ନୂଆଦିଲ୍ଲୀ– ରାଷ୍ଟ୍ରପତି ଦ୍ରୌପଦୀ ମୁର୍ମୁ ସୋମବାର ଭାରତୀୟ ରାଜସ୍ୱ ସେବାର ପ୍ରଶିକ୍ଷୁ ଅଧିକାରୀଙ୍କୁ କହିଛନ୍ତି ଯେ, ଏହି ନୂଆ ଓ ଗତିଶୀଳ ଯୁଗରେ କର ସଂଗ୍ରହରେ କମ ହସ୍ତକ୍ଷେପ ଓ ପ୍ରଯୁକ୍ତିବିଦ୍ୟାର ଅଧିକ ଉପଯୋଗ କରିବାର ଉଦ୍ୟମ କରାଯିବା ଉଚିତ । ସେ କହିଛନ୍ତି ଯେ, କର ପ୍ରଶାସନର କ୍ଷେତ୍ରରେ ନୂଆ ବିଚାର ଓ ନୂଆ ସମାଧାନ ଆଣିବାର ଦାୟିତ୍ୱ ଯୁବ ଅଧିକାରୀଙ୍କ ଉପରେ ରହିଛି ।
ଭାରତୀୟ ରାଜସ୍ୱ ସେବାର ପ୍ରଶିକ୍ଷୁ ଅଧିକାରୀମାନେ ସୋମବାର ରାଷ୍ଟ୍ରପତି ଭବନରେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ସାକ୍ଷାତ କରିଛନ୍ତି । ଅଧିକାରୀଙ୍କୁ ସଂବୋଧିତ କରି ରାଷ୍ଟ୍ରପତି କହିଛନ୍ତି ଯେ, ଭାରତୀୟ ରାଜସ୍ୱ ସେବା ଆମ ଅର୍ଥବ୍ୟବସ୍ଥାକୁ ଏକ ସମାନ କର ବ୍ୟବସ୍ଥା ତଥା ପ୍ରଶାସନିକ ମୂଲ୍ୟ ମାଧ୍ୟମରେ ଯୋଡିଥାଏ ।ଏହି ସେବା ଦେଶର କର ପ୍ରଶାସନରେ ସମାନତାକୁ ପ୍ରୋତ୍ସାହିତ କରିଥାଏ । ଆଇଆରଏସ ଅଧିକାରୀ ଭାରତ ସରକାର, ବ୍ୟାପାର ଓ ବିଭିନ୍ନ ରାଜ୍ୟର କର ପ୍ରଶାସନ ମଧ୍ୟରେ ଏକ ଗୁରୁତ୍ୱପୂର୍ଣ୍ଣ କଡି ଅଟେ ।
ରାଷ୍ଟ୍ରପତି କହିଛନ୍ତି ଯେ, ସାରା ଦୁନିଆରେ ବଦଳୁଥିବା ସାମାଜିକ-ଆର୍ଥିକ ପରିଦୃଶ୍ୟରେ ଜାତୀୟ ହିତର ଏଜେଣ୍ଡା ଅନେକ ଦୂର ଯାଏ ଅନ୍ତର୍ଜାତୀୟ ଆର୍ଥିକ ସହଯୋଗରୁ ନିର୍ଦ୍ଧାରିତ ହୋଇଥାଏ । ଆଇଆରଏସ ଅଧିକାରୀ ଦେଶର ଆର୍ଥିକ ସୀମାର ସଂରକ୍ଷକ ଅଟନ୍ତି । ସେ ଅଧିକାରୀଙ୍କୁ କହିଛନ୍ତି ଯେ, ତାଙ୍କୁ ସର୍ବଦା ସଚ୍ଚୋଟତା ଓ କର୍ତ୍ତବ୍ୟନିଷ୍ଠାରେ କାମ କରିବାକୁ ପଡିବ । ଅନ୍ୟ ଦେଶ ସହିତ ବ୍ୟବସାୟିକ ସୁବିଧା ବୁଝାମଣାରେ ସେମାନଙ୍କର ଭୂମିକା ଗୁରୁତ୍ୱପୂର୍ଣ୍ଣ ଅଟେ ।
