ଗୁଜରାଟର ଦାହୋଦରେ ୨୪,୦୦୦ କୋଟି ଟଙ୍କାରୁ ଅଧିକ ମୂଲ୍ୟର ବିଭିନ୍ନ ଉନ୍ନୟନମୂଳକ ପ୍ରକଳ୍ପର ଶିଳାନ୍ୟାସ, ଉଦଘାଟନ ଏବଂ ଲୋକାର୍ପଣ କଲେ ପ୍ରଧାନମନ୍ତ୍ରୀ ମୋଦୀ

• ଆମ ଦେଶର ପ୍ରଗତି ପାଇଁ ଯାହା ଆବଶ୍ୟକ ତାହା ଭାରତରେ ହିଁ କରାଯିବା ଉଚିତ: ପ୍ରଧାନମନ୍ତ୍ରୀ

ଭୁବନେଶ୍ୱର/ଅହମଦାବାଦ -ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ସୋମବାର ଗୁଜରାଟର ଦାହୋଦରେ ୨୪,୦୦୦ କୋଟି ଟଙ୍କାରୁ ଅଧିକ ମୂଲ୍ୟର ବହୁବିଧ ଉନ୍ନୟନମୂଳକ ପ୍ରକଳ୍ପର ଶିଳାନ୍ୟାସ, ଉଦଘାଟନ ଏବଂ ରାଷ୍ଟ୍ର ଉଦ୍ଦେଶ୍ୟରେ ସମର୍ପିତ କରିଛନ୍ତି । ଏହି ଅବସରରେ ଆୟୋଜିତ ସମାବେଶକୁ ସମ୍ବୋଧିତ କରି ଶ୍ରୀ ମୋଦୀ କହିଛନ୍ତି ଯେ ମେ ୨୬ ତାରିଖର ବିଶେଷ ଗୁରୁତ୍ୱ ରହିଛି କାରଣ ଏହା ୨୦୧୪ରେ ସେ ପ୍ରଥମ ଥର ପାଇଁ ପ୍ରଧାନମନ୍ତ୍ରୀ ଭାବରେ ଶପଥ ନେଇଥିଲେ । ସେ ଗୁଜରାଟର ଲୋକମାନଙ୍କର ଅତୁଟ ସମର୍ଥନ ଏବଂ ଆଶୀର୍ବାଦକୁ ସ୍ୱୀକାର କରିଥିଲେ, ଯେଉଁମାନେ ତାଙ୍କୁ ରାଷ୍ଟ୍ରର ନେତୃତ୍ୱ ନେବାର ଦାୟିତ୍ୱ ଦେଇଥିଲେ । ପ୍ରଧାନମନ୍ତ୍ରୀ ଏହି ଅବସରରେ କହିଛନ୍ତି ଯେ ଏହି ବିଶ୍ୱାସ ଏବଂ ଉତ୍ସାହ ଦିନରାତି ଦେଶ ସେବା କରିବା ପାଇଁ ତାଙ୍କର ସମର୍ପଣକୁ ପ୍ରୋତ୍ସାହିତ କରିଛି । ବର୍ଷ ବର୍ଷ ଧରି, ଭାରତ ଏପରି ନିଷ୍ପତ୍ତି ନେଇଛି ଯାହା ଅଭୂତପୂର୍ବ ଏବଂ ଅକଳ୍ପନୀୟ ଥିଲା । ଦଶନ୍ଧି ଧରି ରହିଥିବା ପ୍ରତିବନ୍ଧକରୁ ମୁକ୍ତ ହୋଇ ପ୍ରତ୍ୟେକ କ୍ଷେତ୍ରରେ ଭାରତ ଆଜି ଅଗ୍ରଗତି କରିଛି । “ଆଜି, ଦେଶ ହତାଶ ଏବଂ ଅନ୍ଧାରର ଯୁଗରୁ ଆତ୍ମବିଶ୍ୱାସ ଏବଂ ଆଶାବାଦର ଏକ ନୂତନ ଯୁଗକୁ ଉଭା ହୋଇଛି” ବୋଲି ସେ କହିଛନ୍ତି ।
୧୪୦ କୋଟି ଭାରତୀୟ ଏକ ବିକଶିତ ଭାରତ ଗଠନରେ ଏକଜୁଟ” ବୋଲି ଶ୍ରୀ ମୋଦି ପ୍ରକାଶ କରି ଭାରତ ଭିତରେ ଅତ୍ୟାବଶ୍ୟକୀୟ ସାମଗ୍ରୀ ଉତ୍ପାଦନର ଗୁରୁତ୍ୱ ଉପରେ ଗୁରୁତ୍ୱାରୋପ କରି କହିଥିଲେ ଯେ ଆତ୍ମନିର୍ଭରଶୀଳତା ହେଉଛି ସମୟର ଆବଶ୍ୟକତା । ସେ ଉଲ୍ଲେଖ କରିଛନ୍ତି ଯେ ଭାରତ ବିଶ୍ୱ ଉତ୍ପାଦନ କ୍ଷେତ୍ରରେ ଦ୍ରୁତ ଅଗ୍ରଗତି କରୁଛି, ଘରୋଇ ଉତ୍ପାଦନ ଏବଂ ରପ୍ତାନି ଉଭୟ ନିରନ୍ତର ବୃଦ୍ଧି ପାଉଛି । ଭାରତ ଏବେ ସ୍ମାର୍ଟଫୋନ୍‌, ଅଟୋମୋବାଇଲ୍‌, ଖେଳଣା, ପ୍ରତିରକ୍ଷା ଉପକରଣ ଏବଂ ଔଷଧ ସମେତ ବିଭିନ୍ନ ପ୍ରକାରର ଉତ୍ପାଦ ରପ୍ତାନି କରୁଛି । ସେ ଆହୁରି କହିଛନ୍ତି ଯେ ଭାରତ କେବଳ ରେଳ ଏବଂ ମେଟ୍ରୋ ପ୍ରଯୁକ୍ତିବିଦ୍ୟା ନିର୍ମାଣ କରୁନାହିଁ ବରଂ ଏହାକୁ ବିଶ୍ୱ ସ୍ତରରେ ରପ୍ତାନି ମଧ୍ୟ କରୁଛି । ସେ ଲୋକୋମୋଟିଭ୍ କୁ ପତାକା ଦେଖାଇ ଶୁଭାରମ୍ଭ କରିଥିଲେ ଯାହା ଗୁଜରାଟ ଏବଂ ସମଗ୍ର ଦେଶ ପାଇଁ ଗର୍ବର ମୁହୂର୍ତ୍ତ ଥିଲା । ଏହା ସହିତ, ସେ ଘୋଷଣା କରିଥିଲେ ଯେ ଗୁଜରାଟ ତାର ରେଳ ନେଟୱାର୍କର ୧୦୦% ବିଦ୍ୟୁତୀକରଣ ହାସଲ କରିଛି ଯାହାକି ଏକ ଉଲ୍ଲେଖନୀୟ ମାଇଲଖୁଣ୍ଟ ବୋଲି ଶ୍ରୀ ମୋଦୀ କହିଛନ୍ତି ଏବଂ ଏହି ସଫଳତା ପାଇଁ ସେ ଗୁଜରାଟବାସୀଙ୍କୁ ଅଭିନନ୍ଦନ ଜଣାଇଛନ୍ତି ।
ସେ କହିଥିଲେ ଯେ ବନ୍ଦେ ଭାରତ ଟ୍ରେନଗୁଡ଼ିକ ଏବେ ପ୍ରାୟ ୭୦ ଟି ରୁଟରେ ଚଳାଚଳ କରୁଛି ଯାହା ଭାରତର ପରିବହନ ନେଟୱାର୍କକୁ ଆହୁରି ସୁଦୃଢ଼ କରୁଛି । ସେ ଅହମ୍ମଦାବାଦ ଏବଂ ଭେରାଭାଲ ମଧ୍ୟରେ ଏକ ନୂତନ ବନ୍ଦେ ଭାରତ ଏକ୍ସପ୍ରେସ ଆରମ୍ଭ କରିବାର ଘୋଷଣା କରିଥିଲେ । ଶ୍ରୀ ମୋଦି ଆହୁରି କହିଛନ୍ତି ଯେ ଭାରତରେ ଆଧୁନିକ ଟ୍ରେନର ଉତ୍ଥାନ ଦେଶର ପ୍ରଯୁକ୍ତିବିଦ୍ୟାର ଅଗ୍ରଗତି ଯୋଗୁଁ ହୋଇଛି । ସେ ଗୁରୁତ୍ୱାରୋପ କରିଥିଲେ ଯେ କୋଚ୍ ଏବଂ ଲୋକୋମୋଟିଭ୍ ଏବେ ଘରୋଇ ଭାବରେ ନିର୍ମିତ ହେଉଛି ଯାହା ଆମଦାନୀ ଉପରେ ନିର୍ଭରଶୀଳତା ହ୍ରାସ କରୁଛି । “ଭାରତ ରେଳ ଉପକରଣର ଏକ ପ୍ରମୁଖ ରପ୍ତାନିକାରୀ ଭାବରେ ଉଭା ହୋଇଛି” ବୋଲି ଶ୍ରୀ ମୋଦୀ କହିଥିଲେ ଯେ ଭାରତ ଅଷ୍ଟ୍ରେଲିଆକୁ ମେଟ୍ରୋ କୋଚ୍ ଏବଂ ଇଂଲଣ୍ଡ, ସାଉଦି ଆରବ ଏବଂ ଫ୍ରାନ୍ସକୁ ଟ୍ରେନ କୋଚ୍ ରପ୍ତାନି କରିଥାଏ । ସେ ଆହୁରି ମଧ୍ୟ କହିଥିଲେ ଯେ ମେକ୍ସିକୋ, ସ୍ପେନ, ଜର୍ମାନୀ ଏବଂ ଇଟାଲୀ ମଧ୍ୟ ଭାରତରୁ ରେଳ ସମ୍ପର୍କିତ ଉପାଦାନ ଆମଦାନୀ କରନ୍ତି । ଶ୍ରୀ ମୋଦୀ ଆହୁରି ମନ୍ତବ୍ୟ ଦେଇଥିଲେ ଯେ ମୋଜାମ୍ବିକ ଏବଂ ଶ୍ରୀଲଙ୍କାରେ ଭାରତୀୟ ଯାତ୍ରୀବାହୀ କୋଚ୍ ବ୍ୟବହୃତ ହେଉଛି ଏବଂ ‘ଭାରତରେ ନିର୍ମିତ’ ଲୋକୋମୋଟିଭ୍ ବିଭିନ୍ନ ଦେଶକୁ ରପ୍ତାନି କରାଯାଉଛି । ସେ କହିଥିଲେ ଯେ ଏହା ‘ମେକ୍ ଇନ୍ ଇଣ୍ଡିଆ’ ପ୍ରୟାସର ନିରନ୍ତର ବିସ୍ତାରକୁ ପ୍ରତିଫଳିତ କରୁଛି ଯାହା ଜାତୀୟ ଗର୍ବକୁ ସୁଦୃଢ଼ କରିଥାଏ ।
“ଏକ ମଜବୁତ ରେଳ ନେଟୱର୍କ ସୁବିଧା ବୃଦ୍ଧି କରେ ଏବଂ ଶିଳ୍ପ ଓ କୃଷିକୁ ପ୍ରୋତ୍ସାହିତ କରେ” ବୋଲି ପ୍ରଧାନମନ୍ତ୍ରୀ କହିଛନ୍ତି । ପ୍ରଧାନମନ୍ତ୍ରୀ କହିଛନ୍ତି ଯେ ଗତ ଦଶନ୍ଧି ମଧ୍ୟରେ ଭାରତର ଅନେକ ଅଞ୍ଚଳ ପ୍ରଥମ ଥର ପାଇଁ ରେଳ ସଂଯୋଗ ପାଇଛି । ସେ ମନ୍ତବ୍ୟ ଦେଇଥିଲେ ଯେ ଗୁଜରାଟର ଅନେକ ଅଞ୍ଚଳରେ ପୂର୍ବରୁ କେବଳ ଛୋଟ, ଧୀର ଗତିରେ ଚାଲୁଥିବା ଟ୍ରେନ୍ ଥିଲା କିନ୍ତୁ ଏବେ ଅନେକ ନ୍ୟାରୋ-ଗେଜ୍ ରୁଟ୍ କୁ ବ୍ରାଡ଼ ଗେଜରେ ପରିଣତ କରାଯାଇଅଛି । ଦାହୋଦ ଏବଂ ଭଲସାଡ ମଧ୍ୟରେ ନୂତନ ଏକ୍ସପ୍ରେସ ଟ୍ରେନ ସମେତ ବହୁବିଧ ରେଳପଥର ଉଦଘାଟନ ଘୋଷଣା କରି ପ୍ରଧାନମନ୍ତ୍ରୀ କହିଥିଲେ ଯେ କାରଖାନାଗୁଡ଼ିକ ଯୁବକମାନଙ୍କ ପାଇଁ ବ୍ୟାପକ ନିଯୁକ୍ତି ସୁଯୋଗ ସୃଷ୍ଟି କରନ୍ତି । ସେ ଆଲୋକପାତ କରିଥିଲେ ଯେ ଦାହୋଦର ରେଳ କାରଖାନା ୯,୦୦୦ ଅଶ୍ୱଶକ୍ତି ବିଶିଷ୍ଟ ଲୋକୋମୋଟିଭ୍ ନିର୍ମାଣ କରିବ ଯାହା ଭାରତର ଟ୍ରେନଗୁଡ଼ିକର ଶକ୍ତି ଏବଂ କ୍ଷମତାକୁ ଉଲ୍ଲେଖନୀୟ ଭାବରେ ବୃଦ୍ଧି କରିବ । ସେ ଉଲ୍ଲେଖ କରିଥିଲେ ଯେ ଦାହୋଦରେ ଉତ୍ପାଦିତ ପ୍ରତ୍ୟେକ ଲୋକୋମୋଟିଭ୍ ସହରର ନାମ ବହନ କରିବ । ପ୍ରଧାନମନ୍ତ୍ରୀ ମନ୍ତବ୍ୟ ଦେଇଥିଲେ ଯେ ଆଗାମୀ ବର୍ଷଗୁଡ଼ିକରେ ଶହ ଶହ ଲୋକୋମୋଟିଭ୍ ନିର୍ମାଣ କରାଯିବ ଯାହା ସ୍ଥାନୀୟ ଯୁବକମାନଙ୍କ ପାଇଁ ପର୍ଯ୍ୟାପ୍ତ ନିଯୁକ୍ତି ସୃଷ୍ଟି କରିବ । ସେ ଗୁରୁତ୍ୱାରୋପ କରିଥିଲେ ଯେ କାରଖାନା ରେଳ ଯନ୍ତ୍ରପାତି ଉତ୍ପାଦନ କରୁଥିବା କ୍ଷୁଦ୍ର ଶିଳ୍ପଗୁଡ଼ିକୁ ମଧ୍ୟ ସମର୍ଥନ କରିବ ଯାହା ଆଖପାଖ ଅଞ୍ଚଳରେ ଆର୍ôଥକ ଅଭିବୃଦ୍ଧି ଆଣିବ । ସେ କହିଥିଲେ ଯେ ନିଯୁକ୍ତି ସୁଯୋଗ କାରଖାନା ବାହାରେ ବିସ୍ତାରିତ ଯାହା ଚାଷୀ, ପଶୁପାଳନ ମାଲିକ, ଦୋକାନୀ ଏବଂ ଶ୍ରମିକଙ୍କୁ ଲାଭ ପହଞ୍ଚାଇଥାଏ ଏବଂ ଏହା ମଧ୍ୟ ବ୍ୟାପକ ଆର୍ôଥକ ପ୍ରଗତି ସୁନିଶ୍ଚିତ କରିଥାଏ ।
“ଏକ ବିକଶିତ ଭାରତ ଗଠନ ପାଇଁ ଆଦିବାସୀ ଅଞ୍ଚଳର ବିକାଶ ଅତ୍ୟନ୍ତ ଜରୁରୀ” ବୋଲି ଶ୍ରୀ ମୋଦି ଗୁରୁତ୍ୱାରୋପ କରି କହିଛନ୍ତି ଯେ ଗତ ୧୧ ବର୍ଷ ମଧ୍ୟରେ ଆଦିବାସୀ ସମ୍ପ୍ରଦାୟର ଉନ୍ନତି ପାଇଁ ଅଭୂତପୂର୍ବ ପ୍ରୟାସ କରାଯାଇଛି । ସେ ମନ୍ତବ୍ୟ ଦେଇଥିଲେ ଯେ ଗୁଜରାଟର ଆଦିବାସୀ ଅଞ୍ଚଳରେ କାମ କରିବାର ତାଙ୍କର ଦୀର୍ଘ ଅଭିଜ୍ଞତା ଜାତୀୟ ସ୍ତରୀୟ ପଦକ୍ଷେପରେ ଯୋଗଦାନ ଦେଇଛି । ଶ୍ରୀ ମୋଦୀ ସେହି ସମୟକୁ ମନେ ପକାଇଥିଲେ ଯେତେବେଳେ ଗୁଜରାଟର ଆଦିବାସୀ ପିଲାମାନେ ବିଜ୍ଞାନ ଅଧ୍ୟୟନରେ ଆହ୍ୱାନର ସମ୍ମୁଖୀନ ହେଉଥିଲେ । ସେ ଆଲୋକପାତ କରିଥିଲେ ଯେ ଆଜି ସମଗ୍ର ଆଦିବାସୀ ଅଞ୍ଚଳରେ ଗୁଣାତ୍ମକ ଶିକ୍ଷାର ସୁବିଧା ଉପଲବ୍ଧ, ଭଲ କଲେଜ, ଆଇଟିଆଇ, ମେଡିକାଲ କଲେଜ ଏବଂ ଦୁଇଟି ସମର୍ପିତ ଜନଜାତି ବିଶ୍ୱବିଦ୍ୟାଳୟ ଏହି ସମ୍ପ୍ରଦାୟଗୁଡ଼ିକୁ ସେବା ଯୋଗାଇ ଦେଉଛନ୍ତି । ଗତ ୧୧ ବର୍ଷ ମଧ୍ୟରେ ଏକଲବ୍ୟ ମଡେଲ ସ୍କୁଲଗୁଡ଼ିକର ନେଟୱାର୍କ ଯଥେଷ୍ଟ ମଜବୁତ ହୋଇଛି ଯାହା ଆଦିବାସୀ ଛାତ୍ରଛାତ୍ରୀଙ୍କ ପାଇଁ ଉତ୍ତମ ଶିକ୍ଷା ସୁଯୋଗ ସୁନିଶ୍ଚିତ କରିଛି ବୋଲି ଶ୍ରୀ ମୋଦୀ ପରିପ୍ରକାଶ କରିବା ସହ ଦାହୋଦରେ ଅନେକ ଏକଲବ୍ୟ ମଡେଲ ସ୍କୁଲ ରହିଛି ବୋଲି କହିଛନ୍ତି ଯାହା ଆଦିବାସୀ ଶିକ୍ଷାକୁ ଆହୁରି ସମର୍ଥନ କରୁଛି ।
ଭାଆତଙ୍କବାଦୀ ଆକ୍ରମଣ ପରେ ଦେଶ ଚୁପ୍ ରହିପାରିବ କି ବୋଲି ପ୍ରଶ୍ନ କରି ଶ୍ରୀ ମୋଦୀ କହିଥିଲେ, “ସିନ୍ଦୂର ଅପରେସନ କେବଳ ଏକ ସାମରିକ କାର୍ଯ୍ୟାନୁଷ୍ଠାନ ନୁହେଁ ବରଂ ଭାରତର ମୂଲ୍ୟବୋଧ ଏବଂ ଭାବନାର ପ୍ରତିଫଳନ ଥିଲା” । ସେ ମନ୍ତବ୍ୟ ଦେଇଛନ୍ତି ଯେ ଆତଙ୍କବାଦୀମାନେ ସେମାନଙ୍କ କାର୍ଯ୍ୟର ପରିଣାମ ବିଷୟରେ କୌଣସି ଧାରଣା ରଖିନାହାନ୍ତି, ତାଙ୍କ ପିଲାମାନଙ୍କ ସମ୍ମୁଖରେ ଜଣେ ପିତାଙ୍କୁ ହତ୍ୟା କରିବାର ନିର୍ମମତାକୁ ମନେ ପକାଇ ଶ୍ରୀ ମୋଦୀ କହିଛନ୍ତି ଯେ ଏପରି ଚିତ୍ର ଏବେ ବି ସାରା ଦେଶରେ କ୍ରୋଧ ଜାଳି ଦେଉଛି, କାରଣ ୧୪୦ କୋଟି ଭାରତୀୟ ଆତଙ୍କବାଦ ଦ୍ୱାରା ଚ୍ୟାଲେଞ୍ଜର ସମ୍ମୁଖୀନ ହୋଇଥିଲେ । ଶ୍ରୀ ମୋଦି ଘୋଷଣା କରିଥିଲେ ଯେ ସେ ଦେଶର ନେତା ଭାବରେ ତାଙ୍କର ଦାୟିତ୍ୱ ନିର୍ବାହ କରିଛନ୍ତି ଏବଂ ଭାରତର ସଶସ୍ତ୍ର ବାହିନୀକୁ ପୂର୍ଣ୍ଣ ସ୍ୱାଧୀନତା ଦେଇଛନ୍ତି । ଯେଉଁମାନେ ଦଶନ୍ଧି ଧରି ଅଦୃଶ୍ୟ ଅପରେସନ୍ କାର୍ଯ୍ୟକାରୀ କରିଥିଲେ, ସେମାନଙ୍କୁ ଉଚିତ ଶିକ୍ଷା ଦିଆଯିବାର ପ୍ରୟାସ ଚାଲୁରହିଛି । ଶ୍ରୀ ମୋଦୀ ଉଲ୍ଲେଖ କରିଥିଲେ ଯେ ସୀମା ଆରପାରିରେ ନଅଟି ପ୍ରମୁଖ ଆତଙ୍କବାଦୀ କେନ୍ଦ୍ର ଚିହ୍ନଟ କରାଯାଇ ୨୨ ମିନିଟ ମଧ୍ୟରେ ଧ୍ୱଂସ କରାଯାଇଥିଲା ଏବଂ ପାକିସ୍ତାନର ସେନା ପ୍ରତିଶୋଧ ନେବାକୁ ଚେଷ୍ଟା କରିଥିଲା କିନ୍ତୁ ଭାରତୀୟ ସେନା ଦ୍ୱାରା ନିର୍ଣ୍ଣାୟକ ଭାବରେ ପରାସ୍ତ ହୋଇଥିଲା । ଶ୍ରୀ ମୋଦି ଭାରତର ସଶସ୍ତ୍ର ବାହିନୀର ବୀରତ୍ୱ ପ୍ରତି ତାଙ୍କର ଗଭୀର ସମ୍ମାନକୁ ଦୋହରାଇଲେ ଏବଂ ଦାହୋଦର ପବିତ୍ର ଭୂମିରୁ ସେମାନଙ୍କ ସାହସ ଏବଂ ସମର୍ପଣକୁ ସଲାମ କଲେ ।
ପ୍ରଧାନମନ୍ତ୍ରୀ ମନ୍ତବ୍ୟ ଦେଇଥିଲେ ଯେ ବିଭାଜନ ପରେ ଜନ୍ମ ହୋଇଥିବା ଦେଶ ଭାରତ ପ୍ରତି ଶତ୍ରୁତା ଏବଂ କ୍ଷତି ପହଞ୍ଚାଇବା ଉପରେ ଧ୍ୟାନ ଦେଇଛି । “ଅନ୍ୟପକ୍ଷରେ, ଭାରତ ଦାରିଦ୍ର‌୍ୟ ଦୂରୀକରଣ, ଏହାର ଅର୍ଥନୀତିକୁ ସୁଦୃଢ଼ କରିବା ଏବଂ ବିକାଶ ହାସଲ କରିବା ପାଇଁ ପ୍ରତିବଦ୍ଧ” ବୋଲି ସେ କହିଛନ୍ତି । ପ୍ରଧାନମନ୍ତ୍ରୀ ଆଲୋକପାତ କରିଥିଲେ ଯେ ଏକ ବିକଶିତ ଭାରତ କେବଳ ସେତେବେଳେ ନିର୍ମାଣ ହୋଇପାରିବ ଯେତେବେଳେ ଏହାର ସଶସ୍ତ୍ର ବାହିନୀ ଏବଂ ଅର୍ଥନୀତି ଉଭୟ ସୁଦୃଢ଼ ହେବ । ସେ କହିଥିଲେ ଯେ ସରକାର ଏହି ଦିଗରେ ନିରନ୍ତର କାର୍ଯ୍ୟ କରୁଛି, ଜାତୀୟ ସୁରକ୍ଷା ଏବଂ ଅର୍ଥନୈତିକ ଅଭିବୃଦ୍ଧି ସମନ୍ୱୟରେ ଚାଲୁଥିବା ସୁନିଶ୍ଚିତ କରୁଛି ।
ଏହି କାର୍ଯ୍ୟକ୍ରମରେ ଅନ୍ୟାନ୍ୟ ଗଣ୍ୟମାନ୍ୟ ବ୍ୟକ୍ତିଙ୍କ ମଧ୍ୟରେ ଗୁଜରାଟର ମୁଖ୍ୟମନ୍ତ୍ରୀ ଶ୍ରୀ ଭୂପେନ୍ଦ୍ରଭାଇ ପଟେଲ, କେନ୍ଦ୍ର ରେଳ, ସୂଚନା ଓ ପ୍ରସାରଣ ଏବଂ ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରୀ ଶ୍ରୀ ଅଶ୍ୱିନୀ ବୈଷ୍ଣବ ଉପସ୍ଥିତ ଥିଲେ ।