ଜୟପୁର, ଓଡ଼ିଶା ଅମଲା ସଂଘର ଏକ ସାମ୍ବାଦିକ ସମ୍ମିଳନୀ ଜୟପୁର ଯାଦବ ଭବନ ଠାରେ ଅନୁଷ୍ଠିତ ହୋଇଯାଇଛି । ଓଡ଼ିଶା ଅମଲା ସଂଘ ସଭାପତି ଶଶୀଭୂଷଣ ଦାଶ୍ ସାମ୍ବାଦିକ ସମ୍ମିଳନୀ କରି ମୁଖ୍ୟତଃ ୨ଟି ବିଷୟରେ ପ୍ରଶାସନର ଦୃଷ୍ଟି ଆକର୍ଷଣ କରିଥିଲେ । ପ୍ରଥମ ବିଷୟ ଓଡିଶା ଅମଲା ସଂଘର ପୂର୍ବତନ ସଭାପତି ଓ ସମ୍ପାଦକ ଅମଲା ଭବନ ଓ ଅମଲା ପାଣ୍ଠିର ଦାୟିତ୍ଵ ହସ୍ତାନ୍ତର ନ କରି ବର୍ତ୍ତମାନ ଅମଲା ଭବନକୁ ରାଜସ୍ବ ଅମଲା ସଂଘର କିଛି କର୍ମକର୍ତ୍ତା ନିଜ ଅକ୍ତିଆରରେ ରଖି ଅମଲା ଭବନକୁ ବିଭିନ୍ନ କାର୍ଯ୍ୟରେ ଲଗାଇବା ସହିତ ଅମଲା ପାଣ୍ଠିର ଲକ୍ଷ ଲକ୍ଷ ଟଙ୍କା ହେରଫେର କରିଥିବା ନେଇ ଅଭିଯୋଗ କରିଥିଲେ ।
ଏନେଇ ଜିଲ୍ଲା ସଂଘ ଓ ରାଜ୍ୟ ସଂଘ ବାରମ୍ବାର ସେମାନଙ୍କୁ ଦାୟିତ୍ଵ ହସ୍ତାନ୍ତର କରିବା ନିମନ୍ତେ ପତ୍ରାଳପ କରିଥିଲେ ମଧ୍ୟ ସେମାନେ ବିଭିନ୍ନ ଆଳ ଦେଖାଇ ଦାୟିତ୍ଵ ହସ୍ତାନ୍ତର କରୁନଥିବା ଯୋଗୁଁ ଜିଲ୍ଲା ସଂଘ ସେମାନଙ୍କ ନାମରେ ବାରମ୍ବାର କୋରାପୁଟ ଟାଉନ ଥାନାରେ ଏତଲା ଦେଇଥିଲେ କିନ୍ତୁ ଏଥିରେ ଥାନା ଅଧିକାରୀ କୌଣସି ପ୍ରକାର ପଦକ୍ଷେପ ନେଇନଥିଲେ କାରଣ ଏହା ସଂଘ ହିଁ ନିଷ୍ପତ୍ତି ନେବେ କହିଥିଲେ ।
ବାରମ୍ବାର ଜିଲ୍ଲା ସଂଘ, ରାଜ୍ୟ ସଂଘ ଓ ଗୃହ ବିଭାଗ ଏ ନେଇ ଜିଲ୍ଲାପାଳ କୋରାପୁଟ, ଆରକ୍ଷୀ ଅଧିକ୍ଷକ ଓ ଟାଉନ ଥାନା ଅଧିକାରୀଙ୍କ ଦୃଷ୍ଟି ଆକର୍ଷଣ କରିଥିଲେ ମଧ୍ୟ ଏ ଦିଗରେ କୌଣସି କ୍ଷେତ୍ରରୁ କୌଣସି ପଦକ୍ଷେପ ନିଆଯାଇନଥିବା ବିଷୟ ଶ୍ରୀ ଦାଶ ସାମ୍ବାଦିକ ସମ୍ମିଳନୀରେ ପ୍ରକାଶ କରିଥିଲେ। ଅପରପାର୍ଶ୍ଵରେ ରାଜସ୍ବ ବିଭାଗର କିଛି କର୍ମଚାରୀ ଜିଲ୍ଲାପାଳଙ୍କ ଉଦ୍ଦେଶ୍ୟରେ ପ୍ରାପ୍ତ ହୋଇଥିବା ସମସ୍ତ ପତ୍ର ଚପେଇ ରଖି ଜିଲ୍ଲାପାଳଙ୍କ ଦୃଷ୍ଟିକୁ ନେଇ ନଥିବା ସେ ଅଭିଯୋଗ କରିଥିଲେ । ଦୀର୍ଘ ଦିନ ଧରି ଜିଲ୍ଲାପାଳଙ୍କ କାର୍ଯ୍ୟାଳୟରେ କାର୍ଯ୍ୟରତ ରାଜସ୍ବ ବିଭାଗର କର୍ମକର୍ତ୍ତା ସେମାନେ ନିଜ ଇଚ୍ଛାରେ ଆଖ ପାଖ ଅଞ୍ଚଳକୁ ବଦଳି ହୋଇ ଯାଇ ପୁଣି ୪ ରୁ ୬ ମାସ ପରେ କର୍ମାନ୍ତର ପ୍ରେରଣ ହୋଇ ଆସି ପୁଣି ପୂର୍ବ ସ୍ଥାନକୁ ବଦଳି ହୋଇ ଆସି ବିଭିନ୍ନ ଅନୈତିକ କାର୍ଯ୍ୟକଳାପ ସହିତ ପ୍ରଭାବ ବିସ୍ତାର କରି ମନ ମୁତାବକ କାର୍ଯ୍ୟ କରି ଆସୁଥିବା ଶ୍ରୀ ଦାଶ ଅଭିଯୋଗ କରିଥିଲେ। ୨୦୧୯ ମସିହାରୁ ବିଭାଗୀୟ ଅଧିକାରୀଙ୍କୁ ସଂସ୍ଥାପନ ଅଧିକାରୀ ପଦବୀରେ ପଦୋନ୍ନତି ଦେବା ପାଇଁ ସରକାର ଆଦେଶ କରିଥିଲେ ମଧ୍ୟ ଏଇ କିଛି କୁଚକ୍ରାନ୍ତକାରି ମାନଙ୍କ ଯୋଗୁଁ ବହୁ ବିଭାଗୀୟ ଅଧିକାରୀ ପଦୋନ୍ନତି ପାଇବାରୁ ବଞ୍ଚିତ ହୋଇଛନ୍ତି ଆଉ ଏଥି ମଧ୍ୟରେ ବହୁ ବିଭାଗୀୟ ଅଧିକାରୀ ଚାକିରିରୁ ଅବସର ଗ୍ରହଣ କରିଥିବା କଥା ଶ୍ରୀ ଦାଶ ସାମ୍ବାଦିକ ସମ୍ମିଳନୀରେ ପ୍ରକାଶ କରିଥିଲେ ।
ଜିଲ୍ଲା ପାଳଙ୍କ କାର୍ଯ୍ୟାଳୟ ଅଧିନରେ କାର୍ଯ୍ୟରତ ବହୁତ କୁଚକ୍ରାନ୍ତକାରି ରାଜସ୍ବ ବିଭାଗର ଅମଲା ବର୍ଷ ବର୍ଷ ଧରି ଗୋଟିଏ ସ୍ଥାନରେ କାର୍ଯ୍ୟ କରୁଥିବା ଓ ନିଯୁକ୍ତି ଠାରୁ ମଧ୍ୟ ଗୋଟିଏ ସ୍ଥାନରେ ରହିବା ସହିତ ଅଧିକାରୀଙ୍କ ସରକାରୀ ଗାଡ଼ି ବ୍ୟବହାର କରୁଥିବା ଶ୍ରୀ ଦାଶ ଅଭିଯୋଗ ଆଣି ଏହାର ତଦନ୍ତ କରିବା ପାଇଁ ସରକାରଙ୍କ ଦୃଷ୍ଟି ଆକର୍ଷଣ କରିଥିଲେ ।
ଶେଷରେ ଶ୍ରୀ ଦାଶ ସମସ୍ତ ବିଷୟରେ ତଦନ୍ତ କରିବା ସହିତ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ନିମନ୍ତେ ଦାବି କରିଥିଲେ ଯଦି ଖୁବ୍ ଶୀଘ୍ର ଅମଲା ଭବନର ଦାୟିତ୍ଵ ହସ୍ତାନ୍ତର ନହୁଏ ତାହେଲେ ତା ୧୭.୦୭.୨୦୨୪ ରିଖ ଦିନ ରାଜ୍ୟ ସଂଘର କର୍ମକର୍ତ୍ତା, ଜିଲ୍ଲା ସଂଘର ସମସ୍ତ ସଦସ୍ୟ, ଆଇନ୍ ପରାମର୍ଶ ଦାତା ଓ ମିଡ଼ିଆ ପ୍ରତିନିଧି ମାନଙ୍କ ଉପସ୍ଥିତିରେ ତାଲା ଭାଙ୍ଗି ଦାୟିତ୍ଵ ଗ୍ରହଣ କରିବା ନେଇ ଘୋଷଣା କରିଥିଲେ ।
ଏହି ସାମ୍ବାଦିକ ସମ୍ମିଳନୀ ସମୟରେ ଓଡ଼ିଶା ଅମଲା ସଂଘ ସମ୍ପାଦକ ସଞ୍ଜୟ କୁମାର ପଣ୍ଡା, ସାଙ୍ଗଠନିକ ସମ୍ପାଦକ କେ ସୁବାସ ଚନ୍ଦ୍ର ଆଚାରି, ଉପଦେଷ୍ଟା ବୃନ୍ଦାବନ ପଣ୍ଡା, ଉପ ସଭାପତି ଜଗନ୍ନାଥ ମାଝୀ, କାଳି ପ୍ରସାଦ ମିଶ୍ର, ଗୁପ୍ତ ପ୍ରସାଦ ପାଢ଼ୀ, କୈଳାସ ସାମନ୍ତରାୟ, ଶିବରାମ ଦାଶ୍, ଜଗେନ୍ଦ୍ର ଚୌଧୁରୀ, ପ୍ରମୋଦ କୁମାର ଭୂୟାଁ, ସତ୍ୟ ରଞ୍ଜନ ତ୍ରିପାଠୀ, ତ୍ରିନାଥ ପଣ୍ଡା, ପ୍ରତିକ ମିଶ୍ରଙ୍କ ସମେତ ବହୁ ବରିଷ୍ଠ ସଦସ୍ୟ ଯୋଗଦାନ କରିଥିଲେ ।
