ଭୁବନେଶ୍ୱର– ସଂରକ୍ଷଣକୁ ନେଇ ସୁପ୍ରୀମକୋର୍ଟ ଦେଇଥିବା ରାୟକୁ ବିରୋଧ କରି ଭୀମ ଆର୍ମୀ ଦ୍ୱାରା ୧୨ ଘଂଟିଆ ବନ୍ଦର ପ୍ରଭାବ ରାଜ୍ୟରେ ପ୍ରାୟ ଦେଖିବାକୁ ମିଳି ନ ଥିବା ବେଳେ କିଛି ସ୍ଥାନରେ ବନ୍ଦର ପ୍ରଭାବ ଦେଖିବାକୁ ମିଳିଛି । ବନ୍ଦ ସମର୍ଥକ ମାନେ ସମ୍ବଲପୁର ଠାରେ ବିକ୍ଷୋଭ ପ୍ରଦର୍ଶନ କରିଥିବା ବେଳେ ରେଳ ଷ୍ଟେସନରେ ପୁରୀ – ସମ୍ବଲପୁର ଇଂଟରସିଟି ଟ୍ରେନକୁ ଅଟକାଇଥିବା ଜଣା ପଡିଛି । ଭୀମ ଆର୍ମୀର କର୍ମକର୍ତା ମାନେ ଇଂଟରସିଟି ଟ୍ରେନକୁ ଅଟକାଇବା କାରଣରୁ ଟ୍ରେନ ପାଖାପାଖି ଏକ ଘଂଟା ବିଳମ୍ବରେ ଚାଲିଥିଲା । ସେହିପରି ବନ୍ଦ ସମର୍ଥକ ମାନେ ବଲାଙ୍ଗୀର ଠାରେ ମଧ୍ୟ ବିକ୍ଷୋଭ ପ୍ରଦର୍ଶନ କରିଛନ୍ତି । ଝାରସୁଗୁଡା ଠାରେ ମଧ୍ୟ ବନ୍ଦ ସମର୍ଥକ ମାନେ ବିକ୍ଷୋଭ ପ୍ରଦର୍ଶନ କରିଥିବା ଜଣା ପଡିଛି ।
