ଗଞ୍ଜାମ- ହିଞ୍ଜିଳିକାଟୁ ଥାନା ଅନ୍ତର୍ଗତ ଶାସନ ଆମ୍ବ ଗାଁ ସାପୁଆ ପୋଖରୀରୁ ଗତକାଲି ରାତିରେ ଜଣେ ବୃଦ୍ଧଙ୍କ ମୃତଦେହକୁ ପୁଲିସ ଜବତ କରିଛି । ମୃତ ବ୍ୟକ୍ତିଜଣକ ହେଲେ ଦୟାପଲ୍ଲୀ ଗ୍ରାମର ମୋଚିରାମ ଦାସ(୬୨) । ଏ ସମ୍ପର୍କରେ ପୁଲି ୪/୨୦ରେ ଏକ ଅପମୃତ୍ୟୁ ମାମଲା ରୁଜୁ କରିଛି । ସେ ପୋଖରୀରେ ବୁଡ଼ି ମରିଛନ୍ତି ନା ତାଙ୍କୁ କେହି ପୋଖରୀକୁ ଠେଲି ମାରିଛି ଏ ଘଟଣାକୁ ନେଇ ସନ୍ଦେହ ସୃଷ୍ଟି ହୋଇଛି ।
ଗୁରୁବାର ସନ୍ଧ୍ୟାରେ ବୃଦ୍ଧଙ୍କ ସହ ମଦ ପିଇବାକୁ କେନ୍ଦ୍ରକରି ଗ୍ରାମର କିଛି ବ୍ୟକ୍ତିଙ୍କ ସହ ଗଣ୍ଡଗୋଳ ହୋଇଥିଲା । କେହି ହିଂସାପରାୟଣ ହୋଇ ହତ୍ୟା କରିବା ପରେ ପୋଖରୀ ମଧ୍ୟକୁ ଠେଲି ଦେଇଥିବା ସନ୍ଦେହ କରାଯାଉଛି । ତେବେ ଗତକାଲି ସନ୍ଧ୍ୟାରେ ଶବଟି ପୋଖରୀରେ ଭାସିବା ପରେ ଲୋକେ ପୋଲିସକୁ ଜଣାଇଥିଲେ । ହିଞ୍ଜିଳି ପୋଲିସ ଆଜି ସକାଳେ ଶବଟିକୁ ବ୍ରହ୍ମପୁର ବଡ଼ ଡାକ୍ତରଖାନାରେ ବ୍ୟବଚ୍ଛେଦ କରାଇ ପରିବାର ଲୋକଙ୍କୁ ହସ୍ତାନ୍ତର କରିବା ସହ ଘଟଣାର ତଦନ୍ତ କରୁଛି ।
