-
ସଡ଼କ ନିରାପତ୍ତା, ଇ-ଚାଲାନ କାର୍ୟ୍ୟକାରିତା ଏବଂ ଦଳଗତ କାର୍ୟ୍ୟ ଉପରେ ପରାମର୍ଶ
ଭୁବନେଶ୍ବର,ବାଣିଜ୍ୟ ଓ ପରିବହନ ବିଭାଗର ପ୍ରମୁଖ ଶାସନ ସଚିବ ଶ୍ରୀମତୀ ଉଷା ପାଢ଼ୀ ଆଜି ରାଜ୍ୟ ପରିବହନ କର୍ତ୍ତୃପକ୍ଷ (ଏସଟିଏ) ପରିଦର୍ଶନ କରି ପରିବହନ ବିଭାଗ ଅଧୀନରେ ଚାଲିଥିବା ବିଭିନ୍ନ ପଦକ୍ଷେପର କାର୍ୟ୍ୟକାରିତା ସମୀକ୍ଷା କରିଥିଲେ।
ପରିଦର୍ଶନ ସମୟରେ, ଶ୍ରୀମତୀ ପାଢ଼ୀ କର୍ତ୍ତୃପକ୍ଷ ଅଧିକାରୀ ଓ କର୍ମଚାରୀଙ୍କ ସହ ବିସ୍ତୃତ ଆଲୋଚନା କରି ଇ-ଚାଲାନ ମାଧ୍ୟମରେ ଏକକାଳୀନ ଦେୟ ପାଇଁ ଓଟିଏସ ଯୋଜନାର ପ୍ରଭାବଶାଳୀ କାର୍ୟ୍ୟକାରିତା ଉପରେ ଗୁରୁତ୍ୱାରୋପ କରିଥିଲେ। ଏହି ଯୋଜନା ଯେପରି ଦକ୍ଷ, ସ୍ୱଚ୍ଛ ଏବଂ ଉପଭୋକ୍ତା ଅନୁକୂଳ ଉପାୟରେ ଜନସାଧାରଣଙ୍କ ନିକଟରେ ପହଞ୍ଚିବ ତାହା ସୁନିଶ୍ଚିତ କରିବାକୁ ସେ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି ,ଯାହା ଦ୍ୱାରା ଅଧିକ ନାଗରିକ ଉପକୃତ ହୋଇପାରିବେ। ଉନ୍ନତ ସେବା ପ୍ରଦାନ ଏବଂ ଜନସାଧାରଣଙ୍କ ସୁବିଧା ପାଇଁ ପ୍ରଯୁକ୍ତିବିଦ୍ୟାର ଲାଭ ଉଠାଇବା ଉପରେ ମଧ୍ୟ ସେ ଗୁରୁତ୍ୱାରୋପ କରିଥିଲେ।
ବିଭାଗ ପକ୍ଷରୁ ସଡ଼କ ସୁରକ୍ଷାକୁ ସର୍ବୋଚ୍ଚ ପ୍ରାଥମିକତା ଦିଆଯାଇଥିବା ପ୍ରମୁଖ ସଚିବ ଗୁରୁତ୍ୱାରୋପ କରିଥିଲେ। ସଚେତନତା ଅଭିଯାନ, କଠୋର କାର୍ୟ୍ୟାନୁଷ୍ଠାନ ଏବଂ ଅଭିନବ ସୁରକ୍ଷା ବ୍ୟବସ୍ଥା ଗ୍ରହଣ ମାଧ୍ୟମରେ ସଡ଼କ ଦୁର୍ଘଟଣା ହ୍ରାସ କରିବା ପାଇଁ ସାମୂହିକ ଏବଂ ସକ୍ରିୟ ଭାବରେ କାର୍ୟ୍ୟ କରିବାକୁ ସେ ଅଧିକାରୀମାନଙ୍କୁ ପରାମର୍ଶ ଦେଇଥିଲେ। ସେ କହିଛନ୍ତି ଯେ ପ୍ରବର୍ତ୍ତନ ଏବଂ ସଚେତନତାର ପ୍ରତ୍ୟେକ ଛୋଟ ପଦକ୍ଷେପ ଜୀବନ ବଞ୍ଚାଇପାରେ-ସମସ୍ତଙ୍କ ପାଇଁ ନିରାପଦ ରାସ୍ତା ସୁନିଶ୍ଚିତ କରିବା ଆମର ସହଭାଗୀ ନାଗରିକ କର୍ତ୍ତବ୍ୟ।
ଶ୍ରୀମତୀ ପାଢୀ ବିଭାଗର ଲକ୍ଷ୍ୟ ହାସଲ ପାଇଁ ଦଳଗତ କାର୍ୟ୍ୟ ଏବଂ ଉତ୍ସର୍ଗୀକୃତତା ଜରୁରୀ ବୋଲି ଆଲୋକପାତ କରି ଅଧିକାରୀ ଓ କର୍ମଚାରୀଙ୍କୁ ଉତ୍ସାହ, ଅଖଣ୍ଡତା ଏବଂ ଜନସେବା ଭାବନା ସହିତ ସେମାନଙ୍କ କର୍ତ୍ତବ୍ୟ ସମ୍ପାଦନ କରିବାକୁ ଉତ୍ସାହିତ କରିଥିଲେ।
ଏହି ପରିଦର୍ଶନ ସମୟରେ ରାଜ୍ୟ ପରିବହନ କମିଶନର ଶ୍ରୀ ଅମିତାଭ ଠାକୁର ଏବଂ ଏସଟିଏ ର ଅନ୍ୟ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।
