ସ୍ବାଭିମାନ ଅଞ୍ଚଳରେ ମାଓବାଦୀ-ଆଦିବାସୀ ଲଢ଼େଇ : ଉନ୍ନୟନମୂଳକ କାମକୁ ବିରୋଧ କରୁଥିବା ମାଓବାଦୀଙ୍କୁ ଆକ୍ରମଣ : ଜଣେ ମାଓବାଦୀ ନିହତ, ଜଣେ ଆହତ

ଘଟଣା ଅନୁସାରେ ଗୁରୁପ୍ରିୟା ସେତୁ ନିର୍ମାଣ ହେବା ପରେ ଜାନବାଇ ଠାରୁ ଯୋଡାଆମ୍ବ ପର୍ଯ୍ୟନ୍ତ ଦୀର୍ଘ ୧୪ କିଲୋମିଟର ରାସ୍ତା କାମକୁ ତରାନ୍ବିତ କରିଛି ମାଲକାନଗିରି ପୋଲିସ । ବିଏସଏଫ ଯବାନଙ୍କ କଡା ସୁରକ୍ଷା ବଳୟରେ ଚାଲିଛି ରାସ୍ତା କାମ । ଏହି ବିକାଶ ମୂଳକ କାର୍ଯ୍ୟକୁ ବିରୋଧ କରିବା ପାଇଁ ମାଓବାଦୀ ଆଦିବାସୀଙ୍କୁ ପ୍ରବର୍ତ୍ତାଇଥିଲେ। ମାଓ ସଂଗଠନର ୨୦ ରୁ ୨୫ ଜଣ ସଦସ୍ୟ ଶନିବାର ରାତିରେ ପହଞ୍ଚିଥିଲେ ଜନ୍ତୁରାଇ ଗାଁରେ। ଗାଁ ଲୋକେ ନକ୍ସଲଙ୍କ କଥା ନଶୁଣିବାରୁ, ସେମାନେ ଆଦିବାସୀଙ୍କୁ ଭୟଭୀତ କରିବା ଲାଗି ଫାଙ୍କା ଗୁଳି ଚାଳନା କରିଥିଲେ।

ଯାହାର ଜବାବ ଦେବାକୁ ଯାଇ ଆଦିବାସୀ ପଥର ମାଡ କରିବା ସହ ପାରମ୍ପରିକ ଅସ୍ତ୍ରଶସ୍ତ୍ରରେ ପାଲଟା ଆକ୍ରମଣ କରିଥିଲେ । ଏହି ସଂଘର୍ଷରେ ଜଣେ ମାଓନେତାଙ୍କ ମୃତ୍ୟୁ ହେବା ସହ ଅନ୍ୟ ଜଣେ ଗୁରୁତର ଭାବେ ଆହତ ହୋଇଛନ୍ତି । ଆହତ ମାଓବାଦୀକୁ ଧରି ଆଦିବାସୀ ମାନେ ସୁରକ୍ଷାକର୍ମୀଙ୍କୁ ହସ୍ତାନ୍ତର କରିଛନ୍ତି।
ଜନ୍ତୁରାଇ ଗାଁ ଲୋକଙ୍କ ଆକ୍ରମଣରେ ପ୍ରାଣ ହରାଇଥିବା ମାଓବାଦୀ ହେଉଛନ୍ତି ଗୁମ୍ମା ଏରିଆ କମିଟି ମେମ୍ବର ଗଙ୍ଗା ମାଢି। ଏହି ମାଓନେତାଙ୍କ ନାମରେ ରାଜ୍ୟ ସରକାର ପୁର୍ବରୁ ଏକ ଲକ୍ଷ ଟଙ୍କାର ପୁରସ୍କାର ରାଶି ଘୋଷଣା କରିଥିଲେ । ଆହତ ହୋଇ ଧରାପଡିଥିବା ମାଓବାଦୀ ହେଉଛନ୍ତି କୋରାପୁଟ ନାରାୟଣପାଟଣା ନକ୍ସଲ ସଙ୍ଗଠନର ଏସିଏମ । ତାଙ୍କ ଉପରେ ପୂର୍ବରୁ ରାଜ୍ୟ ସରକାର 4 ଲକ୍ଷ ଟଙ୍କାର ପୁରସ୍କାର ରାଶି ଘୋଷଣା କରିଥିଲେ। ଦୁଇ ଜଣ ହାର୍ଡକୋର ମାଓବାଦୀ ଗାଁ ଲୋକଙ୍କ ହାତରେ ଧରା ପଡିବା ପରେ ସେଠାରେ ଦେଖାଦେଇଛି ଉତ୍ତେଜନା। ପୁଣି ଥରେ ଲାଲବାହିନୀ ଜନ୍ତୁରାଇ ଗାଁରେ ପହଞ୍ଚି ପୋଡାଜଳା କରିଛନ୍ତି। ନିରୀହ ଆଦିବାସୀ ଲୋକଙ୍କ ଘର ଦ୍ବାର ଭାଙ୍ଗିବା ସହ ୧୦ଟି ଘରେ ନିଆଁ ଲଗାଇ ଦେଇଛନ୍ତି । ଏହାସହ ୫ଟି ମୋଟର ସାଇକେଲକୁ ମଧ୍ୟ ନିଆଁ ଲଗାଇ ପୋଡି ଦେଇଛନ୍ତି ନକ୍ସଲ । ଫଳରେ ଗାଁ ଲୋକେ ଏବେ ଭୟଭୀତ ହୋଇ ଜୀବନ ବଞ୍ଚାଇବା ପାଇଁ ଗାଁ ଛାଡି ଅନ୍ୟତ୍ର ଚାଲି ଯାଇଛନ୍ତି।
ସରକାରଙ୍କ ଉନ୍ନୟନମୂଳକ କାମରେ ବାଧା ସୃଷ୍ଟି କରିବା ଲାଗି ଯାଇଥିବା ନକ୍ସଲଙ୍କୁ ପ୍ରଥମ ଥର ଲାଗି ଏମିତି ହଟହଟା ହେବାକୁ ପଡିଛି। ସ୍ବାଧୀନତାର ୭୩ ବର୍ଷ ପରେ ନିଜ ଅଞ୍ଚଳ ବିକାଶ ଲାଗି ନକ୍ସଳଙ୍କୁ ଘୋର ବିରୋଧ କରିଛନ୍ତି ସ୍ବାଭିମାନ ଅଞ୍ଚଳର ବାସିନ୍ଦା।