ସମ୍ବଲପୁର,ଟେଲର ଦୋକାନରେ ପଶି ମା ଝିଅଙ୍କୁ ଛୁରୀରେ ଆକ୍ରମଣ କରିଛନ୍ତି ଦୁର୍ବୃତ । ସମ୍ବଲପୁର ଜିଲ୍ଲା ଅଇଁଠାପାଲି ଥାନା ଅନ୍ତର୍ଗତ ଦାନିପାଲି ଅଂଚଳରେ ଘଟିଛି ଏଭଳି ମରଣାନ୍ତକ ଆକ୍ରମଣ ଘଟଣା । ଗୁରୁତର ମା ଝିଅଙ୍କୁ ପ୍ରଥମେ ସଦର ହସ୍ପିଟାଲ ଏବଂ ପରେ ଅଧିକ ଚିକିତ୍ସା ନିମନ୍ତେ ବୁର୍ଲା ସ୍ଥାନାନ୍ତରିତ କରାଯାଇଛି । ଜମିଜମା ବିବାଦକୁ କେନ୍ଦ୍ର କରି ଏହି ଆକ୍ରମଣ ହୋଇଥିବା ସୂଚନା ଦେଇଛି ପୋଲିସ ।
ଆଜି ପୂର୍ବାହ୍ନ ପ୍ରାୟ ୯ଟା ସମୟରେ ଇନ୍ଦୁ ଦାଶ ଓ ଝିଅ ପାୟଲ ଦାଶ ସେମାନଙ୍କ ଲେଡ଼ିଜ୍ ଟେଲର ଦୋକାନକୁ ଯାଉଥିଲେ । ଏହି ସମୟରେ ଦୁହିଁଙ୍କ ଉପରେ ଅଭିଯୁକ୍ତ ସୁରଜ ହାତୀ ଅତର୍କିତ ଆକ୍ରମଣ କରିଥିବା ଅଭିଯୋଗ ହୋଇଛି । ଜମିବାଡ଼ିକୁ କେନ୍ଦ୍ର କରି ଉଭୟ ପରିବାର ମଧ୍ୟରେ ବିବାଦରୁ ଏହି ମରଣାନ୍ତକ ଆକ୍ରମଣ ହୋଇଥିବା ଜଣାପଡିଛି । ଅଭିଯୁକ୍ତ ସୁରଜକୁ ଧରିବା ପାଇଁ ଉଦ୍ୟମ ଚଳାଇଛି ପୋଲିସ ।
ସମ୍ବଲପୁର ସଦର ଏସଡିପିଓ ତୋଫାନ ବାଗ କହିଛନ୍ତି ଯେ, ଏସପିଙ୍କ ନିର୍ଦ୍ଦେଶ କ୍ରମେ ମାମଲାର ତଦନ୍ତ ପାଇଁ ଟିମ୍ ଗଠନ ହୋଇଛି । ଅଭିଯୁକ୍ତଙ୍କୁ ଖୁବ୍ ଶୀଘ୍ର ଗିରଫ କରାଯିବ । ଏନେଇ ଅଧିକ ତଦନ୍ତ ଜାରି ରହିଛି ।
