ବାଲେଶ୍ୱର- ୧୬ ନଂ ଜାତୀୟ ରାଜପଥର ଛପୋଲିଆ ନିକଟରେ ବାଇକକୁ ପଛପଟୁ ଅନ୍ୟ ଏକ ଟମାଟୋ ବୋଝେଇ ପିକଅପ୍ ଭ୍ୟାନ୍ ଧକ୍କା ଦେବା ଫଳରେ ଘଟଣାସ୍ଥଳରେ ଦୁଇ ଜଣଙ୍କର ମୃତ୍ୟୁ ଘଟିଛି । ଦୁର୍ଘଟଣାରେ ଜଣେ ଗୁରୁତର ଆହତ ହୋଇଛନ୍ତି । ମୃତକ ଦ୍ୱୟ ହେଲେ ଚନ୍ଦନ ରାଉତ ଓ ସୀମା । ଗୁରୁତରଙ୍କ ନାମ ସ୍ୱପ୍ନାରାଣୀ ଜେନା । ମୃତାହତ ସମସ୍ତେ ସାଙ୍ଗ ଥିଲେ । ସେମାନଙ୍କ ଘର ଭଦ୍ରକ ଜିଲ୍ଲା ଅସୁରାଳି ଅଂଚଳରେ ।
ଆଜି ପୂର୍ବାହ୍ନ ପ୍ରାୟ ୧୧ଟା ସମୟରେ ଏକ ବାଇକ୍ ଯୋଗେ ଚନ୍ଦନ, ସୀମା ଓ ସ୍ୱପ୍ନାରାଣୀ ଅସୁରାଳିରୁ ପଂଚଲିଙ୍ଗେଶ୍ୱର ଯାଉଥିଲେ । ଏହି ସମୟରେ ଛପୋଲିଆ ନିକଟରେ ଏକ ଟମାଟୋ ବୋଝେଇ ପିକଅପ୍ ଭ୍ୟାନ୍ ସେମାନଙ୍କ ବାଇକକୁ ପଛପଟୁ ଧକ୍କା ଦେଇଥିଲା । ଫଳରେ ଘଟଣାସ୍ଥଳରେ ହିଁ ଚନ୍ଦନ ଓ ସୀମାଙ୍କ ମୃତ୍ୟୁ ଘଟିଥିଲା । ସ୍ୱପ୍ନାରାଣୀଙ୍କୁ ଗୁରୁତର ଅବସ୍ଥାରେ ଉଦ୍ଧାର କରିଥିଲେ ସ୍ଥାନୀୟ ଲୋକେ । ଚିକିତ୍ସା ନିମନ୍ତେ ତାଙ୍କୁ ସୋର ଡ଼ାକ୍ତରଖାନାରେ ଭର୍ତି କରାଯାଇଛି । ପୋଲିସ ଘଟଣାସ୍ଥଳରେ ପହଂଚି ମୃତଦେହ ଜବତ କରିବା ସହ ଏହାକୁ ବ୍ୟବଚ୍ଛେଦ ନିମନ୍ତେ ପଠାଇଛି । ପୋଲିସ ପକ୍ଷରୁ ଏନେଇ ଅଧିକ ତଦନ୍ତ ଜାରୀ ରହିଛି । ଅନ୍ୟପକ୍ଷରେ ପିକଅପ୍ ଭ୍ୟାନ୍ ଦୁର୍ଘଟଣା ଘଟାଇ ସେଠାରୁ ଫେରାର୍ ହୋଇଯାଇଛି ।
