ଜୟପୁର , ଜୟପୁର ସଦର ପୋଲିସ୍ ଥାନା ଅନ୍ତର୍ଗତ ବ୍ରାହ୍ମଣୀ ଗାଁର ପେଟ୍ରୋଲ୍ ପମ୍ପ୍ରେ ଦାଦାଗିରି କରି ଜଣେ ଅଭିଯୁକ୍ତକୁ ଗିରଫ କରିଛି ପୋଲିସ । ଗିରଫ ଅଭିଯୁକ୍ତ ଜଣକ ହେଲା ଜୟପୁର ବ୍ଳକ ଅଧିନସ୍ଥ କୁସୁମୁପୁଟ ବ୍ରାହ୍ମଣୀଗାଁର ମିନା ବାରିକ (୩୫) । ପୋଲିସ୍ ସୂଚନା ଅନୁସାରେ ସେ ଗତକାଲି ମଧ୍ୟାହ୍ନରେ ବ୍ରାହ୍ମଣୀଗାଁରେ ରହିଥିବା ମହାପାତ୍ର ଫିଲିଂ ଷ୍ଟେସନ୍କୁ ଯାଇ ନିଜ ଗ୍ଲେମର୍ ବାଇକ୍ରେ ପେଟ୍ରୋଲ୍ ଭରିବାକୁ କହିଥିଲେ । ପରେ ପେଟ୍ରୋଲ୍ ବାବଦ ଅର୍ଥ ମାଗିବାରୁ ବିକ୍ରେତାଙ୍କୁ ମାରିବା ଧମକ ଦେଇଥିଲେ । ଏହାକୁ ନେଇ ପେଟ୍ରୋଲ୍ ଟ୍ୟାଙ୍କ୍ ମାଲିକ ସବ୍ୟସାଚୀ ମହାପାତ୍ର ଜୟପୁର ଟାଉନ୍ ଥାନାରେ ଲିଖିତ ଅଭିଯୋଗ କରିବା ସହ ସିସି ଟିଭି କ୍ୟାମେରାର ବିବରଣୀ ପ୍ରଦାନ କରିଥିଲେ । ପୂର୍ବରୁ ମଧ୍ୟ ସେ ଏଭଳି କରିଥିବା କହିଥିଲେ । ଏହାକୁ ନେଇ ପୋଲିସ୍ ଏକ ଏଫ୍ଆଇଆର୍ ନଂ ୨୩୦ ମାମଲା ରୁଜୁ ସହ ତତନ୍ତ ଆରମ୍ଭ କରିଥିଲେ । ଏଥିରେ ଆଜି ମିନା ବାରିକକୁ କୋର୍ଟ ଚାଲାଣ କରାଯାଇଥିବା ବେଳେ ତାଙ୍କ ବିରୁଦ୍ଧରେ ଭାରତୀୟ ନ୍ୟାୟ ସଂହିତାର ଧାରା ୩୦୯(୪) ଧାରା ଅନୁସାରେ ମାମଲା ରୁଜୁ ହୋଇଥିବା ଜୟପୁର ସଦର ଥାନା ଅଧିକାରି ଇଶ୍ୱର ତାଣ୍ଡି ସୂଚନା ଦେଇଛନ୍ତି ।
