ମୁମ୍ବାଇ– ମହାରାଷ୍ଟ୍ରର ମୁମ୍ବାଇରେ ମଙ୍ଗଳବାର ଦିନ ଚାଲିଥିବା ମୂଷଳ ଧାରାରେ ବର୍ଷା ଯୋଗୁଁ ଜନଜୀବନ ସମ୍ପୂର୍ଣ୍ଣ ଅସ୍ତବ୍ୟସ୍ତ ହୋଇପଡିଛି । ପ୍ରବଳ ବର୍ଷା ଯୋଗୁଁ ରେଳ ଟ୍ରାକରେ ପାଣି ଜମି ରହିବା ଯୋଗୁଁ କେନ୍ଦ୍ରୀୟ ରେଳବାଇର ସେବା ଠପ୍ ହୋଇଯାଇଛି, ଯେତେବେଳେକି ପଶ୍ଚିମ ରେଳବାଇର ସେବା ବହୁତ ଧୀର ଗତିରେ ଚାଲିଛି । କମ୍ ଦୃଶ୍ୟମାନତା ଯୋଗୁଁ ବିମାନ ସେବା ମଧ୍ୟ ପ୍ରଭାବିତ ହୋଇଛି । ଉପମୁଖ୍ୟମନ୍ତ୍ରୀ ଅଜିତ ପାୱାର ପ୍ରଶାସନକୁ ସତର୍କ ରହିବାକୁ ନିର୍ଦ୍ଦେଶ ଦେଇଛନ୍ତି ଏବଂ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ହେଲେ ଘରୁ ବାହାରକୁ ଯିବାକୁ ଲୋକଙ୍କୁ ଅପିଲ୍ କରିଛନ୍ତି ।
ଉପମୁଖ୍ୟମନ୍ତ୍ରୀ ଅଜିତ ପାୱାର ମଙ୍ଗଳବାର ଦିନ ମନ୍ତ୍ରଣାଳୟରେ ଅବସ୍ଥିତ ଜରୁରୀକାଳୀନ ବିଭାଗରେ ମୁମ୍ବାଇ ସମେତ ରାଜ୍ୟରେ ପ୍ରବଳ ବର୍ଷା ଉପରେ ନିଆଯାଉଥିବା ପଦକ୍ଷେପର ସମୀକ୍ଷା ବୈଠକ କରିଛନ୍ତି । ଏହା ପରେ ଅଜିତ ପାୱାର କହିଛନ୍ତି ଯେ, ଭାରତୀୟ ପାଣିପାଗ ବିଭାଗ ଆଜି ମୁମ୍ବାଇ ସମେତ ଅନେକ ଜିଲ୍ଲାରେ ପ୍ରବଳ ବର୍ଷା ପାଇଁ ରେଡ୍ ଆଲର୍ଟ ଜାରି କରିଛି । ଏହାକୁ ଦୃଷ୍ଟିରେ ରଖି ପ୍ରଶାସନ ସମ୍ପୃକ୍ତ ଜିଲ୍ଲାଗୁଡ଼ିକରେ ରିଲିଫ୍ ଏବଂ ସହାୟତା କାର୍ଯ୍ୟ କରୁଛି । ପାଣିପାଗ ବିଭାଗ ଦ୍ୱାରା ଜାରି ବର୍ଷା ପାଇଁ ସତର୍କତାକୁ ଦୃଷ୍ଟିରେ ରଖି ଆଜି ମୁମ୍ବାଇ, ଥାନେ ଏବଂ ପାଲଘରରେ ଛୁଟି ଘୋଷଣା କରାଯାଇଛି । ତଥାପି, ଅତ୍ୟାବଶ୍ୟକୀୟ ସେବା ଜାରି ରହିବ । ଘରୋଇ କାର୍ଯ୍ୟାଳୟ ଏବଂ ପ୍ରତିଷ୍ଠାନଗୁଡ଼ିକୁ ମଧ୍ୟ ସେମାନଙ୍କ କର୍ମଚାରୀମାନଙ୍କୁ ଘରୁ କାମ କରିବାକୁ ଅନୁମତି ଦେବାକୁ ନିର୍ଦ୍ଦେଶ ଦିଆଯାଇଛି । ସୁରକ୍ଷା ପାଇଁ ଅନାବଶ୍ୟକ ଯାତ୍ରା ଏଡାଇବାକୁ ଏବଂ ଘରେ ରହିବାକୁ ବିଏମସି ଅପିଲ୍ କରିଛି ।
