ମାଲକାନଗିରି-ବେଆଇନ ଯାଞ୍ଚ ବିରୋଧରେ ଉତ୍କଳ ଦିବସ ଠାରୁ ମାଲ୍ୟବନ୍ତ ଟିପର ମାଲିକ ସଂଘ ପକ୍ଷରୁ ଟିପର ଚକା ବନ୍ଦ ଆନ୍ଦୋଳନ ଆରମ୍ଭ ହୋଇଛି। ଆଜି ୪ ଦିନରେ ପହଁଚିଛି, ଯାହା ଫଳରେ ଜିଲ୍ଲାର ବିଭିନ୍ନ ଉନ୍ନୟନ କାର୍ଯ୍ୟରେ ବାଧା ସୃଷ୍ଟି ହୋଇଛି। ଗୋଟିଏ ପଟେ ଟିପର ଚକା ବନ୍ଦ ଆନ୍ଦୋଳନ ଅନ୍ୟ ପଟେ ଠିକାଦାରଙ୍କ କାମ ବନ୍ଦ ଧମକ ବିଭିନ୍ନ ବିଭାଗକୁ ଅଡୁଆରେ ପକାଇ ଦେଇଛି। ମାଲକାନଗିରି ଜିଲ୍ଲା କଣ୍ଟ୍ରାକ୍ଟର ସଂଘ ପକ୍ଷରୁ ଉନ୍ନୟନ କାର୍ଯ୍ୟ ବନ୍ଦ ପାଇଁ ଆଜି ଜିଲ୍ଲାର ବିଭିନ୍ନ ବିଭାଗକୁ ଦାବି ପତ୍ର ପ୍ରଦାନ କରାଯାଇଛି। ଆଜି ମାଲକାନଗିରି ଜିଲ୍ଲା କଣ୍ଟ୍ରାକ୍ଟର ସଂଘର ଜେ. ଶ୍ରୀନିବାସ ରାଓ, ପ୍ରଭାକର ପ୍ରଧାନ, ଅଜୟ କୁମାର ରାଉତ, ଅଜିତ କୁମାର ପାଢ଼ୀ, ପି ରାମା ରାଓ,ଅର୍ଦ୍ଧେନ୍ଦୁ ସରକାର, ସତ୍ୟଜିତ ପଡିଆରୀ, ସୋମ୍ୟରଞ୍ଜନ ମୁଦୁଲି, ରାଜ କୁମାର ସାହୁ, ବିଶ୍ଵମ୍ବର ସରକାର ପ୍ରମୁଖ ଠିକାଦାର ମାନେ ଆରଡି ବିଭାଗ ୧ ଓ ୨ ବିଭାଜନର ନିର୍ବାହୀ ଯନ୍ତ୍ରୀଙ୍କ ସହିତ, ଜିଲ୍ଲାର ଅନ୍ୟାନ୍ୟ ଉନ୍ନୟନ ବିଭାଗ ଅଧିକାରୀଙ୍କୁ ଭେଟି ଉନ୍ନୟନ କାର୍ଯ୍ୟ ବନ୍ଦ କରିବାକୁ ଦାବି ପତ୍ର ପ୍ରଦାନ କରିଛନ୍ତି।
ଜିଲ୍ଲାରେ ଏପ୍ରିଲ ୧ ତାରିଖ ଠାରୁ ଟିପ୍ପର ମାଲିକ ସଂଘ ପକ୍ଷରୁ ଚକା ବନ୍ଦ ଜାରି ରହିଥିବାରୁ, ମାଲକାନଗିରି ଜିଲ୍ଲାରେ ସଡକ, ବ୍ରିଜ୍ ଏବଂ ନିର୍ମାଣ ପାଇଁ ସାମଗ୍ରୀ ସାଇଟରେ ପଥର ସାମଗ୍ରୀ, ବାଲି, ଜିଏସବି ସିଟ, ଟାଇଲ, ମୋରମ ଆଦି ସାମଗ୍ରୀ କାର୍ଯ୍ୟ ସ୍ଥଳରେ ପହଞ୍ଚି ପାରୁ ନଥିବାରୁ ଆଜି ଠାରୁ ସମସ୍ତ ବିକାଶ କାର୍ଯ୍ୟ ବନ୍ଦ କରିବା ପାଇଁ ଦାବି ପତ୍ର ମାଧ୍ୟମରେ ଜଣାଇଛନ୍ତି। ମାଲକାନଗିରି ଜିଲ୍ଲାର କାର୍ଯ୍ୟର ବିଳମ୍ବ ଏବଂ ମନ୍ଥର ଅଗ୍ରଗତି ପାଇଁ ମଧ୍ୟ ଆମେ ଦାୟୀ ରହିବୁ ନାହିଁ, ଯାହା ବର୍ଷା ପୂର୍ବରୁ ଶେଷ ହେବାକୁ ଯାଉଛି। ଟିପର ମାଲିକ ଓ
ଠିକାଦାରଙ୍କ ଆନ୍ଦୋଳନ ଏପରି ଚାଲୁ ରହିଲେ ଆଗାମୀ ଦିନରେ ଜିଲ୍ଲାରେ ଚାଲିଥିବା ଉନ୍ନୟନ କାର୍ଯ୍ୟ ଠପ୍ ହୋଇଯିବାର ସମ୍ଭାବନାକୁ ଏଡାଇ ଦିଆଯାଇ ନପାରେ।
