ପୁରୀ– ସ୍ବେଛାସେବୀ ସଂଗଠନ ଦ ବେଲ୍ ଓମେନ୍ସ୍ କ୍ଲବ୍ ତରୁଫରୁ ନିଆରା ଢଙ୍ଗରେ ପାଳିତ ହୋଇଛି ରଜ ଉତ୍ସବ ‘ ଝୁମର ‘ । ପହିଲି ରଜରେ ପୁରୀ ବଳିଆ ପଣ୍ଡା ବସ୍ତି ଅଞ୍ଚଳରେ ଥିବା ୫୦୦ ରୁ ଉର୍ଦ୍ଧ୍ବ କିଶୋରୀମାନଙ୍କୁ ପିଠା, ପାନ ସହିତ ସାନିଟାରୀ ପ୍ୟାଡ୍ ବଣ୍ଟା ଯାଇଥିଲା। ରଜସ୍ୱଳା ହେବା ସମୟରେ ମହିଳା ମାନେ କଷ୍ଟ ଅନୁଭବ କରିଥାନ୍ତି | ଏହି ସମୟରେ ପରିବାର ଲୋକମାନେ ସେମାନଙ୍କ ପ୍ରତି ସମ୍ବେଦନଶିଳ ହେବା ଆବଶ୍ୟକ। ଏହି କଥାକୁ ଲକ୍ଷ୍ଯ କରି ପୂର୍ବ ସମୟରୁ ରଜ ଭଳି ଏକ ପର୍ବର ବ୍ୟବସ୍ଥା ଆମ ପୂର୍ବପୁରୁଷ ମାନେ କରିଥିଲେ | ଏହାର ବ୍ୟାପକ ପ୍ରଚାର ପ୍ରସାର ପାଇଁ ତାକୁ ଧର୍ମୀୟ ସାଂସ୍କୃତିକ ଭାବଧାରା ସହିତ ଯୋଡି ଦିଆଗଲା। ବର୍ତ୍ତମାନ ସମୟରେ ଆମେ ଏହି ପର୍ବର ମୂଳଲକ୍ଷ୍ଯ ଠାରୁ ଦୂରେଇ ଯାଉଛେ | କେବଳ ରଜକୁ ମଉଜ ମଧ୍ୟରେ ସୀମିତ ରଖିଛୁ। ଏହା ଛଡ଼ା ମେନ୍ସୁରେସନ ସମୟକୁ ନେଇ ଅନେକ ଭ୍ରାନ୍ତ ଧାରଣା, କୁସଂସ୍କାର ଏବେ ମଧ୍ୟ ସମାଜରେ ରହିଛି | ଲୋକ ମାନଙ୍କୁ ଅନୁଷ୍ଠାନ ତରଫରୁ ରଜର ମୂଳ ଲକ୍ଷ୍ଯ ପ୍ରତି ସଚେତନ କରାଯାଇଥିଲା | ଅନୁଷ୍ଠାନ ତରଫରୁ ଏଭଳି ଏକ ଅଭିନବ ପ୍ରୟାସ କରାଯାଇଛି ବୋଲି ଦି ବେଲ୍ ଅଧ୍ୟକ୍ଷ ସିଦ୍ଧାର୍ଥ ରାୟ କହିଛନ୍ତି।
ଏହି ସଚେତନା କାର୍ଯ୍ୟକ୍ରମକୁ ଲୋକାଭିମୁଖୀ କରିବା ପାଇଁ କିଶୋରୀ ଓ ମହିଳା ମାନଙ୍କ ମଧ୍ୟରେ ପୁଚି ,ରଙ୍ଗୋଲି,ଦୌଡ଼ ଡିଆଁ,ମ୍ୟୁଉଜିକ ଚେୟାର ଭଳି ବିଭିନ୍ନ ପ୍ରକାର ପ୍ରତିଯୋଗିତା କରାଯାଇଥିଲା | କିଶୋରୀ ଓ ମହିଳା ମାନଙ୍କୁ ନିଜର ଶାରୀରିକ ସ୍ୱଚ୍ଛତା କିପରି ରଖିବେ ସେ ସମ୍ପର୍କରେ ବାର୍ତ୍ତା ଦିଆ ଯାଇଥିଲା। ଆଗାମୀ ସମୟରେ ଅନୁଷ୍ଠାନ ତରଫରୁ ପାଞ୍ଚ ହଜାର ସାନି ଟାରୀ ପ୍ୟାଡ ବିଭିନ୍ନ ବସ୍ତି ଅଞ୍ଚଳରେ କିଶୋରୀ ମାନଙ୍କୁ ବଣ୍ଟା ଯିବାର ଲକ୍ଷ୍ୟ ରଖା ଯାଇଚି ବୋଲି ବେଲ୍ ଓମେନ୍ସ୍ କ୍ଲବ ସମ୍ପାଦିକା ରାଜଲକ୍ଷ୍ମୀ ଦାସ କହିଛନ୍ତି ।
କାର୍ଯ୍ୟକ୍ରମକୁ ଦ ବେଲ୍ ଅନୁଷ୍ଠାନର ଓମେନ୍ସ କ୍ଲବ୍ ଓ ୟୁଥ୍ କ୍ଲବ ସଦସ୍ୟ ସଦସ୍ୟା ମାନେ ପରିଚାଳନା କରିଥିଲେ।
