ଅନୁଗୋଳ– ଅନୁଗୋଳ ଜିଲ୍ଲା ସାତକୋଶିଆ ଅଭୟାରଣ୍ୟ ଅନ୍ତର୍ଗତ ବହାମୁଣ୍ଡା ସେକ୍ସନରେ ଏକ ମାଈ ହାତୀର ମୃତ୍ୟୁ ଘଟିଛି । ହାତୀଟିର ବୟସ ଆନୁମାନିକ ୧୫ରୁ ୨୦ ବର୍ଷ ହେବ । କିଛି ଦିନ ପୂର୍ବରୁ ହାତୀଟି ଅନୁଗୋଳ ଡ଼ିଭିଜନରୁ ସାତକୋଶିଆରେ ପ୍ରବେଶ କରିଥିବା ବେଳେ ଅସୁସ୍ଥ ଥିବା ଜଣାପଡିଥିଲା । ହାତୀଟିକୁ ଠାବ କରି ଚିକିତ୍ସା କରିବା ନିମନ୍ତେ ବନ ବିଭାଗ ଉଦ୍ୟମ କରିଥିଲେ ସୁଦ୍ଧା ସେଥିରେ ସଫଳ ହୋଇପାରିନଥିଲା ।
ଗତକାଲି ବନ ବିଭାଗ ପାଟ୍ରୋଲିଂ ଟିମ୍ ଅସୁସ୍ଥ ହାତୀକୁ ଠାବ କରି ଚିକିତ୍ସା କରିଥିଲେ ମଧ୍ୟ ହାତୀଟିର ମୃତ୍ୟୁ ଘଟିଥିଲା । ହାତୀଟିର ତଳିପେଟରେ ଏକ ପୁରୁଣା କ୍ଷତ ଥିବା ବେଳେ ସେପ୍ଟିସେମିଆ ହୋଇ ତାର ମୃତ୍ୟୁ ଘଟିଥିବା ନେଇ ସାତକୋଶିଆ ପ୍ରାଣୀ ଚିକିତ୍ସକ ପ୍ରାଥମିକ ରିପୋର୍ଟରେ ଦର୍ଶାଇଛନ୍ତି । ଏନେଇ ସାତକୋଶିଆ ଡ଼ିଏଫଓ ରାମାସ୍ୱାମୀ ପି. ସୂଚନା ଦେଇଛନ୍ତି । ଅନ୍ୟପକ୍ଷରେ ବ୍ୟବଚ୍ଛେଦ ରିପୋର୍ଟ ଆସିବା ପରେ ହାତୀ ମୃତ୍ୟୁର ପ୍ରକୃତ କାରଣ ଜଣାପଡିବ ବୋଲି ଡ଼ିଏଫଓ ସୂଚନା ଦେଇଛନ୍ତି ।
