ଧର୍ମଶାଳା,ଯାଜପୁର ଜିଲା ଧର୍ମଶାଳା ବ୍ଲକ ଜାରକାର ପ୍ରସିଦ୍ଧ ଶେଢବପୀଠ ବାବା ଗୋକର୍ଣ୍ଣେଶ୍ଵର ମନ୍ଦିର ଠାରେ ଶୀତଳ ଷଷ୍ଠୀ ତଥା ଶିବପାର୍ବତୀ ବିବାହ ଉତ୍ସବ ଉଦଯାପିତ ହୋଇଯାଇଛି । ଚଳିତ ବର୍ଷ ଏହି ଉତ୍ସବକୁ ନିରାଡମ୍ବର ସହିତ ପାଳନ କରାଯାଇଥିଲା । ଏହି ଉତ୍ସବର ମୁଖ୍ୟ କର୍ତା ଲୁଲେନ୍ଦୁ ବେହେରାଙ୍କ ଅକାଳ ବିୟୋଗ ଘଟିବା ଯୋଗୁ ଚଳିତ ବର୍ଷ ନିରାଡମ୍ବର ସହ ପାଳିତ ହୋଇଥିବା ବେଳେ କେବଳ ବିଧି ରକ୍ଷା ନିମନ୍ତେ ରିତିକାନ୍ତି ଅନୁଯାୟୀ ପାଳନ କରାଯାଇଥିଲା ।
ପ୍ରଭାତରୁ ମନ୍ଦିର ପହଡ ଖୋଲାଯିବା ପରେ ବିଶେଷେ ରିତିକାନ୍ତି ଅନୁଯାୟୀ ମହାପ୍ରଭୂଙ୍କ ପୂଜା କାର୍ଯ୍ୟ ଆରମ୍ଭ ହୋଇଥିଲା । ମନ୍ଦିର ବେଢା ଭିତରରେ ଥିବା ଶିବପାର୍ବତୀଙ୍କ ପ୍ରତିମୂର୍ତିରେ ନୂତନ ବସ୍ତ୍ର ପରିଧାନ କରାଯାଇ ସୁସଜ୍ଜିତ କରାଯାଇଥିଲା । ବିଶିଷ୍ଟ ପଣ୍ଡିତଙ୍କ ଦ୍ଵାରା ମନ୍ତ୍ର ଉଚାରଣରେ ଶିବପାର୍ବତୀଙ୍କ ବିବାହ ସମ୍ପନ୍ନ ହୋଇଥିଲା । ଏହି କାର୍ଯ୍ୟକ୍ରମ ବିଳମ୍ବିତ ରାତ୍ରୀ ପର୍ଯ୍ୟନ୍ତ ଚାଲିଥିଲା । ଶହଶହ ସଂଖ୍ୟାରେ ଭକ୍ତମାନେ ସାମିଲ ହୋଇ ଏହି ବିବାହ ଦେଖିବା ସହିତ ଦେବ ଦମ୍ପତିଙ୍କ ଆଶିଷ ଲାଭ କରିଥିଲେ । ଏହି ଅବସରରେ ମନ୍ଦିର ପରିବେଶ ଉତ୍ସବ ମୁଖର ହୋଇ ଉଠିଥିଲା ।
