ଭୁବନେଶ୍ୱର, ଖଣ୍ଡଗିରି ହିନ୍ଦୁ ବୁଦ୍ଧିଜୀବୀ ମିଳନ ଓ ଆଇ ଏମ ସି ଟି ର ମିଳିତ ଆନୁକୁଲ୍ୟରେ ସ୍ଥାନୀୟ ଧର୍ମବିହାର ସରସ୍ୱତୀ ଶିଶୁ ବିଦ୍ୟାମନ୍ଦିର ଠାରେ ଭାରତୀୟ ପରମ୍ପରା ଓ ହିନ୍ଦୁ ସଂସ୍କୃତି ଆଧାରିତ ଏକ ପ୍ରତିଯୋଗିତା ଆୟୋଜିତ ହୋଇ ଯାଇଛି ।
ଏହି ପ୍ରତିଯୋଗିତା ରେ ଖଣ୍ଡଗିରି ଅଞ୍ଚଳ ର ୧୦ ଟି ବିଦ୍ୟାଳୟ ର ପ୍ରାୟ ୩୦୦ ବିଦ୍ୟାର୍ଥୀ ଅଂଶ ଗ୍ରହଣ କରି ଖେଳକୁଦ ଓ ବୌଦ୍ଧିକ ପ୍ରତିଯୋଗିତା ରେ ଭାଗ ନେଇଥିଲେ ।
ଖେଳକୁଦ ରେ ୧୦୦ ମିଟର ଦୌଡ, ବର୍ଚ୍ଛା ଫିଙ୍ଗା, ଧନୁଷ – ତିର, ପିରାମିଡ୍, ପୂଚି ଓ ରଙ୍ଗୋଲି ରେ ପ୍ରାୟ ୨୦୦ ପିଲା ଭାଗ ନେବା ବେଳେ ବୌଦ୍ଧିକ ବିଷୟ ରେ ରଚନା, ବକ୍ତୃତା ପ୍ରତିଯୋଗିତା, ପ୍ରଶ୍ନ – ଉତ୍ତର(କୁଇଜ୍), ଚିତ୍ରାଙ୍କନ, ବେଦ ମନ୍ତ୍ର ଓ ଗୀତା ଶ୍ଲୋକ ଉଚ୍ଚାରଣ ଓ ଦେଶଭକ୍ତି ଗୀତ ରେ ପ୍ରାୟ ୧୦୦ ବିଦ୍ୟାର୍ଥୀ ଭାଗ ନେଇଥିଲେ ।
ପ୍ରତିଯୋଗିତା ପୂର୍ବରୁ ‘ପଞ୍ଚ ପଣ ରୁ ପରମ ବୈଭବ ଶାଳୀ ଭାରତ ‘ ଆଧାରିତ ପ୍ରତିଯୋଗିତା ବିଷୟରେ ହିନ୍ଦୁ ବୁଦ୍ଧିଜୀବୀ ମିଳନ ତରଫରୁ ରମେଶ ଜେନା ଉପସ୍ଥିତ ସମସ୍ତ ବିଦ୍ୟାର୍ଥୀ, ଶିକ୍ଷକ ଓ ଅଭିଭାବକ ଙ୍କ ସାମନାରେ ସମ୍ୟକ୍ ଧାରଣା ରଖିଥିଲେ । ବର୍ତମାନ ସମାଜରେ ପରିବାର ପ୍ରବୋଧନ, ସାମାଜିକ ସମରସତ୍ତା , ପର୍ଯ୍ୟାବରଣ ର ସୁରକ୍ଷା, ସ୍ୱଦେଶୀ ରୁ ସ୍ବାବଲମ୍ବୀ ଭାରତ ଓ ଆମମାନଙ୍କର ନାଗରିକ କର୍ତ୍ତବ୍ୟ ବୋଧ କୁ ଆଧାର କରି ପିଲା ମାନଙ୍କ ସମ୍ମୁଖରେ ପ୍ରତିଯୋଗିତା ଦୃଷ୍ଟିରୁ ପ୍ରଶ୍ନ ରଖାଯାଇଥିଲା । ଆଜି ର ପରିସ୍ଥିତି ରେ ଭାରତୀୟ ପାରମ୍ପରିକ ହିନ୍ଦୁ ସଂସ୍କୃତି ସହ ବିଦ୍ୟାର୍ଥୀ ମାନଙ୍କୁ ଯୋଡ଼ି ରଖିବା ପାଇଁ ଏହି ପ୍ରତିଯୋଗିତା ଏକ ପ୍ରଚେଷ୍ଟା ବୋଲି ଆଇ ଏମ ସି ଟି ଓଡ଼ିଶା ର ସାଧାରଣ ସମ୍ପାଦକ ବିଶିଷ୍ଟ ଅର୍ଥନୀତିଜ୍ଞ ନାରାୟଣ ଚୌଧୁରୀ ନିଜ ବକ୍ତବ୍ୟ ରେ କହିଥିଲେ l
କୋଳଥିଆ ସ୍ଥିତ ବୀଣାପାଣି ସ୍କୁଲ ରେ ଆଗାମୀ ରାମ ନବମୀ ଉତ୍ସବ ରେ ସମସ୍ତ କୃତି ବିଦ୍ୟାର୍ଥୀ ମାନଙ୍କୁ ପୁରସ୍କାର ପ୍ରଦାନ କରାଯିବ ବୋଲି ରମେଶ ଜେନା ସୂଚନା ଦେଇଥିଲେ ।
ପ୍ରତିଯୋଗିତା କୁ ସୂଚାରୁ ରୂପେ ପରିଚାଳନା ରେ ବିଚାରକ ଭାବେ ଗୁଣନିଧି ବେହେରା, ବିଶ୍ଵନାଥ ପାତ୍ର, ଡଃ ପଦ୍ମଲୋଚନ , ଅମର ମିଶ୍ର, ହେମନ୍ତ କୁମାର ଭାରିମଲ୍, କେ କେ ରାଓ, ଭାସ୍କର ଶ୍ରୀଚନ୍ଦନ, ଆରତୀ ବୈଶାଖ, ସ୍ମିତା ମହାପାତ୍ର, ମମିତା ମିଶ୍ର, ସୁଷମା ଆର୍ଯ୍ୟ, ଅନୁସୂୟା ବେହେରା, ସୁଚିତ୍ରା ମିଶ୍ର, ସୁଜାତା ନାୟକ, ଅଜୟ ମହାପାତ୍ର, ସରୋଜ ଲେଙ୍କା ସହଯୋଗ ପ୍ରଦାନ କରିଥିଲେ ।
