ଭୁବନେଶ୍ୱର – ଗୃହପାଳିତ ପଶୁଙ୍କ ଠାରୁ କରୋନା ବ୍ୟାପେ ନାହିଁ । ତେଣୁ ଗୃହାପାଳିତ ପଶୁ ମାନଙ୍କୁ ନ ଛାଡିବାକୁ ମତ୍ସ୍ୟ ଓ ପଶୁ ସମ୍ପଦ ବିଭାଗ ପକ୍ଷରୁ ଲୋକ ମାନଙ୍କୁ ଅପିଲ କରା ଯାଇଛିା ସେହିପରି ଏ ସମ୍ପର୍କରେ ବ୍ୟାପକ ପ୍ରଚାର ପ୍ରସାର କରିବା ପାଇଁ ବିଭାଗର କମିଶନର ସମସ୍ତ ଭେଟେନାରୀ ଅଫିସର ମାନଙ୍କୁ ପତ୍ର ଲେଖିଛନ୍ତି ।
ଏହି ପତ୍ରରେ ସେ କହିଛନ୍ତି ଯେ କରୋନା ଭୟରେ ଗୃହପାଳିତ ପଶୁ ମାନଙ୍କୁ ଛାଡି ଦେବା ସମ୍ପର୍କିତ ଖବର ସାମନାକୁ ଆସିଛି । ତେବେ ବିଶ୍ୱ ସ୍ୱାସ୍ଥ୍ୟ ସଂଗଠନ କହିବା ଅନୁସାରେ ଏହି ରୋଗ ମଣିଷ ଠାରୁ ମଣିଷକୁ ବ୍ୟାପୁଛି । ପଶୁ ଠାରୁ ମଣିଷକୁ ବ୍ୟାପୁଥିବାର କୌଣସି ପ୍ରମାଣ ନାହିଁ । ଏଭଳି ପରିସ୍ଥିତିରେ ଗୃହପାଳିତ ପଶୁ ମାନଙ୍କ ସହ ଏପରି ବ୍ୟବହାର ଉଚିତ ନୁହେଁ । ତେଣୁ ଏ ସମ୍ପର୍କରେ ଲୋକ ମାନଙ୍କ ମଧ୍ୟରେ ସଚେତନତା ସୃଷ୍ଟି କରିବାକୁ ଏହି ପତ୍ରରେ କୁହାଯାଇଛି ।
