ମୋହନା- ଗଜପତି ଜିଲ୍ଲା ଅଡ଼ବା ଥାନା ଅନ୍ତର୍ଗତ ନରଣପୁର ଗ୍ରାମ ନିକଟରେ ଗତକାଲି ବିଳମ୍ବିତ ରାତିରେ ଏକ ବାଇକ୍ ଭାରସାମ୍ୟ ହରାଇ ରାସ୍ତାପାଶ୍ୱର୍ ନାଳକୁ ଖସିପଡିବା ଫଳରେ ଜଣେ ଯୁବକଙ୍କ ମୃତ୍ୟୁ ଘଟିଛି । ଏଥିସହ ଦୁଇ ଜଣ ଆହତ ହୋଇଛନ୍ତି । ତନ୍ମଧ୍ୟରୁ ଜଣକର ସ୍ୱାସ୍ଥ୍ୟାବସ୍ଥା ଗୁରୁତର ରହିଛି । ତାଙ୍କୁ ଅଧିକ ଚିକିତ୍ସା ନିମନ୍ତେ ବ୍ରହ୍ମପୁର ବଡ଼ ମେଡିକାଲକୁ ସ୍ଥାନାନ୍ତରିତ କରାଯାଇଛି । ମୃତକଙ୍କ ନାମ ପିଟର ନାୟକ । ତାଙ୍କ ଘର ଆମ୍ବ ଗାଁରେ । ଆହତ ଦ୍ୱୟ ହେଲେ ଧର୍ମେନ୍ଦ୍ର ନାୟକ ଓ ହେନେରୀ ନାୟକ । ଉଭୟଙ୍କ ଘର କାଲିମା ଗାଁରେ । ଏମାନେ ସମସ୍ତେ ସାଙ୍ଗ ଥିଲେ ।
ରାତି ପ୍ରାୟ ୨ ଟା ସମୟରେ ତିନି ଜଣ ସାଙ୍ଗ ଏକ ବାଇକ୍ ଯୋଗେ କାଲିମାରୁ ପଦାଗାଁ ଅଭିମୁଖେ ଯାଉଥିଲେ । ଏହି ସମୟରେ ନରଣପୁର ଗାଁ ନିକଟରେ ଥିବା ବୁଲାଣିଆ ରାସ୍ତାରେ ବାଇକ୍ ଟି ଭାରସାମ୍ୟ ହରାଇ ରାସ୍ତା କଡ଼ରେ ଥିବା ନାଳ ମଧ୍ୟକୁ ଖସି ପଡିଥିଲା । ଏହାପରେ ହେନେରୀ ତାଙ୍କ ଗ୍ରାମର ଜଣେ ଅଟୋ ଡ଼୍ରାଇଭରଙ୍କୁ ଫୋନ୍ କରି ଘଟଣା ସମ୍ପର୍କରେ ଜଣାଇଥିଲେ । ଅଟୋ ଡ଼୍ରାଇଭର ଘଟଣାସ୍ଥଳରେ ପହଂଚି ସେମାନଙ୍କୁ ଉଦ୍ଧାର କରି ମୋହନା ଡ଼ାକ୍ତରଖାନାରେ ଭର୍ତି କରିଥିଲେ । ତେବେ ସେଠାରେ ପିଟରଙ୍କୁ ଡ଼ାକ୍ତର ମୃତ ଘୋଷଣା କରିଥିଲେ । ସେହିପରି ଧର୍ମେନ୍ଦ୍ରଙ୍କ ସ୍ୱାସ୍ଥ୍ୟାବସ୍ଥା ଗୁରୁତର ହେବାରୁ ଅଧିକ ଚିକିତ୍ସା ନିମନ୍ତେ ତାଙ୍କୁ ବ୍ରହ୍ମପୁର ବଡ଼ ମେଡିକାଲକୁ ସ୍ଥାନାନ୍ତରିତ କରାଯାଇଛି । ଅଡ଼ବା ପୋଲିସ ମୃତକଙ୍କ ଶବ ଜବତ କରି ବ୍ୟବଚ୍ଛେଦ ନିମନ୍ତେ ପଠାଇବା ସହ ଘଟଣାର ତଦନ୍ତ ଚଳାଇଛି ।
