ଫିଲ୍ମ ‘ଡନ’ର ନିର୍ଦ୍ଦେଶକ ଚନ୍ଦ୍ରା ବାରୋଟଙ୍କ ବିୟୋଗ

ମୁମ୍ବାଇ-ଅମିତାଭ ବଚ୍ଚନଙ୍କ ଆଇକନିକ୍ ଫିଲ୍ମ ‘ଡନ୍’ ର ନିର୍ଦ୍ଦେଶକ ଚନ୍ଦ୍ରା ବାରୋଟଙ୍କ ରବିବାର ସକାଳେ 86 ବର୍ଷ ବୟସରେ ଦେହାନ୍ତ ଘଟିଛି। ସେ ଗତ ସାତ ବର୍ଷ ଧରି ‘ପଲ୍ମୋନେରୀ ଫାଇବ୍ରୋସିସ୍’ ନାମକ ଗୁରୁତର ରୋଗରେ ପୀଡିତ ଥିଲେ। ତାଙ୍କ ଦେହାନ୍ତ ଖବର ମିଳିବା ପରେ ଚଳଚ୍ଚିତ୍ର ଜଗତରେ ଶୋକର ଲହରୀ ଖେଳି ଯାଇଛି। ଅନେକ ବିଶିଷ୍ଟ ଲୋକେ ସୋସିଆଲ୍ ମିଡିଆ ମାଧ୍ୟମରେ ତାଙ୍କୁ ଶ୍ରଦ୍ଧାଞ୍ଜଳି ଜଣାଇଛନ୍ତି। ତାଙ୍କର ବିୟୋଗ ସଂପର୍କରେ ତାଙ୍କ ପତ୍ନୀ ସୂଚନା ଦେଇଛନ୍ତି।
ସୂଚନା ଅନୁଯାୟୀ, ପ୍ରସିଦ୍ଧ ନିର୍ଦ୍ଦେଶକ ଚନ୍ଦ୍ରା ବାରୋଟଙ୍କ ଚିକିତ୍ସା ମୁମ୍ବାଇର ବାନ୍ଦ୍ରା ସ୍ଥିତ ଗୁରୁ ନାନକ ହସ୍ପିଟାଲରେ ଚାଲିଥିଲା। ଏହାପୂର୍ବରୁ ସେ ଜସଲୋକ ହସ୍ପିଟାଲରେ ମଧ୍ୟ ଭର୍ତ୍ତି ହୋଇଥିଲେ। ସେ ଗତ 6-7 ବର୍ଷ ଧରି ଫୁସଫୁସର ଗୁରୁତର ସମସ୍ୟା ଭୋଗୁଥିଲେ। ବୟସ ବଢ଼ିବା ସହିତ ଶାରୀରିକ ସମସ୍ୟା ତାଙ୍କୁ ବହୁତ ଦୁର୍ବଳ କରିଦେଇଥିଲା। ରବିବାର ସକାଳେ ତାଙ୍କର ଦେହାନ୍ତ ହୋଇଯାଇଛି।