ଭୁବନେଶ୍ୱର, ରାଉରକେଲା। ରାଜଗାଙ୍ଗପୁର ଷ୍ଟେସନରେ ସୁପରଫାଷ୍ଟ ଟ୍ରେନ୍ ନ ଅଟକିବା ଘଟଣାରେ ରେଳବାଇ ପ୍ରଶାସନ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି । ଚକ୍ରଧରପୁର ଡିଆରଏମ କର୍ତ୍ତବ୍ୟରେ ଅବହେଳା ଅଭିଯୋଗରେ ରାଜଗାଙ୍ଗପୁର ଷ୍ଟେସନ ମାଷ୍ଟର ନିଲମ୍ବିତ କରିଥିବା ଜଣା ପଡିଛି ।
ଉଲ୍ଲେଖନୀୟ ଯେ ଗତକାଲି ପାଟନା-ବିଳାସପୁର ସାପ୍ତାହିକ ସୁପରଫାଷ୍ଟ ଟ୍ରେନ୍ ରାଜଗାଙ୍ଗପୁର ଷ୍ଟେସନରେ ଅଟକି ନ ଥିଲା। ଅପରାହ୍ନ ୨ଟା ୨୫ ମିନିଟ୍ରେ ଦ୍ରୁତ ଗତିରେ ଷ୍ଟେସନ୍ ଅତିକ୍ରମ କରି ପଳାଇଥିଲା ଟ୍ରେନ୍। ଉକ୍ତ ସମୟରେ ଶହେରୁ ଊର୍ଦ୍ଧ୍ୱ ଲୋକ ଟ୍ରେନ୍ ପାଇଁ ଅପେକ୍ଷା କରି ନିରାଶ ହୋଇଥିଲେ। ରାଜଗାଙ୍ଗପୁର ଷ୍ଟେସନରେ ଟ୍ରେନ୍ ନ ଅଟକି କିପରି ପଳାଇଥିଲା ତାକୁ ନେଇ ଚର୍ଚ୍ଚା ଆରମ୍ଭ ହୋଇଯାଇଥିଲା। ଷ୍ଟେସନ୍ ମାଷ୍ଟର କାର୍ଯ୍ୟରେ ଅବହେଳା କରିବା ଯୋଗୁ ଏପରି ହଇରାଣ ହେବାକୁ ପଡ଼ିଲା ବୋଲି ଶତାଧିକ ଯାତ୍ରୀ ରେଳ ବିଭାଗର ଉପରିସ୍ଥ ଅଧିକାରୀଙ୍କ ନିକଟରେ ଅଭିଯୋଗ କରିଥିଲେ। ଏହାର ତଦନ୍ତ ହେବା ପରେ ରାଜଗାଙ୍ଗପୁର ଷ୍ଟେସନ ମାଷ୍ଟରଙ୍କୁ ନିଲମ୍ବନ କରାଯାଇଥିବା ଜଣା ପଡିଛି ।
