ଭଦ୍ରକ – ଚରମ୍ପା ବରାଳପୋଖରୀ ରାଉତସାହିରେ ଅଗ୍ନିକାଣ୍ଡ ଘଟି ଗୋଟିଏ ପରିବାରର ତିନି ବଖରା ଘର ଭସ୍ମୀଭୂତ ହୋଇଛି । ପ୍ରାପ୍ତ ଖବରରୁ ଯାହା ଜଣାଯାଏ ଆଜି ପୂର୍ବାହ୍ନ ପ୍ରାୟ ୧୦ ଘଟିକା ସମୟରେ ରାଉତସାହିର ଭାନୁମତୀ ବାରିକ ଘରକାମ କରୁଥିବାବେଳେ ଅଚାନକ ନିଆଁ ଲାଗିଯାଇଥିଲା । ସେ ଏହା ଦେଖି ସଂଜ୍ଞାହୀନ ହୋଇପଡିଥିବାବେଳେ ଚାହୁଁ ଚାହୁଁ ତାଙ୍କର ତିନି ବଖରା ଘର ପୋଡି ପାଉଁଶ ହୋଇଯାଇଥିଲା । ଏହି ଅଗ୍ନିକାଣ୍ଡରେ ସମସ୍ତ ଆସବାବ ପତ୍ର ସହ ଧାନ, ଚାଉଳ ଓ ଅନ୍ୟାନ୍ୟ ସାମଗ୍ରୀ ପୋଡିଯିବା ସହ ଗତକାଲି ବ୍ୟାଙ୍କରୁ ଉଠାଇଥିବା ୯୦ ହଜାର ଟଙ୍କା ମଧ୍ୟ ପାଉଁଶ ହୋଇଯାଇଥିବାର ସୂଚନା ମିଳିଛି । ଗାଁ ଲୋକେ ନିଆଁକୁ ଆୟତ କରିବାକୁ ଚେଷ୍ଟା କରିଥିଲେ ମଧ୍ୟ ସେତେବେଳକୁ ଭାନୁମତି ସର୍ବସ୍ୱାନ୍ତ ହୋଇପଡିଥିଲେ । ପରେ ଚରମ୍ପାରୁ ଦମକଳ ବାହିନୀର ଦୁଇଟି ଗାଡି ପହଂଚି ନିଆଁକୁ ଆୟତ କରିଥିଲେ । ସେତେବେଳକୁ ସବୁ ପୋଡି ପାଉଁଶ ହୋଇଯାଇଥିଲା । ଏହି ପରିବାରଟି ଅତ୍ୟନ୍ତ ଦରିଦ୍ର ଥାଇ ଦିନ ମଜୁରିଆ ଭାବେ କାଳ କାଟୁଥିବାରୁ ଅଗ୍ନିକାଣ୍ଡଟି ତାଙ୍କୁ ସଂପୂର୍ଣ୍ଣ ବେସାହାରା କରିଦେଇଛି । ତେବେ ନ୨ମ୍ବର ୱାର୍ଡର ପୂର୍ବତନ କାଉନ୍ସିଲର ରଂଜନ ଜେନା ଏହି ପରିବାରଟିକୁ କିଛି ଆର୍ଥିକ ସହାୟତା ସହ ଲୁଗାପଟା, ଚାଉଳ ସାହାଯ୍ୟ କରିଥିବାବେଳେ ଗ୍ରାମବାସୀମାନେ ଶୀତଦିନରେ ଏହି ପରିବାରଟିକୁ ତୁରନ୍ତ ସରକାରୀ ସହାୟତା ଯୋଗାଇ ଦେବାକୁ ଦାବି କରିଛନ୍ତି ।
