ଏଏସଓ ଚାକିରୀ ବିକ୍ରୀ ହୋଇଥିବା ସମ୍ପର୍କିତ ମୁଖ୍ୟମନ୍ତ୍ରୀଙ୍କ ବିବୃତିକୁ ନେଅ ବିଧାନସଭାରେ ହଟ୍ଟଗୋଳ, ପ୍ରଥମାର୍ଧରେ ଚାଲି ପାରିଲା ନାହିଁ ଗୃହ

ଭୁବନେଶ୍ୱର, ଶୁକ୍ରବାର ଦିନ ବିଧାନସଭାରେ ମୁଖ୍ୟମନ୍ତ୍ରୀ ମୋହନ ମାଝୀଙ୍କ ଦ୍ୱାରା ପୂର୍ବବର୍ତୀ ସରକାରରେ ଏଏସଓ ଚାକିରୀ ବିକ୍ରୀ ହୋଇଥିବା ସମ୍ପର୍କିତ ବକ୍ତବ୍ୟ ପ୍ରତିବାଦରେ ଆଜି ବିଜୁ ଜନତା ଦଳର ବିଧାୟକ ମାନେ ପ୍ରବଳ ବିରୋଧ କରିଛନ୍ତି । ଏହି କାରଣରୁ ଆଜି ବିଧାନସଭାରେ ପ୍ରଥମାର୍ଧରେ ଗୃହ କାର୍ଯ୍ୟ ସ୍ୱାଭବିକ ହୋଇ ପାରି ନାହିଁ । ଏହି ପ୍ରସଙ୍ଗରେ ମୁଖ୍ୟମନ୍ତ୍ରୀଙ୍କ ବକ୍ତବ୍ୟକୁ ବିରୋଧ କରିବା ସହ ମୁଖ୍ୟମନ୍ତ୍ରୀଙ୍କ ବିବୃତି ଦାବି କରି ବିଜେଡି ବିଧାୟକ ମାନେ ହଟ୍ଟଗୋଳ କରିଥିଲେ । ଏହି କାରଣରୁ ଗୃହ ବାରମ୍ବାର ସ୍ଥଗିତ ହୋଇଥିଲା ।

ଆଜି ନିର୍ଧାରିତ କାର୍ଯ୍ୟ ସୂଚୀ ଅନୁସାରେ ସକାଳ 10.30 ମିନିଟରେ ଗୃହ କାର୍ଯ୍ୟ ଆରମ୍ଭ ହୋଇଥିଲା। ବାଚସ୍ପତି ଶ୍ରୀମତୀ ସୁରମା ପାଢୀ ପ୍ରଶ୍ନକାଳ କାର୍ଯ୍ୟକ୍ରମ ଆରମ୍ଭ କରିଥିଲେ । ସେ ବାଲେଶ୍ୱର ବିଧାୟକ ମାନସ ଦତ୍ତଙ୍କ ପ୍ରଶ୍ନର ଉତର ଦେବାକୁ ପୂର୍ତ ବିଭାଗ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନଙ୍କୁ ଡାକିଥିଲେ । ତଦନୁଯାୟୀ ଶ୍ରୀ ହରିଚନ୍ଦନ ପ୍ରଶ୍ନର ଉତର ଦେବା ଆରମ୍ଭ କରିଥିଲେ । ତେବେ ଆରମ୍ଭରୁ ହିଁ ବିଜେଡି ବିଧାୟକ ମାନେ ଗତ କାଲି ମୁଖ୍ୟମନ୍ତ୍ରୀ ଦେଇଥିବା ବକ୍ତବ୍ୟକୁ ବିରୋଧ କରି ନାରାବାଜୀ କରିଥିଲେ । ବିଜେଡି ବିଧାୟକ ମାନେ ଏହି ପ୍ରସଙ୍ଗରେ ଗୃହର ମଧ୍ୟଭାଗକୁ ଆସି ହଟ୍ଟଗୋଳ କରିବା ଆରମ୍ଭ କରି ଦେଇଥିଲେ । ବାଚସ୍ପତି ଶ୍ରୀମତୀ ପାଢୀ ବିଜେଡି ବିଧାୟକ ମାନଙ୍କୁ ନିଜ ନିଜ ଆସନକୁ ଯାଇ ଗୃହ କାର୍ଯ୍ୟରେ ସହଯୋଗ ପ୍ରଦାନ କରିବାକୁ ବାରମ୍ବାର ନିବେଦନ କରିଥିବା ଦେଖିବାକୁ ମିଳିଥିଲା । ହେଲେ ହଟ୍ଟଗୋଳ କରୁଥିବା ବିଜେଡି ବିଧାୟକ ମାନଙ୍କ ଉପରେ ଏହାର କୌଣସି ପ୍ରଭାବ ଦେଖିବାକୁ ମିଳି ନ ଥିଲା ଓ ସେମାନେ ହଟ୍ଟଗୋଳ ଜାରୀ ରଖିଥିଲେ । ବିଜେଡି ମୁଖ୍ୟ ସଚେତକ ପ୍ରମିଳା ମଲିକ କହିଥିଲେ ଯେ ଏଏସଓ ଚାକିରୀ କିଏ ଓ କେଉଁଠି ବିକ୍ରୀ କରିଥିଲେ ସେ ସମ୍ପର୍କରେ ବିବୃତି ଦିଅନ୍ତୁ । ହଟ୍ଟଗୋଳ ନ କମିବାରୁ ବାଚସ୍ପତି ଗୃହକୁ 11.30 ଯାଏ ମୁଲତବୀ ରହିଲା ବୋଲି ଘୋଷଣା କରିଥିଲେ ।

11.30ରେ ପୁଣି ଥରେ ଗୃହ କାର୍ଯ୍ୟ ଆରମ୍ଭ ହୋଇଥିଲା । ଶୂନ୍ୟକାଳ ରେ ବି ସମାନ ସ୍ଥିତି ଦେଖା ଯାଇଥିଲା । ବିରୋଧୀ ଦଳ ମୁଖ୍ୟ ସଚେତକ ପ୍ରମିଳା ମଲିକ ଗୃହରେ ବିବୃତି ରଖି କହିଥିଲେ ମୁଖ୍ୟମନ୍ତ୍ରୀ ଗତକାଲି ଯେଉଁ କଥା କହିଛନ୍ତି ତାର ପ୍ରମାଣ ଦିଅନ୍ତୁ ।

ସେ କହିଥିଲେ ଯେ ମୁଖ୍ୟମନ୍ତ୍ରୀ ବିଲ ଆଲୋଚନା ବେଳେ ଉତ୍ତରରେ କହିଲେ. ଚାକିରୀ ହାଟ ବଜାରରେ ଚାକିରୀ ମିଳୁଥିଲା. 20 ଲକ୍ଷ 30 ଲକ୍ଷ ଦେଲେ ଚାକିରୀ ମିଳୁଛି । ଏହା ଦ୍ୱାରା ଲକ୍ଷ ଲକ୍ଷ ଛାତ୍ର ଛାତ୍ରୀ ପରିଶ୍ରମ କରି ଯୋଗ୍ୟ ପିଲା ଚାକିରୀ ପାଇଛନ୍ତି ତାଙ୍କ ପ୍ରତି ଘୋର ଅପମାନ. ଯେଉଁମାନେ ପ୍ରସ୍ତୁତି କରୁଛନ୍ତି ତାଙ୍କ ମନୋବଳ ଭାଙ୍ଗୁଛି । ଯଦି ପ୍ରମାଣ ଅଛି 6 ମାସ ହେଲା କାହିଁକି ବସିଛନ୍ତି ବୋଲି ସେ କହିଥିଲେ । ସେ କହିଥିଲେ ଯେ, ତାଙ୍କ ପାଖରେ ସିବିଆଇ ଇଡି ଅଛି. ତଦନ୍ତ ନକରି ଚୁପ କାହିଁ ବସିଛନ୍ତି । ମୁଖ୍ୟମନ୍ତ୍ରୀ ଶସ୍ତା ବିବୃତି ରଖନ୍ତୁନି । ତେଣୁ ମୁଖ୍ୟମନ୍ତ୍ରୀ ରଖିଥିବା ବିବୃତିକୁ ବାଦ ଦିଆଯାଉ । ମୁଖ୍ୟମନ୍ତ୍ରୀ ବିବୃତି ରଖନ୍ତୁ କେଉଁ ସଂସ୍ଥା ଲଗେଇକି ସେ ତଦନ୍ତ କରି ଏହି ତଥ୍ୟ ପାଇଲେ । ସେ ମୁଖ୍ୟମନ୍ତ୍ରୀଙ୍କ ଗତକାଲି ବିବୃତି କୁ ଗୃହ ବିବରଣୀ ରୁ ବାଦ ଦେବା ଲାଗି ବାଚସ୍ପତି ଙ୍କ ରୁଲିଂ ଦାବି କରଥିଲେ । ଏହା ପରେ ବିଜେଡି ବିଧାୟକ ମାନେ ଗୃହର ମଧ୍ୟଭାଗକୁ ଚାଲି ଆସିଥିଲେ ହଟ୍ଟଗୋଳ କରିଥିଲେ । ଏହି କାରଣରୁ ବାଚସ୍ପତି ଗୃହକୁ ଅପରାହ୍ନ 4ଟା ଯାଏ ମୁଲତବୀ ଘୋଷଣା କରିଥିଲେ ।