ନୂଆ ଦିଲ୍ଲୀ, ଗୃହ ନିର୍ମାଣ ଏବଂ ନଗର ଉନ୍ନୟନ ମନ୍ତ୍ରୀ ଡକ୍ଟର କୃଷ୍ଣ ଚନ୍ଦ୍ର ମହାପାତ୍ର ଆଜି ଦିଲ୍ଲୀ ନଗର ନିଗମ ଦ୍ୱାରା ପରିଚାଳିତ ଓଖଲାରେ ଥିବା ଅତ୍ୟାଧୁନିକ ବର୍ଜ୍ୟବସ୍ତୁରୁ ଶକ୍ତି ପ୍ଲାଣ୍ଟ ପରିଦର୍ଶନ କରିଛନ୍ତି। ଏହି ପ୍ଲାଣ୍ଟ ବର୍ତ୍ତମାନ ପ୍ରତିଦିନ ପ୍ରାୟ ୨୦୦୦ ମେଟ୍ରିକ୍ ଟନ୍ (ଏମ୍ଟି) ପୌର କଠିନ ବର୍ଜ୍ୟବସ୍ତୁ ପ୍ରକ୍ରିୟାକରଣ କରେ ଏବଂ ପ୍ରାୟ ୨୩ ମେଗାୱାଟ୍ (ଏମ୍ଟି) ସବୁଜ ଶକ୍ତି ଉତ୍ପାଦନ କରେ।
ମନ୍ତ୍ରୀ ଉପସ୍ଥିତ ଅଧିକାରୀଙ୍କ ସହିତ ପ୍ଲାଣ୍ଟର କାର୍ଯ୍ୟକାରିତା, ପ୍ରଯୁକ୍ତିବିଦ୍ୟା ଏବଂ କାର୍ଯ୍ୟକ୍ଷମ ଆଦି ବିଷୟରେ ବିସ୍ତୃତ ଆଲୋଚନା କରିଥିଲେ। ଆଲୋଚନା ସମୟରେ ଏହି ପ୍ଲାଣ୍ଟ କ୍ଷମତାକୁ ୩,୦୦୦ ମେଟ୍ରିକ୍ ଟନ୍ ଅପବ୍ୟବସ୍ତୁ ପ୍ରକ୍ରିୟାକରଣ ଏବଂ ୩୦ ମେଗାୱାଟ୍ ଶକ୍ତି ଉତ୍ପାଦନକୁ ବିସ୍ତାର କରାଯାଇପାରିବ ଏବଂ ସେ ନେଇ ପ୍ରସ୍ତୁତି ଆରମ୍ଭ ହୋଇଥିବା ନେଇ ସୂଚନା ଦିଆଯାଇଥିଲା।
ପ୍ଲାଣ୍ଟର ଦକ୍ଷତା ଏବଂ ପ୍ରଭାବଶାଳୀତାରେ ପ୍ରଭାବିତ ହୋଇ, ମନ୍ତ୍ରୀ ଡକ୍ଟର ମହାପାତ୍ର ପ୍ରକାଶ କରିଥିଲେ ଯେ ଏପରି ଏକ ପଦକ୍ଷେପ ଆମ ରାଜ୍ୟରେ ସ୍ୱଚ୍ଛ ଶକ୍ତି ଉତ୍ପାଦନରେ ଯୋଗଦାନ ଦେବା ସହିତ ବର୍ଜ୍ୟବସ୍ତୁ ପରିଚାଳନା ଚ୍ୟାଲେଞ୍ଜଗୁଡ଼ିକର ମୁକାବିଲା କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିପାରିବ। ସେ ନିଶ୍ଚିତ କରିଥିଲେ ଯେ ସ୍ଥାୟୀ ବର୍ଜ୍ୟବସ୍ତୁ ପରିଚାଳନା ଅଭ୍ୟାସକୁ ପ୍ରୋତ୍ସାହିତ କରିବା ପାଇଁ ଏହି ଧାରଣାକୁ କାର୍ଯ୍ୟକାରୀ କରିବା ପାଇଁ ଗମ୍ଭୀରତାର ସହ ବିଚାର କରାଯିବ।
ଓଖଲା ବର୍ଜ୍ୟବସ୍ତୁରୁ ଶକ୍ତି ପରିଚାଳନା ପ୍ଲାଣ୍ଟର ପ୍ରକଳ୍ପ ପରିଚାଳନା ମୁଖ୍ୟ ସନ୍ଦୀପ ଦତ୍ତା, ଦିଲ୍ଲୀ ନଗର ନିଗମର ବରିଷ୍ଠ ଅଧିକାରୀମାନଙ୍କ ସହିତ ଏହି ପ୍ରକଳ୍ପ କାର୍ଯ୍ୟକାରିତା ସମ୍ପର୍କରେ ସୂଚନା ପ୍ରଦାନ କରିଥିଲେ ଏବଂ ଗସ୍ତ ସମୟରେ ଡକ୍ଟର ମହାପାତ୍ରଙ୍କ ସହିତ ଥିଲେ।
ମନ୍ତ୍ରୀ ଡାଃ ମହାପାତ୍ର ଏକ ସ୍ୱଚ୍ଛ ଏବଂ ସବୁଜ ଭାରତର ଲକ୍ଷ୍ୟ ସହିତ ସମନ୍ୱୟ ରଖି, ଅପଚୟକୁ ଏକ ମୂଲ୍ୟବାନ ଶକ୍ତି ସମ୍ପଦରେ ପରିଣତ କରିବାରେ ମହାନଗର ନିଗମ ଏବଂ ପ୍ଲାଣ୍ଟ ପରିଚାଳନା ଦଳର ଅଭିନବ ପଦ୍ଧତି ପାଇଁ ସେମାନଙ୍କର ପ୍ରୟାସକୁ ପ୍ରଶଂସା କରିଥିଲେ।
