ଖୋର୍ଦ୍ଧା– ଖୋର୍ଦ୍ଧା ଦଳେଇପୁଟ ଛକ ନିକଟରେ ଏକ ଗୋରୁ ବୋଝେଇ କଂଟେନରକୁ ସ୍ଥାନୀୟ ଲୋକେ ଅଟକ ରଖି ପୋଲିସର ଜିମା ଦେଇଛନ୍ତି ।
ଆଜି ସକାଳେ ଏହି କଂଟେନର ଯୋଗେ ବେଆଇନ ଭାବେ ଗୋରୁ ଚାଲାଣ କରାଯାଉଥିବା ସ୍ଥାନୀୟ ଲୋକେ ଦେଖିବାକୁ ପାଇଥିଲେ । ଏହାପରେ ଲୋକମାନେ କଂଟେନରକୁ ଅଟକାଇ ଖୋର୍ଦ୍ଧା ସଦର ଥାନା ପୋଲିସକୁ ଖବର ଦେଇଥିଲେ । ପୋଲିସ ଘଟଣାସ୍ଥଳରେ ପହଂଚି କଂଟେନରଟିକୁ ଜବତ କରିବା ସହ ଗୋରୁମାନଙ୍କୁ ଉଦ୍ଧାର କରିଥିଲା । ତେବେ ଉଦ୍ଧାର ସମୟରେ ବହୁ ଗୋରୁ ଶ୍ୱାସରୁଦ୍ଧ ଅବସ୍ଥାରେ ଥିବା ଏବଂ ତନ୍ମଧ୍ୟରୁ କେତେକ ଅଚେତ୍ ହୋଇପଡିଥିବା ଦେଖିବାକୁ ମିଳିଥିଲା । ଏଥିସହ ଦୁଇଟି ଗୋରୁଙ୍କ ମୃତ୍ୟୁ ଘଟିଥିଲା । ଅସୁସ୍ଥ ଗୋରୁଙ୍କୁ ଉଦ୍ଧାର ପରେ ସେମାନଙ୍କର ଚିକିତ୍ସା କରାଯାଇଛି । ପ୍ରତ୍ୟେହ ୧୬ ନଂ ଜାତୀୟ ରାଜପଥରେ ଅନୁରୂପ ଢ଼ଙ୍ଗରେ ଗୋରୁ ଚାଲାଣ ଚାଲିଥିବା ବେଳେ ପୋଲିସ ପାଟ୍ରୋଲିଂକୁ କଡ଼ାକଡ଼ି କରିବା ସହ ଏହାକୁ ରୋକିବା ଦିଗରେ ପଦକ୍ଷେପ ଗ୍ରହଣ କରିବାକୁ ସାଧାରଣରେ ଦାବି ହେଉଛି ।
