ଖୋର୍ଦ୍ଧା, ଖୋର୍ଦ୍ଧା ତରତୁଆ ସ୍ଥିତ ୪୧ବାଟାଲିୟନ କ୍ୟାମ୍ପସ ପରିସରରେ ମଙ୍ଗଳବାର ଇଣ୍ଡୋ- ତିବ୍ବତ ସୀମା ପୋଲିସ ସୁରକ୍ଷା ବଳ(ଆଇଟିବିପି)ର ୬୩ତମ ପ୍ରତିଷ୍ଠା ଦିବସ ଅନୁଷ୍ଠିତ ହୋଇଯାଇଛି। ଏଥିରେ କେନ୍ଦ୍ର ସ୍ବରାଷ୍ଟ୍ରମନ୍ତ୍ରୀ(ରାଜ୍ୟ) ନିତ୍ୟାନନ୍ଦ ରାୟ ମୁଖ୍ୟଅତିଥି ଭାବେ ଯୋଗଦେଇ ଏହାକୁ ଉଦଘାଟନ କରିଥିଲେ। କ୍ୟାମ୍ପସରେ ଶହୀଦମାନଙ୍କୁ ଶ୍ରଦ୍ଧାଞ୍ଜଳି ସହ ସମ୍ମୀଳିତ ପରେଡରେ ଅଭିଭାଦନ ଗ୍ରହଣ କରିଥିଲେ। ଆଇଟିବିପି ମହାନିର୍ଦ୍ଦେଶକ ରାହୁଲ ରସଗୋତ୍ରା ଆଇଟିଇପିର ଗୌରବମୟ ଇତିହାସ ସମ୍ପର୍କରେ ଉପସ୍ଥିତ ଯବାନ ମାନଙ୍କୁ ସୁଚନା ଦେଇଥିଲେ। ଏହି ଅବସରରେ କେନ୍ଦ୍ରମନ୍ତ୍ରୀ ରାୟ ଆଇଟିବିପି କର୍ମୀଙ୍କୁ ୬୨ବର୍ଷ ଧରି ଉତ୍ସର୍ଗୀକୃତ ସେବା ପାଇଁ ଅଭିନନ୍ଦନ ଜଣାଇଥିଲେ। ଏପରିକି ହିମାଳୟ ସୀମାରେ ନିଜ ଜୀବନକୁ ବାଜି ଲଗାଇ ଆହ୍ବାନ ପୂର୍ଣ୍ଣ ଅବସ୍ଥାରେ ଦେଶର ସୁରକ୍ଷାରେ ଅଦମ୍ୟ ଉତ୍ସାହ, ପ୍ରତିବଦ୍ଧତା ପ୍ରଶଂସା କରିଥିଲେ। ଏହି ଅବସରରେ ସର୍ବଭାରତୀୟ ସ୍ତରରେ ଆଇଟିବିପି ବିଭିନ୍ନ ପ୍ରକଳ୍ପ ଇ- ଡିଜିଟାଲ ମାଧ୍ୟମରେ ଉଦଘାଟନ କରିଥିଲେ। ଭାରତ ସରକାର ଆଇଟିବିପିର ଆଧୁନିକରଣ, ସମସ୍ତ ସୁବିଧା ଉପଲବ୍ଧ ପାଇଁ ପ୍ରତିବଦ୍ଧ। ଶହୀଦଙ୍କ ଉଦ୍ଦେଶ୍ୟରେ ସ୍ମାରକୀ ନିର୍ମାଣ ସହ ପରିବାରଙ୍କୁ ସମସ୍ତ ସୁବିଧା ଯୋଗାଇ ଦିଆଯାଉଛି। ଏହି ଅବସରରେ ଆଇଟିବିପି କଣ୍ଟିଜେଣ୍ଟ, ମହିଳା କଣ୍ଟିଜେଣ୍ଟ, ପର୍ବତାରୋହୀ ଦଳ, ପାରାଟ୍ରାପର ଓ କୁକୁର ସେମାନଙ୍କ ଚିତ୍ତାକର୍ଷକ ପରେଡ ପ୍ରଦର୍ଶନ କରିଥିଲେ। ଏପରିକି ସମରକଳା, ପର୍ବତାରୋହଣ ବିଭିନ୍ନ କୌଶଳ, ଷ୍ଟିଙ୍ଗ ଅପରେଶନ ଦେଖାଇଥିଲେ।
