ଭବାନୀପାଟଣା – କଳାହାଣ୍ଡି ଜିଲ୍ଲା ମଦନପୁର ରାମପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଜଣେ ମହିଳାଙ୍କ ମୁଣ୍ଡରେ ସିମେଂଟ ଖଣ୍ଡ ଖସି ପଡିଛି । ଫଳରେ ସେ ଗୁରୁତର ହୋଇପଡିଛନ୍ତି । ସମ୍ପ୍ରତି ସେ ମେଡିକାଲରେ ଚିକିତ୍ସାଧିନ ଅଛନ୍ତି । ତାଙ୍କ ନାଁ ନିଳାଦ୍ରୀ ସୁନା । ଘର ଆମ୍ବ ଗାଁରେ । ପ୍ରାପ୍ତ ସୂଚନା ମୁତାବକ, ନିଳାଦ୍ରୀଙ୍କ ପୁଅ ଦେହ ଅସୁସ୍ଥ ଥିଲା । ସେଥିପାଇଁ ସେ ଆଜି ଡାକ୍ତର ଦେଖାଇବା ପାଇଁ ମଦନପୁର ରାମପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ଆସିଥିଲେ । ଡାକ୍ତରଖାନା ଭିତରେ ଡାକ୍ତରଙ୍କୁ ଅପେକ୍ଷା କରିଥିବା ବେଳେ ଛାତରୁ ଏକ ସିମେଂଟ ଖଣ୍ଡ ଖସି ତାଙ୍କ ତାଙ୍କ ମୁଣ୍ଡ ଉପରେ ପଡିଥିଲା । ପ୍ରବଳ ରକ୍ତସ୍ରାବ ଯୋଗୁଁ ମହିଳା ଜଣକ ଗୁରୁତର ହୋଇପଡିଥିଲେ । ଡାକ୍ତର ମାନେ ତୁରନ୍ତ ତାଙ୍କର ଚିକିତ୍ସା କରିଥିଲେ । ନିଳାଦ୍ରୀଙ୍କ ମୁଣ୍ଡରେ ତିନୋଟି ଷ୍ଟିଚ୍ ପଡିଥିଲା ।
ଅନ୍ୟପକ୍ଷରେ ଏପରି ଅଘଟଣ ପାଇଁ ଜନସାଧାରଣ ପ୍ରଶାସନର ଅପାରଗତାକୁ ଦାୟୀ କରିଛନ୍ତି । ମେଡିକାଲ ଛାତର ରକ୍ଷଣା ବେକ୍ଷଣା ଓ ବିପଦସଙ୍କୁଳ ଅବସ୍ଥାରେ ଥିବା ସ୍ଥାନର ମରାମତି ହେଉନଥିବାରୁ ଆଜି ଏଭଳି ସ୍ଥିତି ଉପୁଜି ଥିବା ସେମାନେ ଅଭିଯୋଗ କରିଛନ୍ତି ।
