ଜଗତସିଂହପୁର- ଏସଭିଏମ୍ କଲେଜରେ ଗଣ୍ଡଗୋଳ ଘଟଣାରେ ଆଜି ୭ ଜଣଙ୍କୁ ଗିରଫ କରିଛି ଜଗତସିଂହପୁର ସଦର ପୋଲିସ । ତନ୍ମଧ୍ୟରେ କଲେଜର ବାଣିଜ୍ୟ ବିଭାଗର ଅଧ୍ୟାପକ ଧିରେନ ମହାନ୍ତିଙ୍କ ସମେତ ଅନ୍ୟ ୬ ଜଣ ରହିଛନ୍ତି । ଅଭିଯୁକ୍ତ ମାନଙ୍କ ମଧ୍ୟରୁ ୫ ଜଣ କଟକ ଅଂଚଳର ହୋଇଥିବା ନେଇ ଏସଡ଼ିପିଓ ସୂଚନା ଦେଇଛନ୍ତି ।
ତଦନ୍ତରୁ ଗଣ୍ଡଗୋଳ ଘଟଣାରେ ଏମାନଙ୍କର ସମ୍ପୃକ୍ତି ଥିବା ଜାଣିପାରି ଆଜି କଲେଜ ପରିସରରୁ ସମ୍ପୃକ୍ତ ୭ ଜଣଙ୍କୁ ଉଠାଇ ନେଇଥିଲା ପୋଲିସ । ଘଟଣାସ୍ଥଳରୁ ଗୋଟିଏ ସ୍କର୍ପିଓ ଗାଡ଼ି ସହିତ ଏକ ପିସ୍ତଲ ଜବତ ହୋଇଥିଲା । ପରବର୍ତି ସମୟରେ ଅଭିଯୁକ୍ତ ମାନଙ୍କୁ ଗିରଫ କରାଯାଇଥିବା ସୂଚନା ମିଳିଛି ।
ଏଠାରେ ଉଲ୍ଲେଖଯୋଗ୍ୟ ଯେ, ଗତ ୨ ଦିନ ତଳେ କୌଣସି କଥାକୁ ନେଇ କଲେଜର ଜଣେ ଅଧ୍ୟାପକ ଧିରେନଙ୍କୁ ଠେଲାପେଲା କରିଥିଲେ । ଘଟଣାରେ ପ୍ରତିଶୋଧ ପରାୟଣ ଧିରେନ ଆଜି ଏଠାରେ ଗଣ୍ଡଗୋଳ କରାଇବା ଉଦ୍ଦେଶ୍ୟରେ ୫ ଜଣ ଯୁବକଙ୍କୁ ସାଙ୍ଗରେ ଆଣିଥିବା ବେଳେ ପୋଲିସ ସେମାନଙ୍କୁ ଧରିଥିଲା ।
ଅପରପକ୍ଷେ ଘଟଣାର ନିନ୍ଦା କରିବା ସହ ଛାତ୍ରଛାତ୍ରୀ ମାନେ କଲେଜର ମୁଖ୍ୟ ଫାଟକରେ ତାଲା ପକାଇ ପ୍ରତିବାଦ ଜଣାଇଛନ୍ତି ।
