କଟକ– ଗୁରୁବାର ନିଆଳି ଅଂଚଳର କସର୍ଦ୍ଦା ମେଲଣ ଯାତ୍ରା ଚାଲିଥିବା ବେଳେ ବିଳମ୍ବିତ ରାତିରେ ଜଣେ ଦିବ୍ୟାଙ୍ଗ ନାବାଳିକା ଦୁଷ୍କର୍ମର ଶିକାର ହୋଇଥିବା ଅଭିଯୋଗ ହୋଇଛି । ପୀଡ଼ିତା ନାବାଳିକାଙ୍କ ଅଭିଯୋଗକୁ ଭିତି କରି ନିଆଳି ପୋଲିସ ଏ ସଂକ୍ରାନ୍ତରେ ଏକ ମାମଲା ରୁଜ୍ଜୁ କରିବା ସହ ଘଟଣାରେ ଅଭିଯୁକ୍ତ ଯୁବକକୁ ଗିରଫ କରି କୋର୍ଟଚାଲାଣ କରିଛି ।
ଅଭିଯୋଗ ଅନୁସାରେ, ମେଲଣ ଚାଲିଥିବା ବେଳେ ରାତି ପ୍ରାୟ ୩ଟା ସମୟରେ ଦିବ୍ୟାଙ୍ଗ ନାବାଳିକାଙ୍କୁ ଟଙ୍କାର ପ୍ରଲୋଭନ ଦେଖାଇ କସର୍ଦ୍ଦା ଫାଣ୍ଡି ଅଧିନ ପତ୍ରକଣା ଗ୍ରାମର ଜଣେ ଯୁବକ ପ୍ରଥମେ ତାଙ୍କୁ ଡ଼ାକିଥିଲେ । ନାବାଳିକା ଜଣକ ତାଙ୍କ ନିକଟକୁ ଆସିବା କ୍ଷଣି ଅଭିଯୁକ୍ତ ତାଙ୍କ ମୁହଁରେ ଗାମୁଛା ବାନ୍ଧି ବଳପୂର୍ବକ ତାଙ୍କୁ ସେଠାରୁ ନିକଟସ୍ଥ ଏକ ଅନ୍ଧାରୁଆ ସ୍ଥାନକୁ ଉଠାଇ ନେଇ ଦୁଷ୍କର୍ମ କରିଥିବା ଅଭିଯୋଗ ହୋଇଛି । କେବଳ ସେତିକି ନୁହେଁ ଅଭିଯୁକ୍ତର ମାଡ଼ରେ ନାବାଳିକାଙ୍କ ମୁହଁ ଓ ଆଖିରେ ଆଘାତ ଲାଗିଛି । ତେବେ ନାବାଳିକାଙ୍କ ଚିତ୍କାର ଶୁଣି ସ୍ଥାନୀୟ ଲୋକେ ତାଙ୍କୁ ସେଠାରୁ ଉଦ୍ଧାର କରିଥିଲେ । ଅଭିଯୁକ୍ତକୁ ଅଟକ ରଖି ପରେ ପୋଲିସର ଜିମା ଦେଇଥିଲେ ।
