ଭୁବନେଶ୍ୱର, ଗ୍ରାମୀଣ ସ୍ୱାସ୍ଥ୍ୟ ଭିତ୍ତିଭୂମିକୁ ସୁଦୃଢ଼ କରିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ସ୍ୱରୂପ ଓଡ଼ିଶା ସରକାରଙ୍କ ଆଇନ, ପୂର୍ତ୍ତ ଓ ଅବକାରୀ ମନ୍ତ୍ରୀ ଶ୍ରୀ ପୃଥ୍ବୀରାଜ ହରିଚନ୍ଦନ ଖୋର୍ଦ୍ଧା ଜିଲ୍ଲା ବାଣପୁର ବ୍ଲକରେ ଅବସ୍ଥିତ ଦୁଇଟି ଗ୍ରାମ ପଞ୍ଚାୟତ ଯଥା ନୀଳାଦ୍ରିପ୍ରସାଦ ଓ ଡାମିଆବରବରା ବାସିନ୍ଦାଙ୍କ ଆବଶ୍ୟକତାକୁ ପୂରଣ କରିବା ପାଇଁ ଫୋର୍ସ ଟ୍ରାକ୍ସ ମଡେଲର ଏକ ଉତ୍ସର୍ଗୀକୃତ ଆମ୍ବୁଲାନ୍ସକୁ ଉଦଘାଟନ କରିଛନ୍ତି ।
ଯେତେବେଳେ ଦୁର୍ଗମ ଅଞ୍ଚଳରେ ବସବାସ କରୁଥିବା ଅବହେଳିତ ଆଦିବାସୀ ଓ ଗ୍ରାମୀଣ ଜନସାଧାରଣ ନିରନ୍ତର ସ୍ୱାସ୍ଥ୍ୟସେବା ପାଇବାରେ ସମସ୍ୟା ଭୋଗ କରି ଆସୁଛନ୍ତି ସେହିସମୟରେ ଏହି ଆମ୍ବୁଲାନ୍ସ ସେବା ଠିକ୍ ସମୟରେ ଚିକିତ୍ସା ସହାୟତା ଯୋଗାଇଦେବାରେ ପ୍ରମୁଖ ଭୂମିକା ଗ୍ରହଣ କରିବ ବୋଲି ମନ୍ତ୍ରୀ ଶ୍ରୀ ହରିଚନ୍ଦନ କହିଛନ୍ତି I
ଏହି ଆମ୍ବୁଲାନ୍ସକୁ ଏଲଆଇସି କାର୍ଡ ଦ୍ୱାରା ସେମାନଙ୍କ ସିଏସଆର ପାଣ୍ଠି ଅଧୀନରେ “Helath and Development Initiatives” (HDI) ନାମକ ଏକ ଏନଜିଓକୁ ଦାନ କରାଯାଇଥିଲା, ଯାହାର ଉଦ୍ଦେଶ୍ୟ ମୁଖ୍ୟତଃ ଅନୁସୂଚିତ ଜନଜାତିକୁ ନେଇ ଗଠିତ ସେହି ଦୁଇଟି ପଞ୍ଚାୟତର ବାସିନ୍ଦାଙ୍କ ସର୍ବାଙ୍ଗୀନ ବିକାଶ ।
ଏହି ଆମ୍ବୁଲାନ୍ସରେ ମୌଳିକ ଜୀବନ ରକ୍ଷାକାରୀ ଚିକିତ୍ସା ଉପକରଣ ସହ ଜରୁରୀକାଳୀନ ପରିସ୍ଥିତିରେ ତୁରନ୍ତ ସେବା ଯୋଗାଇ ଦେବା ନିମନ୍ତେ ନୀଳାଦ୍ରିପ୍ରସାଦ ଜିପି ମୁଖ୍ୟାଳୟରେ ମୁତୟନ କରାଯିବ। ନୀଳାଦ୍ରି କୃଷି କଲ୍ୟାଣ ସମବାୟ ସମିତି (NKKSS)ର ସଦସ୍ୟ ଏବଂ ସ୍ଥାନୀୟ ପିଆରଆଇ ସଦସ୍ୟ ଏବଂ ସ୍ଥାନୀୟ ନେତାଙ୍କ ଜରିଆରେ HDI ର ତତ୍ତ୍ୱାବଧାନରେ ଏହା ପରିଚାଳିତ ହେବ। ଏହି ସେବା ନିକଟସ୍ଥ ସ୍ୱାସ୍ଥ୍ୟସେବା କେନ୍ଦ୍ରକୁ ଯାତ୍ରା ସମୟକୁ ଯଥେଷ୍ଟ ହ୍ରାସ କରିବ ଏବଂ ଜରୁରୀକାଳୀନ ମାମଲା, ମାତୃ ଯତ୍ନ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ସ୍ୱାସ୍ଥ୍ୟ ହସ୍ତକ୍ଷେପ ପରିଚାଳନାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ ବୋଲି ଆଶା କରାଯାଉଛି ।
ମାନ୍ୟବର ମନ୍ତ୍ରୀ ଶ୍ରୀ ହରିଚନ୍ଦନ ଏବଂ ଭାରତୀୟ ଜୀବନ ବୀମା ନିଗମ (ଏଲଆଇସି)ର ଅଧ୍ୟକ୍ଷ ଶ୍ରୀ ସିଦ୍ଧାର୍ଥ ମହାନ୍ତି ଆମ୍ବୁଲାନ୍ସକୁ ପତାକା ଦେଖାଇ ଶୁଭାରମ୍ଭ କରିଥିଲେ । ଅନ୍ୟମାନଙ୍କ ମଧ୍ୟରେ ଭାରତୀୟ ଜନତା ପାର୍ଟି, ଓଡ଼ିଶାର ପୂର୍ବତନ ସଭାପତି ତଥା ଓଡ଼ିଶା ଅଲିମ୍ପିକ୍ସ ଆସୋସିଏସନର ସଭାପତି ସମୀର ମହାନ୍ତି, ଏଲଆଇସି କାର୍ଡର ନିର୍ଦ୍ଦେଶକ ସିଦ୍ଧାର୍ଥ ମହାନ୍ତି ଓ ରାଜୀବ ସଚଦେବ, ଏଚଡିଆଇର ନିର୍ଦ୍ଦେଶକ ବ୍ରଜ ଦାସ ଙ୍କ ସମେତ ଏନକେକେଏସ୍ଏସ୍ ର ସମ୍ପାଦକ ପ୍ରଭାତ ନାୟକ, ଏଲ୍ଆଇସି ଅଫ୍ ଇଣ୍ଡିଆର ଅଧିକାରୀ ପୀତବାସ ନାୟକ ପ୍ରମୁଖ ଉପସ୍ଥିତ ଥିଲେ I
