ମାଲକାନଗିରି– ଟଙ୍କା ନଦେବାରୁ ସ୍ୱାମୀ ନିଜ ସ୍ତ୍ରୀକୁ କିରୋସିନ୍ ଢାଳି ପୋଡି ମାରିବା ପାଇଁ ଉଦ୍ୟମ କରିଛି । ଏଭଳି ଅଭିଯୋଗ ଆସିଛି ମାଲକାନଗିରି ଥାନା ପେଡାକୋଣ୍ଡା ଗ୍ରାମପଂଚାୟତ ଅନ୍ତର୍ଗତ ଏମଭି ୮୭ଗ୍ରାମରେ ।
ଏମଭି ୮୭ଗ୍ରାମର ସୁମନ୍ତ ଚୌଧୁରୀ ନିଜ ସ୍ତ୍ରୀ ସୀମା ଚୌଧୁରୀଙ୍କୁ କିରୋସିନ ଢାଳି ମାରିଦେବାକୁ ଉଦ୍ୟମ କରିଥିବା ଅଭିଯୋଗ ହୋଇଛି । ଗତ ୯ ତାରିଖ ସନ୍ଧ୍ୟା ପ୍ରାୟ ୬ ଟା ବେଳେ ସ୍ୱାମୀ ସୁମନ୍ତ ସୀମାଙ୍କୁ ଟଙ୍କା ମାଗିଥିଲେ । କିନ୍ତୁ ସୀମା ଟଙ୍କା ନ ଦେବାରୁ ସେ ରାଗି ଯାଇ ନିଜ ସ୍ତ୍ରୀ ଉପରକୁ କିରୋସିନ ଢାଳି ନିଆଁ ଲଗାଇଦେଇଥିଲେ । ସୀମା ଚିତ୍କାର କରିବାରୁ ସାହି ପଡିଶା ଲୋକେ ସୀମାଙ୍କୁ ଉଦ୍ଧାର କରି ମାଲକାନଗିରି ମୁଖ୍ୟ ଡାକ୍ତରଖାନାରେ ଭର୍ତି କରିଥିଲେ । ଘଟଣା ସ୍ଥଳରେ ପୋଲିସ ପହଂଚି ଅଭିଯୁକ୍ତ ସ୍ୱାମୀକୁ ଅଟକ ରଖି ତଦନ୍ତ ଚଳାଇଛି ।
ସୂଚନା ମୁତାବକ ପ୍ରାୟ ୧୦ବର୍ଷ ପୂର୍ବେ ସୁମନ୍ତ ଚୌଧୁରୀ ସୀମାଙ୍କୁ ବିବାହ କରିଥିଲେ । ୩ବର୍ଷ ପୂର୍ବେ ସୀମାଙ୍କ ସ୍ୱାମୀ ଓ ଶାଶୁ ଉମା ଚୌଧୁରୀ ମିଶି ସୀମାଙ୍କ ଚରିତ୍ରକୁ ନେଇ ସନ୍ଦେହ କରିଥିଲେ ଓ ତାଙ୍କୁ ନିର୍ଯାତନା ଦେଇ ଆସୁଥିଲେ । ସେମାନଙ୍କ ନିର୍ଯାତନା ସହି ନ ପାରି ସୀମା ନିଜ ବାପ ଘରକୁ ଚାଲିଆସିଥିଲେ । ପ୍ରାୟ ଏକ ସପ୍ତାହ ପରେ ସୀମାଙ୍କ ଦେଢ଼ଶୂର ଆସି ସୀମାଙ୍କୁ ବୁଝାସୁଝା କରିନିଜ ଘରକୁ ନେଇଆସିଥିଲେ ।
