ଶ୍ରୀନଗର- କୁପୱାଡା ଜିଲ୍ଲାର କେରନ ସେକ୍ଟରରେ ନିୟନ୍ତ୍ରଣ ରେଖାରେ ହୋଇଥିବା ଗୁଳି ବିନିମୟରେ ନିହତ ହୋଇଥିବା ଦୁଇ ଆତଙ୍କବାଦୀ ବିଦେଶୀ ବୋଲି ଶୁକ୍ରବାର ସେନା ପକ୍ଷରୁ କୁହାଯାଇଛି । ପ୍ରତିରକ୍ଷା ମୁଖପାତ୍ର ବୟାନରେ କହିଛନ୍ତି ଯେ, ଜୁଲାଇ 17ରେ ଜମ୍ମୁ-କଶ୍ମୀର ପୋଲିସକୁ ବିଶ୍ୱସ୍ତସୂତ୍ରରୁ ସୂଚନା ମିଳିଥିଲା । ଗୁଇନ୍ଦା ଏଜେନ୍ସି ପକ୍ଷରୁ କୁହାଯାଇଥିଲା ଯେ ବିଦେଶୀ ଆତଙ୍କବାଦୀଙ୍କ ଏକ ଗୋଷ୍ଠୀ କେରନ ସେକ୍ଟରରୁ ଅନୁପ୍ରବେଶ କରିବାର ସମ୍ଭାବନା ରହିଛି । ମୁଖପାତ୍ରଙ୍କ ଅନୁସାରେ ଜୁଲାଇ 18 ତାରିଖ ସାଢେ 12ଟା ବେଳେ ନିୟନ୍ତ୍ରଣ ରେଖା ନିକଟରେ ସୈନିକମାନେ ଘଂଚ ବୁଦା ମଧ୍ୟରେ ଦୁଇ ଆତଙ୍କବାଦୀଙ୍କୁ ଦେଖିଥିଲେ । ଅନୁପ୍ରବେଶ କରୁଥିବା ଆତଙ୍କବାଦୀଙ୍କୁ ଚେତାବନୀ ଦିଆଯାଇଥିଲା କିନ୍ତୁ ସେମାନେ ଗୁଳି ଚଳାଇଥିଲେ, ଏହାପରେ ଉଭୟଙ୍କ ମଧ୍ୟରେ ଗୁଳି ବିନିମୟ ହୋଇଥିଲା । ଗୁଳି ବିନିମୟରେ ଦୁଇ ଆତଙ୍କବାଦୀଙ୍କ ମୃତ୍ୟୁ ହୋଇଥିବା ବେଳେ ସେମାନଙ୍କ ଠାରୁ ଅସ୍ତ୍ରଶସ୍ତ୍ର ଓ ଗୋଟିଏ ପାକିସ୍ତାନୀ ପରିଚୟ ପତ୍ର ଜବତ କରାଯାଇଛି ।
