ଖୋର୍ଦ୍ଧା– ବେଆଇନ ବାଘଛାଲ ଜବତ ଘଟଣାରେ ଏସଟିଏଫ ଭୁବନେଶ୍ଵର ଦ୍ୱାରା ବାଣପୁର ଥାନା ଅନ୍ତର୍ଗତ ଗମ୍ଭାରୀମୁଣ୍ଡା ଅଞ୍ଚଳରୁ ଗିରଫ ହୋଇଥିବା ଅଭିଯୁକ୍ତ ପଦ୍ମପୁର ଗ୍ରାମର ରତ୍ନାକର ସାହୁ ଦୋଷୀ ସାବ୍ୟସ୍ତ ହୋଇଛନ୍ତି । ବୁଧବାର ବାଣପୁର ପ୍ରଥମ ଶ୍ରେଣୀ ବିଚାର ବିଭାଗୀୟ ବିଚାରପରି ସ୍ନାତକୀ ଦାସ ସମସ୍ତ ସାକ୍ଷ୍ୟ ପ୍ରମାଣକୁ ଭିତ୍ତି କରି ଅଭିଯୁକ୍ତଙ୍କୁ ୩ ବର୍ଷ ସଶ୍ରମ କାରାଦଣ୍ଡ ସହ ୧୦ ହଜାର ଟଙ୍କାର ଜରିମାନା ପ୍ରଦାନ କରିବାର ରାୟ ଶୁଣାଇଛନ୍ତି।
ସୂଚନା ମୁତାବକ, ୨୦୨୧ ଡିସେମ୍ବର ୨୯ ରେ ବେଆଇନ ବାଘଛାଲ ଚାଲାଣ ଅଭିଯୋଗରେ ଗମ୍ଭାରୀମୁଣ୍ଡା ରାସ୍ତାରୁ ଅଭିଯୁକ୍ତ ରତ୍ନାକରଙ୍କୁ ଏସଟିଏଫ ଭୁବନେଶ୍ଵର ବାଘଛାଲ ସହ ଗିରଫ କରିଥିଲା। ବାଣପୁର ପ୍ରଥମ ଶ୍ରେଣୀ ବିଚାର ବିଭାଗୀୟ ଅଦାଲତ ମାମଲାର ଶୁଣାଣି କରି ୧୦ ଜଣ ସାକ୍ଷୀ ଏବଂ ୨୪ଟି ଦସ୍ତାବିଜ ବଳରେ ଅଭିଯୁକ୍ତକୁ ଦୋଷୀ ସାବ୍ୟସ୍ତ କରିଛନ୍ତି। ଉକ୍ତ ମାମଲାର ତଦନ୍ତକାରୀ ଅଧିକାରି ଇନ୍ସପେକ୍ଟର ଦିପ୍ତୀରଞ୍ଜନ ପ୍ରଧାନ ଥିବାବେଳେ ସରକାରଙ୍କ ପକ୍ଷରୁ ଆଇନଜୀବୀ ପ୍ରାଚୀପ୍ରଭା ନନ୍ଦ ଓ ଜଳଧର ପ୍ରଧାନ ମାମଲାକୁ ପରିଚାଳନା କରୁଥିଲେ।
