ସୁକମା -ଛତିଶଗଡର ସୁକମା ଜିଲ୍ଲାରେ ଜଗରଗୁଣ୍ଡା ସାପ୍ତାହିକ ବଜାରରେ ଡ୍ୟୁଟିରେ ନିୟୋଜିତ ପୋଲିସର ଦୁଇ ଯବାନଙ୍କ ଉପରେ ନକ୍ସଲମାନେ ଏକ ତୀକ୍ଷ୍ମ ଅସ୍ତ୍ରରେ ଆକ୍ରମଣ କରି ଆହତ କରିଥିଲେ।ଆହତ ଦୁଇ ଯବାନଙ୍କୁ ଜଗରଗୁଣ୍ଡା ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରରେ ପ୍ରଥମିକ ଚିକିତ୍ସା ପରେ ହେଲିକ୍ୟାପ୍ଟର ଯୋଗେ ବିମାନ ଉଡାଣ କରି ଉନ୍ନତ ଚିକିତ୍ସା ପାଇଁ ନେଇଯିବାକୁ ପ୍ରସ୍ତୁତି ଚାଲିଛି।ନକ୍ସଲମାନେ ଉଭୟ ଆହତ ଯବାନଙ୍କ ରାଇଫଲ ଲୁଟ କରିଥିଲେ।ସୁକମା ଏସପି କିରଣ ଚୌହାନ ଘଟଣାର ନିଶ୍ଚିତ କରିଛନ୍ତି।ମିଳିଥିବା ସୁଚନା ଅନୁଯାୟୀ ରବିବାର ସକାଳେ ଜଗରଗୁଣ୍ଡାରେ ଅନୁଷ୍ଠିତ ହେବାକୁ ଥିବା ସାପ୍ତାହିକ ବଜାର ପାଇଁ ଯବାନଙ୍କୁ ନିୟୋଜିତ କରାଯାଇଥିଲା।ଏହି ସମୟରେ ନକ୍ସଲମାନଙ୍କ ସ୍ମଲ ଏକ୍ସନ ଟିମ ଦୁଇ ଯବାନ କଟଟମ ଦେବା ଏବଂ ସୋଡି କନ୍ନା ଉପରେ ହଠାତ ଆକ୍ରମଣ କରିଥିଲେ।ଯବାନମାନେ କିଛି ବୁଝିବା ପୁର୍ବରୁ ନକ୍ସଲମାନେ ଯବାନଙ୍କୁ ଗୁରୁତର ଭାବେ ଆଘାତ କରିଥିଲେ।ଏହି ଘଟଣା ଘଟାଇବା ପରେ ନକ୍ସଲମାନେ ପଳାଇ ଯାଇଥିଲେ।
