ନୂଆଦିଲ୍ଲୀ– ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସାଉଦି ଆରବର କ୍ରାଉନ ପ୍ରିନ୍ସ ଏବଂ ପ୍ରଧାନମନ୍ତ୍ରୀ ପ୍ରିନ୍ସ ମହମ୍ମଦ ବିନ ସଲମାନଙ୍କ ନିମନ୍ତ୍ରଣ କ୍ରମେ ଅପ୍ରେଲ ୨୨ ଓ ୨୩ ତାରିଖରେ ସାଉଦି ଆରବ ଗସ୍ତରେ ଯିବେ ।
ବୈଦେଶିକ ମନ୍ତ୍ରାଳୟ ଶନିବାର ଏକ ବୟାନରେ କହିଛନ୍ତି ଯେ, ୨୦୧୬ ଓ ୨୦୧୯ ଗସ୍ତ ପରେ ଏହା ପ୍ରଧାନମନ୍ତ୍ରୀ ମୋଦୀଙ୍କ ତୃତୀୟ ଥର ସାଉଦି ଆରବ ଗସ୍ତ ହେବ । ୨୦୨୩ ସେପ୍ଟେମ୍ବରରେ ଜି-୨୦ ଶିଖର ସମ୍ମିଳନୀରେ ଭାଗ ନେବା ଓ ଭାରତ-ସାଉଦି ଆରବ ରଣନୀତିକ ଅଂଶୀଦାରୀ ପରିଷଦର ପ୍ରଥମ ବୈଠକରେ ସହ-ଅଧ୍ୟକ୍ଷତା କରିବା ନିମନ୍ତେ ପ୍ରିନ୍ସ ମହମ୍ମଦ ବିନ ସଲମାନ, କ୍ରାଉନ ପ୍ରିନ୍ସ ଓ ସାଉଦି ଆରବର ପ୍ରଧାନମନ୍ତ୍ରୀଙ୍କ ନୂଆଦିଲ୍ଲୀର ରାଜକୀୟ ଯାତ୍ରା ପରେ ପ୍ରଧାନମନ୍ତ୍ରୀ ମୋଦୀ ଏହି ଗସ୍ତ କରୁଛନ୍ତି । ବୟାନରେ ଆହୁରି ମଧ୍ୟ କୁହାଯାଇଛି ଯେ, ଭାରତ ଏବଂ ସାଉଦି ଆରବ ମଧ୍ୟରେ ସାମାଜିକ- ସାଂସ୍କୃତିକ ଏବଂ ବାଣିଜ୍ୟିକ ସମ୍ପର୍କର ଦୀର୍ଘ ଇତିହାସ ରହିଛି । ଏବଂ ଏମାନଙ୍କ ମଧ୍ୟରେ ଘନିଷ୍ଠ ଓ ମୈତ୍ରୀପୂର୍ଣ୍ଣ ସମ୍ବନ୍ଧ ରହିଛି । ରଣନୀତିକ ଅଂଶୀଦାର ରୂପେ ଦୁଇ ଦେଶ ରାଜନୈତିକ, ପ୍ରତିରକ୍ଷା, ସୁରକ୍ଷା, ବ୍ୟାପାର, ନିବେଶ, ଶକ୍ତି, ଉଦ୍ୟୋଗିକ, ସ୍ୱାସ୍ଥ୍ୟ, ଶିକ୍ଷା, ସଂସ୍କୃତି ଓ ଲୋକଙ୍କ ମଧ୍ୟରେ ସମ୍ବନ୍ଧ ସହିତ ବିଭିନ୍ନ କ୍ଷେତ୍ରରେ ମଜବୁତ ଦ୍ୱିପାକ୍ଷିକ ସମ୍ବନ୍ଧ ବ୍ୟକ୍ତ କରିଥାନ୍ତି ।
