ଚେନ୍ନାଇ- ଗୁରୁବାର ପ୍ରତ୍ୟୁଷରେ ତାମିଲନାଡୁର ତିରୁପୁର ଜିଲ୍ଲାରେ ଏକ ଯାତ୍ରୀବାହୀ ବସ୍ ଦୁର୍ଘଟଣାରେ୧୯ ଜଣରୁ ଅଧିକ ବ୍ୟକ୍ତିଙ୍କର ମୃତ୍ୟୁ ଘଟିଥିବା ବେଳେ ପ୍ରାୟ ୧୫ ଜଣ ଆହତ ହୋଇଛନ୍ତି । ରାତି ପ୍ରାୟ ୩ଟା ବେଳେ ବସ୍ ଟିକୁ ଏକ ଟ୍ରକ୍ ଧକ୍କାଦେବା ଫଳରେ ଏହି ଦୁର୍ଘଟଣା ଘଟିଥିଲା । ମୃତକଙ୍କ ମଧ୍ୟରେ ୧୪ ଜଣ ପୁରୁଷ ଏବଂ ୫ ଜଣ ମହିଳା ଅଛନ୍ତି ।
ସୂଚନା ଅନୁଯାୟୀ କେରଳ ରାଜ୍ୟ ସଡ଼କ ପରିବହନ ନିଗମର କେରଳ ରାଜ୍ୟ ସରକାରଙ୍କର ଏହି ଭୋଲଭୋ ବସ୍ ଟି କର୍ଣ୍ଣାଟକର ବେଙ୍ଗାଲୁରୁ ରୁ କେରଳର ଏର୍ଣ୍ଣାକୁଲମ୍ ଅଭିମୁଖେ ଯାତ୍ରା କରୁଥିଲା । ଏଥିରେ ପ୍ରାୟ ୪୮ଜଣ ବ୍ୟକ୍ତି ଥିଲେ । ଗୁରୁବାର ରାତି ୩ଟା ବେଳେ ତାମିଲନାଡୁର ତିରୁପୁର ନିକଟ ଅବିନାଶୀ ସହରରେ ଏକ କେଂଟନର୍ ଟ୍ରକ୍ ସହ ଧକ୍କା ଖାଇଥିଲା । ଫଳରେ ପ୍ରାୟ ୧୯ଜଣଙ୍କର ମୃତ୍ୟୁ ଘଟିଛି ।
କେରଳ ରାଜ୍ୟ ସଡ଼କ ପରିବହନ କର୍ପୋରେସନ୍ ର ପରିଚାଳନା ନିର୍ଦେଶକଙ୍କୁ ରାଜ୍ୟ ସରକାର ଘଟଣାସ୍ଥଳକୁ ପଠାଇଛନ୍ତି । ରାଜ୍ୟ ପରିବହନ ମନ୍ତ୍ରୀ ଏ କେ ଶଶୀନ୍ଦ୍ରନ୍ କହିଛନ୍ତି ଯେ ସମସ୍ତ ଆହତଙ୍କୁ କେରଳ ଅଣାଯିବ । ସରକାର ସେମାନଙ୍କ ଚିକିତ୍ସା ଖର୍ଚ୍ଚ ବହନ କରିବେ ।
