ଘଟଗାଁ, ଗୁଣି ଗାରେଡି ସନ୍ଦେହରେ ଜଣେ ମହିଳାଙ୍କ ତଣ୍ଟିକାଟି ହତ୍ୟା କରିବା ପରେ ହତ୍ୟାକାରୀ ଫେରାର ହେଇଯାଇଛି । କେନ୍ଦୁଝର ଜିଲ୍ଲା ଘସିପୁରା ଥାନା ଅନ୍ତର୍ଗତ ଖାଳିଆମେଣ୍ଟା ପଞ୍ଚାୟତ ନିଆଳି ଝରଣ ଗ୍ରାମର ମନୋଜ ହେମ୍ରମଙ୍କ ସ୍ତ୍ରୀ ସାଲେକ୍ ହେମ୍ରମ (୪୫) ରବିବାର ସନ୍ଧ୍ୟା ୮ ଟା ସମୟରେ ନିଜ ଘରେ ଥିବା ବେଳେ ଜଣେ ଅଜଣା ବ୍ୟକ୍ତି ସାଲେକ୍ ହେମ୍ରମ (୪୫) କୁ ଏକ ଧାରୁଆ ଅସ୍ତ୍ରରେ ତଣ୍ଟିକାଟି ହତ୍ୟା କରିବା ପରେ ଆଖି ପିଛୁଳାକେ ସେ ସ୍ଥାନରୁ ଚାଲିଯାଇଥିଲା । ଏହି ସମୟରେ ଗ୍ରାମର ଅପର ପକ୍ଷରେ ଏକ ଭୋଜି ହେଉଥିଲା । ଉକ୍ତ ଭୋଜିରେ ସାଲେକ୍ ହେମ୍ରମଙ୍କ ସ୍ଵାମୀ ମନୋଜ ହେମ୍ରମ ମଧ୍ୟ ଉପସ୍ଥିତ ଥିଲେ । ଭୋଜି ସାରି ବିଳମ୍ବିତ ରାତିରେ ମନୋଜ ଘରେ ପହଞ୍ଚିବା ପରେ ସ୍ତ୍ରୀ ସାଲେକ୍ ହେମ୍ରମକୁ କେହି ଜଣେ ତଣ୍ଟିକାଟି ହତ୍ୟା କରିବା କଥା ଜାଣିବାକୁ ପାଇଥିଲେ । ଏ ସଂପର୍କରେ ଘସିପୁରା ଥାନା ପୋଲିସ କୌଣସି ସୁତ୍ରରୁ ଖବର ପାଇ ଘଟଣା ସ୍ଥଳରେ ପହଞ୍ଚି ମୃତଦେହ ଉଦ୍ଧାର କରିଥିବା ବେଳେ ଗ୍ରାମର ୫ଜଣଙ୍କୁ ଅଟକ ରଖି ପଚରା ଉଚୁରା କରୁଛି । ପୋଲିସ ଘଟଣାସ୍ଥଳରେ ପହଂଚି ସାଇଣ୍ଟିଫିକ୍ ଟିମ ଦ୍ଵାରା ତଦନ୍ତ କାର୍ଯ୍ୟ ଆରମ୍ଭ କରିଥିବା ବେଳେ ଶବକୁ ଜବତ କରି ବ୍ୟବଚ୍ଛେଦ ପାଇଁ ଆନନ୍ଦପୁର ଉପଖଣ୍ଡ ମୁଖ୍ୟ ଚିିକିତ୍ସାଳୟକୁ ପଠାଇଛି । ଘସିପୁରା ଥାନା ଏସ. ଆଇ .ଆଲୋକ କୁମାର ପରିଡା ଘଟଣାର ତଦନ୍ତ କରୁଥିବାବେଳେ ହତ୍ୟାର କାରଣ ଅଷ୍ପଷ୍ଟ ରହିଛି । ଘସିପୁରା ଥାନା କେଶ ନଂ ୩୩୭/୨୪ରେ ଏକ ଅପମୃତ୍ୟୁ ମାମଲା ରୁଜୁ କରି ଘଟଣାର ଅଧିକ ତଦନ୍ତ କରୁଥିବା ଜଣାପଡିଛି I
