ବୌଦ୍ଧ, ସିଆରପିଏଫ ଜବାନଙ୍କ ପରଲୋକ । ସିଆରପିଏଫ ଜବାନ ନରେନ୍ଦ୍ର କୁମାର ରାଜଙ୍କ ଶନିବାର ରାତିରେ କଟକ ବଡ ଡାକ୍ତରଖାନାରେ ପରଲୋକ ହୋଇଛି । ତାଙ୍କ ଘର ଅନୁଗୁଳ ଜିଲ୍ଲା କିଆକଟା ଥାନା ଅନ୍ତର୍ଗତ ଝୁରିକଟା ଗ୍ରାମ ହୋଇଥିବାବେଳେ ତାଙ୍କ ପରିବାର ବୌଦ୍ଧ ସହର ଆନନ୍ଦ ବିହାର ଅଂଚଳରେ ରହୁଥିଲେ । ତାଙ୍କର ବିୟୋଗ ଖବର ପ୍ରଚାରିତ ହେବା ମାତ୍ରେ ନିଜ ପୈତୃକ ଗ୍ରାମ ଝୁରିକଟା ସହ ଆନନ୍ଦ ବିହାର ଅଂଚଳରେ ଶୋକର ଛାୟା ଖେଳି ଯାଇଥିଲା । ସେ ସମ୍ବଲପୁର ଜିଲ୍ଲାରେ କାର୍ଯ୍ୟରତ ଥିବାବେଳେ କିଛିଦିନ ହେବ ଅସୁସ୍ଥ ହୋଇ କଟକ ବଡ ଡାକ୍ତରଖାନାରେ ଚିକିତ୍ସିତ ହେଉଥିଲେ । କଟକରେ ଶନିବାର ରାତିରେ ତାଙ୍କର ପରଲୋକ ହୋଇଯାଇଥିଲା । ସିଆରପିଏଫ ପକ୍ଷରୁ ତାଙ୍କ ମରଶରୀରକୁ ବୌଦ୍ଧ ଆନନ୍ଦ ବିହାରକୁ ଅଣାଯାଇଥିଲା । ବୌଦ୍ଧ ପୁଲିସ ପକ୍ଷରୁ ସ୍ଵର୍ଗତ ଯବାନଙ୍କୁ ଶେଷ ସମ୍ମାନ ପ୍ରଦର୍ଶନ କରାଯାଇଥିଲା । ଆତ୍ମୀୟପରିଜନ ଶେଷ ଦର୍ଶନ କରିବା ପରେ ବୌଦ୍ଧ ରାଜଘାଟ ଠାରେ ସ୍ଵର୍ଗତ ଯବାନଙ୍କୁ ସିଆରପିଏଫ ପକ୍ଷରୁ ଗାର୍ଡ ଅଫ ଅନର ଦିଆଯାଇଥିଲା । ତାପରେ ପରିବାର ପକ୍ଷରୁ ଅନ୍ତ୍ୟେଷ୍ଟିକ୍ରିୟା ସମାପନ କରାଯାଇଥିଲା । ତାଙ୍କର ଦୁଇଟି ଝିଅ ଥିବା ବେଳେ ବଡ ଝିଅ ଦିପ୍ତୀମୟୀ ମୁଖାଗ୍ନି ଦେଇଥିଲେ ।
