କନ୍ଧମାଳ- ଏକ ଘରୋଇ ଆମ୍ବୁଲାନ୍ସ ଯୋଗେ ଫୁଲବାଣୀରୁ ଭୁବନେଶ୍ୱର ଗଞ୍ଜେଇ ଚୋରା ଚାଲାଣ ବେଳେ ଫିରିଙ୍ଗିଆ ଥାନା ଭୃଙ୍ଗିଯୋଡ଼ି ଗ୍ରାମପଂଚାୟତ ଅନ୍ତର୍ଗତ କୁହୁଡ଼ା ଗ୍ରାମ ନିକଟରୁ ଏହାକୁ ଧରିବାରେ ସଫଳ ହୋଇଛି ପୋଲିସ । ଯାଂଚ୍ ବେଳେ ଆମ୍ବୁଲାନ୍ସ ଭ୍ୟାନ୍ ନଂ ଓଡ଼ି୦୨-ବିଇ୭୭୬୧ରୁ ଦୁଇଟି ବସ୍ତାରେ ପ୍ୟାକ୍ ଥିବା ୮୨ କେଜି ଗଞ୍ଜେଇ ଜବତ ହୋଇଛି । ଘଟଣାରେ ଆମ୍ବୁଲାନ୍ସଟିକୁ ଜବତ କରିବା ସହ ଗାଡ଼ିର ଡ଼୍ରାଇଭର ଅଜୟ କୁମାର ପ୍ରଧାନକୁ ପୋଲିସ ଗିରଫ କରିଛି । ଅଜୟର ଘର ଖୋର୍ଦ୍ଧା ଜିଲ୍ଲା ଜଙ୍କିଆ ଥାନା ଅଂଚଳରେ ବୋଲି ଜଣାପଡିଛି । ଏସପି ପ୍ରତୀକ ଗୀତାସିଂହଙ୍କ ନିର୍ଦ୍ଦେଶ କ୍ରମେ ଫିରିଙ୍ଗିଆ ପୋଲିସ ପକ୍ଷରୁ ଏହି ଚଢ଼ଉ ହୋଇଥିଲା । ଆଜି ଏନେଇ ଅନୁଷ୍ଠିତ ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇ ଫୁଲବାଣୀ ଉପଖଣ୍ଡ ପୋଲିସ ଅଧିକାରୀ (ଏସଡ଼ିପିଓ) ମହେନ୍ଦ୍ର କୁମାର ମୁର୍ମୁ ଓ ଫିରିଙ୍ଗିଆ ଥାନା ଅଧିକାରୀ ଶ୍ୟାମ ସୁନ୍ଦର ରାଓ ଏହି ସୂଚନା ଦେଇଛନ୍ତି । ଫିରିଙ୍ଗିଆ ଥାନା ପୋଲିସ ଏ ସଂକ୍ରାନ୍ତରେ କେସ୍ ନଂ ୧୧/୨୦ ରେ ଏକ ମାମଲା ରୁଜ୍ଜୁ କରିଛି । ଅଭିଯୁକ୍ତକୁ ଗିରଫ ପରେ କୋର୍ଟଚାଲାଣ କରାଯାଇଥିବା ନେଇ ସୂଚନା ମିଳିଛି ।
