କେନ୍ଦୁଝର- ପୁତୁରାର ଠେଙ୍ଗା ମାଡ଼ରେ ପିଉସୀର ମୃତ୍ୟୁ ଘଟିଛି । କେନ୍ଦୁଝର ଜିଲ୍ଲା ବାଂଶପାଳ ବ୍ଲକ୍ ନୟାହାଟ ଥାନା ଅନ୍ତର୍ଗତ କଲଣ୍ଡା ଗ୍ରାମରେ ଘଟିଯାଇଛି ଏଭଳି ଏକ ଅଭାବନୀୟ ଘଟଣା । ମୃତ ମହିଳାଙ୍କ ନାମ ରାଇବାରୀ ଦେହୁରୀ । ଅଭିଯୁକ୍ତ ପୁତୁରାର ନାମ ଶ୍ରୀକାନ୍ତ ଦେହୁରୀ । ଘଟଣାରେ ପୋଲିସ ଅଭିଯୁକ୍ତ ପୁତୁରାକୁ ଗିରଫ କରିଛି ।
ସୂଚନା ଅନୁଯାୟୀ, ରାଇବାରୀ ତାଙ୍କ ଘର ପାଖରେ ଏକ ବଗିଚା କରିଥିଲେ । ହେଲେ ଅନେକ ସମୟରେ ପୁତୁରା ଶ୍ରୀକାନ୍ତଙ୍କ ଛେଳି ତାଙ୍କ ବଗିଚାରେ ପଶି ଗଛସବୁ ଖାଇ ଦେଉଥିଲେ । ଏହାକୁ କେନ୍ଦ୍ର କରି ଅନେକ ସମୟରେ ପିଉସୀ ଓ ପୁତୁରାଙ୍କ ମଧ୍ୟରେ ଝଗଡ଼ା ହେଉଥିଲା । ଗତକାଲି ଅପରାହ୍ନରେ ଶ୍ରୀକାନ୍ତଙ୍କ ଛେଳି ରାଇବାରୀଙ୍କ ବଗିଚାରେ ପଶି ଫସଲ ନଷ୍ଟ କରିଥିଲା । ଏହାକୁ ନେଇ ରାଇବାରୀ ଶ୍ରୀକାନ୍ତଙ୍କୁ ଗାଳି କରିଥିଲେ । ଏଥିରେ ଉତକ୍ଷିପ୍ତ ହୋଇ ରାଇବାରୀ ଧରିଥିବା ଠେଙ୍ଗାକୁ ଛଡ଼ାଇ ଆଣି ଶ୍ରୀକାନ୍ତ ତାଙ୍କ ଉପରେ ଆକ୍ରମଣ କରିଥିଲା । ଗୁରୁତର ଅବସ୍ଥାରେ ରାଇବାରୀଙ୍କୁ ପରିବାର ଲୋକେ ବାଂଶପାଳ ମେଡିକାଲରେ ଭର୍ତି କରିଥିଲେ । ହେଲେ ସେଠାରେ ଚିକିତ୍ସାଧିନ ଅବସ୍ଥାରେ ତାଙ୍କର ମୃତ୍ୟୁ ଘଟିଥିଲା । ପୋଲିସ ମୃତ ମହିଳାଙ୍କ ଶବ ଜବତ କରି ବ୍ୟବଚ୍ଛେଦ ନିମନ୍ତେ ପଠାଇଛି । ଏ ସଂକ୍ରାନ୍ତରେ ଏକ ହତ୍ୟା ମାମଲା ରୁଜ୍ଜୁ କରି ତଦନ୍ତ ଚଳାଇଛି । ଘଟଣାରେ ଅଭିଯୁକ୍ତ ପୁତୁରାକୁ ପୋଲିସ ଗିରଫ କରିଛି ।
