ଜୟପୁର– ୨୦୨୫ ଫେବ୍ରୁଆରି ୨୪ରୁ ୨୬ ତାରିଖ ପର୍ଯ୍ୟନ୍ତ ଗୋଆ ବିଶ୍ୱବିଦ୍ୟାଳୟରେ ଆୟୋଜିତ ଏକ ଅନ୍ତର୍ଜାତୀୟ ସମ୍ମିଳନୀରେ ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟ (ସିୟୁଓ)ର ସମନ୍ବିତ କୃଷି ଓ ପ୍ରାକୃତିକ ସମ୍ପଦ ବିଦ୍ୟାଳୟର କୃଷି ବିଭାଗର ଅଧ୍ୟାପକ ଓ ଛାତ୍ରଛାତ୍ରୀମାନେ ନିଜର ସ୍ଵତନ୍ତ୍ର ପରିଚୟ ସୃଷ୍ଟି କରିଛନ୍ତି। କୃଷି ପ୍ରଯୁକ୍ତି ବିଦ୍ୟା ବିକାଶ ସୋସାଇଟି (ଏଟିଡିଏସ୍) ପକ୍ଷରୁ ଆୟୋଜିତ ଏହି କାର୍ଯ୍ୟକ୍ରମର ଶୀର୍ଷକ ଥିଲା ‘ନିରନ୍ତର ଶିକ୍ଷା, ପରିବେଶ ଓ କୃଷିରେ ଅତ୍ୟାଧୁନିକ ଗବେଷଣା ଉଦ୍ଭାବନ’ | ସହକାରୀ ପ୍ରଫେସର ଡ. ଅନୁପମ ଡାକୁଆ ବ୍ୟକ୍ତିଗତ ଭାବେ ସିୟୁଓର ପ୍ରତିନିଧିତ୍ୱ କରିବା ସହ ୩ଟି ଦ୍ବିତୀୟ ବର୍ଷ B.Sc (ଅନର୍ସ) କୃଷି ବିଦ୍ୟାର୍ଥୀଙ୍କୁ ସାଙ୍ଗରେ ନେଇଥିଲେ । ଆସୋସିଏଟ୍ ପ୍ରଫେସର ତଥା ବିଭାଗୀୟ ମୁଖ୍ୟ ଡ. ମଞ୍ଜୁଶ୍ରୀ ସିଂହ ମୁଖ୍ୟ ବକ୍ତା ଭାବେ “ଜଳବାୟୁ-ସ୍ମାର୍ଟ କୃଷିରେ ରିମୋଟ୍ ସେନ୍ସିଂ ଏବଂ ଜିଆଇଏସ୍ର ସମନ୍ବିତ ଆଭିମୁଖ୍ୟ” ଶୀର୍ଷକ ଆଲୋଚନାଚକ୍ର ଉପସ୍ଥାପନ କରିଥିଲେ।
ଅନେକ ଅଧ୍ୟାପକଙ୍କୁ ସେମାନଙ୍କର ଶିକ୍ଷାଗତ ଉତ୍କର୍ଷତା ପାଇଁ ପୁରସ୍କୃତ କରାଯାଇଥିଲା । ଲୋପାମୁଦ୍ରା ବେହେରା (ପ୍ଲାଣ୍ଟ ପାଥୋଲୋଜି), ଡ. ଦେବଦତ୍ତ ପଣ୍ଡା (ଜେନେଟିକ୍ସ ଆଣ୍ଡ ପ୍ଲାଣ୍ଟ ବ୍ରିଡିଂ) ଏବଂ ଡ. ଅନୁପମ ଡାକୁଆ (କୃଷି ସମ୍ପ୍ରସାରଣ)ଙ୍କୁ ଶ୍ରେଷ୍ଠ ପିଏଚ୍ଡି ଥିସିସ୍ ପୁରସ୍କାର ୨୦୨୫ ପ୍ରଦାନ କରାଯାଇଥିଲା। ଆଗ୍ରୋନୋମିରେ ଅବଦାନ ପାଇଁ ଅତିଥି ଅଧ୍ୟାପକ ଡ. ପ୍ରଦୋଷ କୁମାର ପରିଡ଼ାଙ୍କୁ ଶ୍ରେଷ୍ଠ M.Sc ଥିସିସ୍ ପୁରସ୍କାର ୨୦୨୫ ପ୍ରଦାନ କରାଯାଇଥିଲା।
ଏତଦ୍ ବ୍ୟତୀତ ବିଭାଗର ଜୀବନ୍ତ ଗବେଷଣା ସଂସ୍କୃତିକୁ ପ୍ରଦର୍ଶିତ କରି ସମ୍ମିଳନୀ ସ୍ମାରକୀରେ ଚତୁର୍ଥ ସେମିଷ୍ଟରର ୮ ଜଣ ଛାତ୍ରଛାତ୍ରୀଙ୍କୁ ପ୍ରକାଶନ ପାଇଁ ଚୟନ କରାଯାଇଥିଲା। ଏହି ଅବସରରେ ସମନ୍ୱିତ କୃଷି ଓ ପ୍ରାକୃତିକ ସମ୍ପଦ ବିଦ୍ୟାଳୟ ସମୂହର ଡିନ୍ ପ୍ରଫେସର ଏନ୍ ସି ପଣ୍ଡା କୃତୀ ପ୍ରତିଯୋଗୀଙ୍କୁ ଅଭିନନ୍ଦନ ଜଣାଇବା ସହ ଛାତ୍ରଛାତ୍ରୀଙ୍କ ସଫଳତାକୁ ପ୍ରଶଂସା କରିବା ସହ ଗବେଷଣା ଓ ଉଦ୍ଭାବନ କ୍ଷେତ୍ରରେ ଉତ୍କର୍ଷତା ପାଇଁ ପ୍ରୟାସ ଜାରି ରଖିବାକୁ ଉତ୍ସାହିତ କରିଥିଲେ ବୋଲି ବିଶ୍ବବିଦ୍ୟାଳୟର ଲୋକ ସମ୍ପର୍କ ଅଧିକାରୀ ଡ. ଫଗୁନାଥ ଭୋଇ ସୂଚନା ଦେଇଛନ୍ତି।
