ଜୟପୁର -ଭାରତ-ପାକିସ୍ଥାନ ମଧ୍ୟରେ ସାମରିକ କାର୍ଯ୍ୟାନୁଷ୍ଠାନ ବନ୍ଦ କରିବାକୁ ଚୁକ୍ତିନାମା ପରେ ମଧ୍ୟ ରାଜସ୍ଥାନର ସୀମାବର୍ତ୍ତୀ ଜିଲ୍ଲାରେ ପାକିସ୍ଥାନରୁ ଡ୍ରୋନ ଆକ୍ରମଣ ଜାରି ରହିଥିବା ଅଭିଯୋଗ ହୋଇଛି।ଶନିବାର ବିଳମ୍ବିତ ରାତିରେ ରାଜସ୍ଥାନର ଜୈସଲମେର,ଶ୍ରୀଗଙ୍ଗାନଗର,ଏବଂ ବାଡମେର ଜିଲ୍ଲାରେ ପାକିସ୍ଥାନୀ ଡ୍ରୋନ ଦେଖାଯାଇଥିଲା,ଯାହା ଉପରେ ଭାରତୀୟ ସେନା ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ମଝି ଆକାଶରେ ସେଗୁଡିକୁ ଧ୍ୱଂସ କରିଦେଇଥିଲା।ଜୈସଲମେରରେ ରାତିରେ ଗୋଟିଏ ପରେ ଗୋଟିଏ ଛଅଟି ବିସ୍ଫୋରଣର ଶବ୍ଦ ଶୁଣିବାକୁ ମିଳିଥିଲା,ଯାହା ଲୋକଙ୍କ ମଧ୍ୟରେ ଆତଙ୍କର ପରିବେଶ ସୃଷ୍ଟି କରିଥିଲା।ତଥାପି ଏଗୁଡିକ କାହାର ବିସ୍ଫୋରଣ ତାହା ସରକାରୀ ଭାବରେ ନିଶ୍ଚିତ ହୋଇନାହିଁ।ରବିବାର ସକାଳେ ଜୈସଲମେର ସଦର ଥାନା ଅଞ୍ଚଳ ଅନ୍ତର୍ଗତ ପୋହଡା ଗ୍ରାମରେ ଏକ ପୁରୁଣା ହ୍ୟାଣ୍ଡ ଗ୍ରେନେଡ ଏବଂ କିଛି କଳଙ୍କି ହୋଇଥିବା କାରତୁସ ମିଳିବା ପରେ ଏକ ଚାଞ୍ଚଲ୍ୟ ଖେଳିଯାଇଥିଲା। ସ୍ଥାନୀୟ ଲୋକମାନେ ବିଶ୍ୱାସ କରନ୍ତି ଯେ ଏହା କୌଣସି ପୁରୁଣା ସେନା ଅଭ୍ୟାସରୁ ହୋଇପାରେ।ବର୍ତ୍ତମାନ ପୋଲିସ ଏବଂ ସେନା ଘଟଣାର ତଦନ୍ତ କରୁଛନ୍ତି।
