଥିବା ଲୋକମାନଙ୍କୁ ସଂଧ୍ୟା ୫ଟାରେ ନିଜ ନିଜ ଘର ଦ୍ୱାର କିମ୍ବା ବାଲକୋନିରେ ଛିଡ଼ା ହୋଇ ୫ ମିନିଟ ପର୍ଯ୍ୟନ୍ତ ତାଳି ମାରି କିମ୍ବା ଘଂଟି ବଜାଇ ସେମାନଙ୍କୁ ଧନ୍ୟବାଦ ଓ କୃତଜ୍ଞତା ଜଣାଇବା । ସେହିପରି ଏନସିସି, ଏନଏସଏସ, ନାଗରିକ ସମାଜ ଭଳି ସଂଗଠନକୁ ଜନତା କର୍ଫ୍ୟୁ ସମ୍ପର୍କରେ ସଚେତନତା ସୃଷ୍ଟି କରିବା ସହ ଅତିକମରେ ୧୦ ଜଣ ଲେଖାଏଁ ଲୋକଙ୍କୁ ଫୋନରେ ଜନତା କର୍ଫ୍ୟୁ ପାଳନ କରିବା ଲାଗି ସୂଚନା ଦେବାକୁ ଶ୍ରୀ ମହାନ୍ତି କହିଛନ୍ତି ।

ଶ୍ରୀ ମହାନ୍ତି କହିଛନ୍ତି ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅନୁରୋଧ କ୍ରମେ କରୋନା ସଂକ୍ରମଣକୁ ରୋକିବା ପାଇଁ “ଆମେ ସୁସ୍ଥ ରହିଲେ ବିଶ୍ୱ ସୁସ୍ଥ ରହିବ” ମନ୍ତ୍ର ପାଳନ କରିବା । ଆମକୁ ସର୍ତକ ଏବଂ ସଚେତନ ହୋଇ କରୋନା ବିରୁଦ୍ଧରେ ଲଢେଇ କରିବା । ଏହା ସହ ସାମାଜିକ ଦୂରତା’ ବା ସୋସିଆଲ ଡିଷ୍ଟାନ୍ସିଂ ନିୟମ ପାଳନ କରିବା । ଅତି ଜରୁରି ହେଲେ ଘରୁ ବାହାରିବା ନଚେତ୍ ଘରେ ଥାଇ କାମ କରିବା, ଅଯଥା ଯାତ୍ରା ନକରିବା, ୬୦ ବର୍ଷରୁ ଊର୍ଦ୍ଧ୍ୱ ବୟସର ଲୋକମାନେ ଆଗାମୀ କିଛି ସପ୍ତାହ ଘରୁ ନବାହାରିବା, ନିୟମିତ ସ୍ୱାସ୍ଥ୍ୟ ପରୀକ୍ଷାର ଆବଶ୍ୟକ ନଥିଲେ ମେଡିକାଲ ଠାରୁ ଦୂରରେ ରହିବା, ଅତି ଆବଶ୍ୟକ ନଥିଲେ ଅସ୍ତ୍ରୋପଚାର ନକରିବା, ଜରୁରୀ ସମାଗ୍ରୀ ମହଜୁଦ ନରଖିବା ଏବଂ ଗୁଜବ ଓ ଭୂଲ ସୂଚନାକୁ ବିଶ୍ୱାସ ନକରି କରୋନାର ମୁକାବିଲା କରିବା ପାଇଁ ସର୍ତକତା ଓ ସ୍ୱଚ୍ଛତା ଅବଲମ୍ବନ କରିବାକୁ ଶ୍ରୀ ମହାନ୍ତି ରାଜ୍ୟବାସୀଙ୍କୁ ଅନୁରୋଧ କରିଛନ୍ତି ।

ଖାଦ୍ୟ, କ୍ଷୀର, ଔଷଧ ଆଦି ନିତ୍ୟାବଶ୍ୟକ ଜରୁରି ସାମଗ୍ରୀର ଅଭାବ ହେବ ନାହିଁ ଏବଂ ଏ ଦିଗରେ ଯଥେଷ୍ଟ ପଦକ୍ଷେପ ନିଆଯିବ ବୋଲି ପ୍ରଧାନମନ୍ତ୍ରୀ ଦେଶବାସୀଙ୍କୁ ଆଶ୍ୱାସନା ଦେଇଛନ୍ତି । ଏଣୁ ଆମେ ଆତଙ୍କିତ ନହୋଇ  କୋଭିଡ-୧୯ ମୁକାବିଲା ଲାଗି ସମସ୍ତେ ଏକତ୍ରିତ ହୋଇ କାର୍ଯ୍ୟ କରିବା ଲାଗି ଶ୍ରୀ ମହାନ୍ତି ରାଜ୍ୟବାସୀଙ୍କୁ ଆହ୍ୱାନ ଦେଇଛନ୍ତି ।

ଏଭଳି ସଂକଟ ସମୟରେ କାର୍ଯ୍ୟରତ ନିମ୍ନ ଆୟ ବର୍ଗର ଲୋକମାନଙ୍କ ଦରମା କାଟ୍ ନକରିବାକୁ ସମସ୍ତ ବ୍ୟବସାୟୀ ଓ ଉଚ୍ଚ ଆୟ ବର୍ଗର ଲୋକମାନଙ୍କୁ ଶ୍ରୀ ମହାନ୍ତି ଅନୁରୋଧ କରିଛନ୍ତି ।

ଭୟାଭୟ ଓ ମାରାତ୍ମକ କରୋନା ରୋଗକୁ ପ୍ରତିହିତ କରିବା ଦିଗରେ ସମସ୍ତ ମନ୍ଦିର, ମସଜିଦ୍‌, ଚର୍ଚ୍ଚ ଆଦି ଧାର୍ମକ ଅନୁଷ୍ଠାନ; ବସ୍ ସଂଘ, ଅଟୋ ସଂଘ, ବ୍ୟବସାୟୀ ସଂଘ ଓ ବିଭିନ୍ନ ଗଣ ସଂଗଠନ ସମେତ ସମଗ୍ର ରାଜ୍ୟବାସୀଙ୍କୁ ଏହି ‘ଜନତା କର୍ଫ୍ୟୁ’ ରେ ସାମିଲ ହୋଇ ନିଜ ନାଗରିକ ଦାୟୀତ୍ୱ ପାଳନ କରିବାକୁ ଶ୍ରୀ ମହାନ୍ତି ନିବେଦନ କରିଛନ୍ତି ।

ଏହି ଅବସରରେ ବିରୋଧୀ ଦଳ ନେତା ଶ୍ରୀ ପ୍ରଦୀପ୍ତ କୁମାର ନାଏକ ଏବଂ ରାଜ୍ୟ ମୁଖପାତ୍ର ଶ୍ରୀ ଗୋଲକ ମହାପାତ୍ର ଉପସ୍ଥିତ ଥିଲେ ।