ପେଶାୱର, ଆଫଗାନିସ୍ତାନର ସୀମାକୁ ଲାଗିକରି ପାକିସ୍ତାନର ଖୈବର ପଖ୍ତୁନଖ୍ୱାର କୁରମ ଜିଲ୍ଲାରେ ଦୁଇ ଆଦିବାସୀ ସମୂହ ମଧ୍ୟରେ ଜମିକୁ ନେଇ ହୋଇଥିବା ସଶସ୍ତ୍ର ସଂଘର୍ଷରେ 30ଜଣଙ୍କ ମୃତ୍ୟୁ ହୋଇଥିବା ବେଳେ 145ଜଣ ଆହତ ହୋଇଛନ୍ତି । ରବିବାର ଅଧିକାରୀଙ୍କ ପକ୍ଷରୁ ଏହି ସୂଚନା ମିଳିଛି । ଅଧିକାରୀଙ୍କ ମୁତାବକ ଉପର କୁରମ ଜିଲ୍ଲାର ବୋଶୋରା ଗାଁରେ 5ଦିନ ପୂର୍ବରୁ ଭୀଷଣ ସଂଘର୍ଷ ଆରମ୍ଭ ହୋଇଥିଲା । ଏଥିରେ 30ଜଣଙ୍କ ମୃତ୍ୟୁ ହୋଇଛି । ଗାଁର ବୟସ୍କ ଓ ସେନା, ପୋଲିସ ଓ ଜିଲ୍ଲା ପ୍ରଶାସନ ସହାୟତାରେ ଆହତଙ୍କୁ ମେଡିକାଲରେ ଭର୍ତ୍ତି କରାଯାଇଥିବା ବେଳେ ଆଦିବାସୀଙ୍କୁ ବୁଝାସୁଝା କରାଯାଇଛି । ତେବେ କିଛି ଅଂଚଳରେ ଏବେ ବି ଗୁଳି ବିନିମୟ ଜାରି ରହିଛି ।
