ଅନୁଗୋଳ- ଅନୁଗୋଳ ଜିଲ୍ଲା ଛେଣ୍ଡିପଦା ଥାନା ଅନ୍ତର୍ଗତ ପୁରୁଣାଗଡ଼ ଗ୍ରାମରେ ଗତକାଲି ବିଳମ୍ବିତ ରାତିରେ ସଶସ୍ତ୍ର ଡ଼କାୟତି ହୋଇଛି ।ରାତି ପ୍ରାୟ ୨ଟା ସମୟରେ ୬ରୁ ୭ ଜଣ ଦୁର୍ବୃତ ଗ୍ରାମର ପ୍ରମୋଦ ମହାପାତ୍ରଙ୍କ ଘରେ ପଶିଥିଲେ । ଡ଼କାୟତ ମାନେ ଏକ ଇଲେକ୍ଟ୍ରିପୋଲ ସାହାଯ୍ୟରେ ପ୍ରଥମେ ଘରର ଛାତ ଉପରେ ଚଢ଼ିଥିଲେ । ଏହାପରେ ଛାତ ସିଡ଼ି ଘର ଦେଇ ଘର ଭିତରକୁ ପ୍ରବେଶ କରିଥିଲେ । ପ୍ରମୋଦ ଓ ତାଙ୍କ ପରିବାର ଲୋକଙ୍କୁ ଖଣ୍ଡା ଭୂଜାଲି ଆଦି ମାରଣାସ୍ତ୍ର ସହ ବନ୍ଧୁକ ଦେଖାଇ ଭୟଭିତ କରିଥିଲେ । ପ୍ରମୋଦଙ୍କ ପୁଅକୁ ପ୍ରଥମେ ଖଣ୍ଡାରେ ହାଣି କ୍ଷତାକ୍ତ କରିଥିଲେ । ପରିବାର ଲୋକଙ୍କ ଠାରୁ ମୋବାଇଲ୍ ଛଡାଇନେବା ସହ ସେମାନଙ୍କୁ ଏକ କୋଠରୀରେ ବନ୍ଦ କରି ଦେଇଥିଲେ । ପରେ ଡ଼କାୟତ ମାନେ ପ୍ରମୋଦ ତାଙ୍କ ଝିଅ ବାହାଘର ପାଇଁ ରଖିଥିବା ନଗଦ ୬ ଲକ୍ଷ ଟଙ୍କା ସହ ଲକ୍ଷାଧିକ ଟଙ୍କାର ସୁନା ଓ ରୂପା ଅଳଙ୍କାର ଲୁଟିନେଇ ଘଟଣାସ୍ଥଳରୁ ଚମ୍ପଟ୍ ମାରିଥିଲେ । ଆଜି ସକାଳେ ଏନେଇ ଥାନାରେ ଅଭିଯୋଗ ହୋଇଥିଲା । ଅଭିଯୋଗକୁ ଭିତି କରି ଛେଣ୍ଡିପଦା ପୋଲିସ ଘଟଣାସ୍ଥଳରେ ପହଂଚି ତଦନ୍ତ ଆରମ୍ଭ କରିଛି । ତେବେ ବର୍ତମାନ ସୁଦ୍ଧା ଲୁଟେରାଙ୍କ ଟେର୍ ପାଇନି ପୋଲିସ ।
