କୋରାପୁଟ- କୋରାପୁଟ ନିକଟ କୋଲାବ ନଦୀରେ ବୁଡ଼ି ତିନି ଜଣ କଲେଜ ଛାତ୍ରଙ୍କ ମୃତ୍ୟୁ ଘଟିଛି । ସମ୍ପୃକ୍ତ ତିନି ଛାତ୍ର କୋରାପୁଟ ସରକାରୀ ମହାବିଦ୍ୟାଳୟର ବୋଲି ଜଣାପଡିଛି । ମୃତକ ମାନେ ହେଲେ କମ୍ପ୍ୟୁଟର ସାଇନ୍ସ ବିଭାଗର ଛାତ୍ର ମନ୍ମଥ ସାମଲ, ସନ୍ଦିପ ପୂଜାରୀ ଏବଂ ରମାକାନ୍ତ ପଟ୍ଟନାୟକ । ମନ୍ମଥଙ୍କ ଘର କୋରାପୁଟରେ ହୋଇଥିବା ବେଳେ ସନ୍ଦିପ ଓ ରମାକାନ୍ତଙ୍କ ଘର ମାଲକାନଗିରି ଜିଲ୍ଲାରେ ବୋଲି ଜଣାପଡିଛି ।
ଜଣେ ବନ୍ଧୁଙ୍କ ଜନ୍ମଦିନ ପାଳିବାକୁ ଏମାନେ ଯାଇଥିଲେ । ଆଜି ପୂର୍ବାହ୍ନ ପ୍ରାୟ ୧୧ଟା ସମୟରେ ୭ ଜଣ ଛାତ୍ର ନଦୀ କୂଳକୁ ବୁଲିବାକୁ ଯାଇଥିବା ବେଳେ ସେମାନଙ୍କ ମଧ୍ୟରୁ ତିନି ଜଣ ଛାତ୍ର ନଦୀକୁ ଗାଧୋଇବାକୁ ଯାଇଥିଲେ । ଏହି ସମୟରେ ଗଭୀର ପାଣି ମଧ୍ୟକୁ ଗୋଡ଼ ଖସିଯିବାରୁ ସେମାନେ ପାଣିରେ ବୁଡ଼ି ଯାଇଥିଲେ । ଏହା ଦେଖି ନିକଟରେ ଉପସ୍ଥିତ ଥିବା ଅନ୍ୟ ସାଙ୍ଗମାନେ ତୁରନ୍ତ ଦମକଳବାହିନୀକୁ ଏ ସମ୍ପର୍କରେ ଖବର ଦେଇଥିଲେ । ଅଗ୍ନିଶମ କର୍ମଚାରୀ ଘଟଣାସ୍ଥଳରେ ପହଂଚି ତିନି ଛାତ୍ରଙ୍କୁ ସଂଜ୍ଞାହିନ ଅବସ୍ଥାରେ ପାଣିରୁ ଉଦ୍ଧାର କରିଥିଲେ । ତୁରନ୍ତ ତିନି ଜଣଙ୍କୁ କୋରାପୁଟ ମେଡ଼ିକାଲ କଲେଜରେ ଭର୍ତି କରାଯାଇଥିବା ବେଳେ ସେଠାରେ ଡ଼ାକ୍ତର ସେମାନଙ୍କୁ ମୃତ ଘୋଷଣା କରିଥିଲେ । ଏହି ଖବର ପ୍ରଚାରିତ ହେବା ପରେ ସମଗ୍ର ଅଂଚଳରେ ଶୋକର ଛାୟା ଖେଳିଯାଇଛି ।
